Jehova Diosqa manam munanchu huchapakunanchikta (1 Tesalonicenses 4:3). Bibliapim nin hukwan pierdekuyqa, qarimasillanwan utaq warmimasillanwan kakuyqa hinaspa mana casarakuchkaspa uywanakuyqa huchapakuy kasqanta.

•  ¿Imanasqataq Diosqa munan warmi-qari kuska yachayta munaspankuqa casarakunankuta?

•  ¿Allinchu kanman manaraq casarakuchkaspanku riqsinakunankupaq uywanakuyninkuqa?

•  ¿Imataq casarasqakunata yanapanman kusisqa kawsakunankupaq?

•   Diosqa qallariymantam munarqa casarakuspanku kawsakunankuta. Kikin Jehova Diosmi Adantawan Evata casarachirqa (Genesis 2:22-24 a). Payqa manam munarqachu uywanakunankutaqa.

•   Diosqa casarakunankutaqa munan kusisqa kawsakunankupaqmi. Diosqa munarqam casarasqakunaqa wiñaypaq kuska kawsakunankuta hinaspa kuskanku wawa-churinkutapas uywanankuta. Kaypi piensariy catreta rantiptiki rantikusuqniki nisunkiman: “Kaynatam armanki”, nispa. Nisusqaykita kasukuspaykiqa mana sasachakuspallam armarunki. Chaynallataqmi Jehova Diospas yachachiwanchik imayna kawsakunapaq, niwasqanchikta kasukuspaqa casado vidapipas hinaspa churi wawanchikkunawanpas kusisqam kawsakusunchik (Isaias 48:17, 18).

•   Diosqa casarakunankutaqa munan mana ñakarinankupaqmi. Mana casarakuchkaspanku warmi-qari puñuqkunaqa sasachakuypim tarikunku. Wakinkum wawayuq kayta manaraq munachkaspanku wiksayakurunku, wakinñataqmi ima unquywanpas hapirachikunku, wakinkuñataqmi sunqunkupi hukmanyasqa tarikunku. b

•   Diosqa munarqam casarakuspallanku warmi-qari puñunankutaqa. Chaynapi wawa-churiyuq kanankupaq. Chayraykum Jehova Diosqa munan casadokunaqa warmillankuwan utaq qusallankuwan puñunankuta. Chayta kasukuqkunaqa kusisqam casado vidankupi kawsakunku (Hebreos 13:4).

 Manaraq casarakuchkaspanku riqsinakunankupaq uywanakuqkunaqa ima piñanakuy karuptinpas chayllam rakinakurunku. Casarasqakunam ichaqa casarakusqanku punchawpi kuska kanankupaq ninakusqankurayku ima sasachakuy kaptinpas allinyanakunankupaq kallpanchakunku, chaynapi hinalla kuskanku kanankupaq (Mateo 19:6). c

 Jehova Diospa nisqanta casarasqakuna kasukuspankuqa ima sasachakuy kaptinpas kusisqam kawsakunqaku. Jehova Diosmi casarasqakunata nin:

•   Kikillankupa allinninkuta ama maskanankupaq (1 Corintios 7:3-5; Filipenses 2:3, 4).

•   Respetanakunankupaq hinaspa kuyanakunankupaq (Efesios 5:25, 33).

•   Sumaqllata rimapayanakunankupaq (Proverbios 12:18).

•   Pampachanakunankupaq hinas aguantanakunankupaq (Colosenses 3:13, 14).