Kunan tiempopiqa tukuywan sasachakuspam kawsakunchik, ¿hamuq tiempopiqa chaynallachu tarikusun? ¿Icha hawkañachu? Chaypaqyá qatiqninpi qawaykusun bibliapi ima nisqanmanta.

•  ¿Ima nintaq bibliapiqa hamuq tiempomanta?

•  ¿Iskayrayachwanchu bibliapi nisqankunamanta?

•  ¿Imaynatataq cumplikunqa bibliapi nisqankunaqa?

•  ¿Haykapitaq cumplikunqa bibliapi nisqankunaqa?

•  ¿Imapaqmi yanapasunkiman bibliapi nisqankunamanta yachasqaykiqa?

 Bibliam willawanchik hamuq tiempopiqa sasachakuyninchikkunaqa manaña kananmanta. Chaymantam qatiqninpi yachaykusun.

•   Sasachawaqninchik: Manam wasinchik kanchu

   Bibliapim nin: “Wasikunatam hatarichinqaku hinaspam chaypi yachanqaku”, nispa (Isaias 65:21 a).

   Kaynañam kawsakusun: Llapallanchikpam wasinchik kanqa.

•   Sasachawaqninchik: Llamkapakuytam mana tarinchikchu, wakcham kanchik

   Bibliapim nin: “Akllakusqaykunaqa llamkasqankupa ruruntam mikunqaku”, nispa (Isaias 65:22).

   Kaynañam kawsakusun: Llapallanchikmi munasqanchik llamkaykunapi llamkasun, chaywanqa kusisqam tarikusun.

•   Sasachawaqninchik: Runamasinchikmi ñakarichiwanchik

   Bibliapim nin: ‘Kamachiypi yanapaqninkunapas lliwpaqmi allinkunallata ruwanqa’, nispa (Isaias 32:1).

   Kaynañam kawsakusun: Maylawmanta kaspanchikpas llapallanchikmi huk sunqulla kawsakusunchik. Manañam kanqachu ñakarichiwaqninchik runakunaqa. Manañataqmi apukunaqa chaynataq wakchakunaqa kanqachu, lliwmi chaynalla kasunchik.

•   Sasachawaqninchik: Muchuy kaptinmi yarqaymanta kanchik

   Bibliapim nin: ‘Kay pachapiyá achka-achka kawsaykuna qispichun. Muqu chakrakunapiyá sumaqllataña kawsaykuna aywityachun’, nispa (Salmos 72:16).

   Kaynañam kawsakusun: Llapallanchikpaqmi tukuy rikchaq mikuykuna kanqa. Manam yarqaymantaqa ñakarisunchu.

•   Sasachawaqninchik: Suwakunam hinaspa mana allin runakunam manchachiwanchik

   Bibliapim nin: “Sapakamam uvas plantankupa higos sachankupa llantunpi tiyakunqaku, manañam pipas paykunataqa manchachinqachu”, nispa (Miqueas 4:4).

   Kaynañam kawsakusun: Hawkañam kawsakusunchik, mana allin runakunaqa manañam kanqañachu, ‘allin ruwaq runakunallañam allpapiqa’ yachanqaku (Salmos 37:10, 29).

•   Sasachawaqninchik: Guerrakuna kasqan

   Bibliapim nin: “Manañam nacionpurapas wañuchinakunqakuñachu, guerrapaqpas manañam yachachinakunqakuñachu”, nispa (Isaias 2:4).

   Kaynañam kawsakusun: Enteron allpa pachapim hawkaña kawsakusun (Salmos 72:7). Manañam ñakarisunchu guerra kasqanraykuqa, manataqmi llaqtanchikmantaqa huklawmanqa lluptikusunchu, nitaqmi guerrapi wañukuq huk kaqnin ayllunchikmantaqa waqallasunchu.

•   Sasachawaqninchik: Unquykuna

   Bibliapim nin: ‘Manañam mayqannikichikpas ninkichikñachu “unquchkanim” nispaqa’ (Isaias 33:24).

   Kaynañam kawsakusun: Manañam ima unquywanpas ñakarisunñachu, sanoyanqakutaqmi wistukunapas, ñawsakunapas, upakunapas (Isaias 35:5, 6). Bibliaqa nintaqmi: “Manañam kanqachu wañuypas”, nispa (Apocalipsis 21:4).

•   Sasachawaqninchik: Allpa pachanchiktam qachachachkanku

   Bibliapim nin: “Chunniq sitiom kusikunqa. Chaki allpam anchata kusikunqa. Purun waytakuna hinam waytanqa”, nispa (Isaias 35:1).

   Kaynañam kawsakusun: Enteron allpa pacham runakuna yachananpaq sumaq-sumaq kanqa. Diosqa qallariymantapacham chayna allpapi kawsakunanchikta munarqa (Genesis 2:15; Isaias 45:18).

 Wakinqa iskayrayankum hamuq tiempopi imayna kawsakunamanta bibliapi nisqanmanta. Ichaqa manam iskayrayananchikchu, bibliaqa Diospa palabranmi. Paypa nisqankunaqa cumplikunpunim. Chaymantayá qatiqninpi astawan yachaykusun:

•   Jehova Diosqa cumplinpunim nisqankunataqa. Bibliapiqa ninmi Jehova Diosqa “mana llullakuq” kasqanmanta (Tito 1:2). Chaymantapas payllam hamuq tiempopi ima pasananmantaqa willawanchik (Isaias 46:10). Bibliapiqa willawanchiktaqmi ñawpaq tiempokunapipas Diospa nisqanqa cumplikusqanmanta. Chaymanta astawan yachayta munaspaykiqa ¿Imanasqataq mana iskayrayachwanchu bibliapa willakuyninmanta? niq videota qaway.

•   Diosqa atiyniyuqmi yanapawananchikpaq. Bibliam willawanchik munasqanta ruwananpaq Diosqa atiyniyuq kasqanmanta (Salmos 135:5, 6). Nisqankunata cumplinanpaqqa manam imapas harkanmanchu. Chaymantapas kuyawasqanchikraykum yanapawasun (Juan 3:16).

 Ichapas ninki: “Dios kuyawaptinchikqa chaynataq atiyniyuq kaptinqa, ¿imanasqataq sasachakuykunapi hinalla kachkanchik?”, nispa. Chaymanta astawan yachayta munaspaykiqa ¿Imanasqam Diosqa ñakariykunata mana chinkachinchu? niq videota qaway.

 Jehova Diosmi churin Jesusta akllarun hanaq pachamanta kamachimunanpaq. Paymi allpa pachata allichanqa, runakunatapas yanapanqam. Jesus kay pachapi kaspanmi unquqkunata sanoyachirqa, yarqaymanta kaqkunaman mikuchirqa, wañukuqkunata kawsarichirqa, wayra-paratapas sayachirqam, chaykunataqa ruwarqa Diospa atiyninwanmi (Marcos 4:39; 6:41-44; Lucas 4:40; Juan 11:43, 44). Hanaq pachamanta kamachimuspanqa chaynatam Jesusqa enteron pachapi runakunata yanapanqa.

 Jesus imakunata ruwananmanta astawan yachayta munaspaykiqa ¿Imataq Diospa munaychakuyninqa? niq videota qaway.

 Manapas unaymantam. ¿Imanasqataq chaynata ninchik? Bibliapim nirqaña Jesus kamachimunanpaqña kaptinqa imakuna pasananmanta (Lucas 21:10, 11). Chay willakuykunaqa kunan punchawkunapim cumplikuchkan.

 Chaymanta astawan yachayta munaspaykiqa “¿Haykapitaq kay allpa pachata Jesus kamachiyta qallaykunqa?” niq yachachikuyta leey.

 Apostol Pablom nirqa bibliapi nisqankunamanta yachasqanchikqa anchata yanapawasqanchikmanta (Hebreos 6:19). Buquetam sayachin llasaq fierro, chaymi wayra-para kaptinpas mana tikrakunchu. Yaqa chaynam hamuq tiempopi imayna kawsakunanchikmanta bibliapi yachasqanchikpas kay tiempopi sasachakuykunawan mana hukmanyarunapaq yanapawanchik (1 Tesalonicenses 5:8).