Sean Gladwell/Moment via Getty Images
¡QAWAN-QAWANLLAYÁ KASUN!
Enteron pachapi gobiernokunam gastarunku 2 billon dolar masnin qullqita militarkunapi | ¿Imatam biblia nin?
2022 watapim enteron pachapi gobiernokuna gastarurqaku 2.24 billon dolar masnin qullqita militarkunapi, manamá haykapipas chaynataqa gastarqakuchu. Astawanqa gastarqaku Rusia nacion Ucrania nacionwan guerrapi kaptinku yanapaspanmi. 2023 watapa abril killanpim Instituto Internacional de Estocolmo para la Investigación de la Paz (SIPRI) nisqan willakurqa 2022 watapi imakunapi gastasqankumanta:
Qayna watam Europa lawpi gobiernokunapa militarkunapi gastasqanku “yapakururqa 13 por ciento nisqa. Chayqa karqa 1991 watapi guerra kaptin gastasqankumantapas astawanraqmi”.
“Rusia nacionpim [...] militarkunapi gastarqaku 9.2 por ciento nisqanta. Chaywanmi astawan gastaq nacionkunamanta quintopi kasqanmanta terceroman pasarun”.
Estados Unidos nacionmi “enteron pachapi nacionkunamantaqa 39 por ciento nisqanta militarkunapi gastarqa.
“Kay watakunapi gobiernokuna militarkunapi qullqita astawan gastasqankum qawachiwanchik aswan mana allin tiempopi kawsasqanchikta”. Chaynatam nirqa SIPRI nisqanpi llamkaq Dr. Nan Tian.
Bibliapim nirqaña atiyniyuq nacionkuna chiqninakunankumanta, nirqataqmi hawka kawsakuyta pi apamunanmantapas.
Bibliam nirqa guerrakuna astawan yapakunanmanta
Kay kawsasqanchik tiempotam biblia sutichan ‘tukupay tiempo’ nispa (Daniel 8:19).
Daniel libropim nirqaña tukupay tiempopi atiyniyuq nacionkuna ‘chiqninakunankumanta’. Chay nacionkunam tukuyta ruwanakunanku karqa mayqanninku aswan atiyniyuq kasqankuta qawachinankupaq. Chaypaqqa militarkunapim achka-achka ‘qullqita’ gastananku karqa (Daniel 11:40, 42, 43).
Bibliapa willakusqan imayna cumplikusqanmanta astawan yachanaykipaq qaway Danielpa qillqasqan imayna cumplikusqanmanta niq videota.
¿Pitaq apamunqa hawka kawsakuyta?
Bibliapim willawanchik kay pachapi gobiernokunata Dios chinkachinanmanta. Paymi “runakuna kamachiyta qallarinqa. Manam pipas kamachiq kasqanmantaqa haykapipas hurqunqachu, manam huk kamachiqqa rikurimunqañachu. Diosmi chay kamachiqkunata ñutupaspan qalaypaqta chinkachinqa, hinaspam payllaña wiña-wiñaypaq kamachinqa” (Daniel 2:44).
Runakunaqa manam haykapipas hawka hinaspa kusisqa kawsakuytaqa apamunqachu, aswanqa Jehova a Diosllam. ¿Imaynata? Diospa gobiernonmi guerrapaq tukuy ima kaqkunata chinkachispan lliw mana allinkunata tukuchinqa (Salmos 46:8, 9).
Diospa gobiernon imakuna ruwananmanta astawan yachanaykipaq leey “El Reino de Dios traerá ‘paz en abundancia’” niq yachachikuyta.
a Diospa sutinmi Jehova (Salmos 83:18).