•   ¿Hukmanyankichu hukkuna mana allinkunata rimaptinku?

  •  Manam, chayna rimayman costumbrasqa kasqayraykum cuentatapas qukunichu.

  •  Wakinpiqa hukmanyanim ichaqa, ¿imanaymanmá?

  •  Arí, llumpaytam hukmanyachiwan manam uyariytapas munanichu.

•   ¿Qampas rimankichu mana allinkunata?

  •  Manapunim.

  •  Wakillanpim.

  •  Arí, sapa kutim.

•   ¿Llumpay mana allinchu?

  •  Manam, hukkunaqa aswan mana allinkunataraqmi ruwanku.

  •  Arí, manapunim rimananchikchu.

 ¿Llumpay mana allinchu mana allin palabrakunata rimay? Ichapas ninki: “Llapallan runakunam mana allinkunataqa rimanku, chaykunamantapas aswan mana allinkunaraqmi kan”, nispa. Ichaqa, ¿Chaynachu?

 Wakinkuqa kallpanchakunkum mana allin rimaykunata mana rimanankupaq. Kallpanchakunkuqqa chaykuna mana allin kasqanraykum:

•  Mana allin rimaykunaqa pinqaypaqmi. Rimasqaykiwanmi yachanqaku imayna runa kasqaykita. Qacha simi kaspaykiqa hukkunata mana respetasqaykitam qawachinki. ¿Ciertochu chayna kanki?

   Bibliapim nin: “Simimanta lluqsiqmi ichaqa sunqumanta lluqsimun”, nispa (Mateo 15:18).

•  Mana allinkunata rimaptikiqa hukkunam qanmanta mana allinkunata piensanqaku. Cuss Control sutiyuq libropim nin: “Imayna rimayniyuq kasqaykimantam imayna amistadniyuq kanaykipas kanqa. Chaymantataqmi kanqa aylluykikuna hinaspa llamkaqmasikikuna respetasunayki utaq mana respetasunaykipas, llamkaynikipi imayna kanaykipas chaynataq mana riqsisqayki runakunawan imayna kanaykipas”, nispa. Chay libropiqa nintaqmi: “Mana allinkunata manaña rimaspaykiqa allin amistadniyuqmi kanki”, nispa.

   Bibliapim nin: ‘Amañayá kaychikchu qaqchanakuqqa nitaq insultakuqqa’, nispa (Efesios 4:31, Chuya Qellqa).

•  Mana allinkunata rimaspaykiqa manam wakinkunamanta aswan riqsisqachu kanki. Alex Packer sutiyuq doctormi ¡Qué maleducado! nisqan libronpi kaynata nin: “Mana allin rimaykunata uyarispankum runakunaqa mana yachaywanchu nitaq kuyakuywanchu rimanku. Chayna mana allinkunata rimaspaykiqa mana yachayniyuq runam kanki”, nispa.

   Bibliapim nin: “Amayá simikichikmantaqa qacha rimaykunapas lluqsichunchu”, nispa (Efesios 4:29).

•  Kaypaq tantiakuy. Kallpanchakuy huk killapuni mana allinkunata ama rimanaykipaq. Papelpi utaq calendariopi qillqay chay killa hayka kutita mana allinkuna rimasqaykita. Mana allin rimaykunata manaña rimanaykipaqqa kaykunapipas kallpanchakuy:

•  Mana allin rimaqkunamanta karunchakuy. Bibliapim nin: “Mana allin amistadkunaqa allin kawsakuytam chinkachin”, nispa (1 Corintios 15:33). Amistadkuna nisqanwanqa manam nichkan runakunallamantachu, nichkantaqmi peliculakunamantapas, pukllaykunamantapas chaynataq takikunamantapas. 17 watanpi Kenneth sutiyuq musum nin: “Wakinpiqa gustasusqayki takitam takinki qacha rimaykunawan kasqanta mana cuentata qukuspayki”, nispa.

•  Yuyayniyuqmi kanayki. Yuyayniyuq kasqanta piensanankupaqmi wakinqa mana allinkunata rimanku, ichaqa manam chaynachu yuyayniyuqkunaqa. Paykunaqa yachankum imam allin utaq imam mana allin kaqtapas (Hebreos 5:14). Chaymantapas, allin kasqanta yachanankupaqqa manam mana allin palabrakunataraqchu riman.

 Mana allinkunata rimaspaqa manam kikinchikpas allinchu kasun, hukkunatapas hukmanyachisunmi. Kay pachapiqa llumpay mana allinkunallañam kachkan. Cuss Control sutiyuq libropipas kaynatam nin: “Mana allinkuna rimasqankutaqa amayá qatipakuychu, aswanqa allinkunata rimanaykipaqyá kallpanchakuy. Chayna kaspaykiqa hawkam kawsakunki, yanapankitaqmi hukkunatapas”, nispa.