1 Reyes 14:1-31
14 Chay punchawkunapim Jeroboanpa churin Abias unqururqa.
2 Chaymi Jeroboanqa warminta nirqa: “Warmiy kasqaykita mana cuentata qukunankupaqyá huk pachawan pachakuruy, hinaspayá Silo llaqtapi yachaq* Diosmanta willakuq* Aiyaman riruy. Paymi niwarqa kay llaqtapa kamachiqnin kanaypaq.+
3 Paymanyá aparikuy chunka tantata, miski tantakunata hinaspa aysakupi mielta. Paymi willasunki warmanchik imayna kananmanta”, nispa.
4 Jeroboanpa warminqa kamachisqanman hinam ruwarqa. Chaymi Silo llaqtapi+ Aiyapa wasinman chayarurqa. Aiyaqa yuyaqña kasqanraykum qawaspanpas manaña rikukurqachu.
5 Chaywanpas Jehova Diosmi Aiyata nirqa: “Jeroboanpa warminmi wawan unquptin tapukusunaykipaq hamuchkan. Ñuqam imata ninaykipaq nisqayki. Payqa mana musyachikunanpaqmi huk pachawan pachakuruspan hamuchkan”, nispa.
6 Hinaptinmi punkuta yaykuykuptillan Aiyaqa musyaruspan nirqa: “Yaykukamuy Jeroboanpa warmin. ¿Imanasqataq chaynaqa hamuchkanki? Diosmi mana allin willakuyta niykuwan qanman willanaypaq.
7 Rispaykiyá qusayki Jeroboanta nimuy: ‘Israelpa yupaychasqan Jehova Diosmi nin: “Ñuqam llaqtamasikikunamanta akllarqayki Israel runaykunata kamachinaykipaq.+
8 Davidpa mirayninkunamanta kamachisqanta qichuspaymi qanman qurqayki.+ Ichaqa manam yupaychawaqniy David hinachu kanki, Davidqa munasqayman hina kawsakuspanmi kamachikuyniykunata tukuy sunqunwan kasukurqa.+
9 Qamqa ñawpaq abueloykikunamantapas aswan mana allintaraqmi ruwarunki. Qamqa piñachiwanaykipaqmi taytacha-mamachakunata ruwakurunki chulluchisqa fierromanta,+ chayta ruwasqaykiwanmi qipancharuwanki.+
10 Chaymi miraynikikunaman ñakariyta apamusaq. ¡Israel runakunamantam aylluykipi lliw qarikunata chinkachisaq! ¡Chinkachisaqtaqmi aylluykipi mana valeqkunatapas!+ ¡Wanuta pichachkaq hinamá miraynikikunataqa qalaypaq chinkachisaq!
11 Llaqtapi wañuq aylluykikunatam allqukuna mikunqa, hawapi wañuqkunatañataqmi alton pawaqkuna mikunqa. Ñuqa Jehova Diosmi chaynata nini”’, nispa.
12 Kunanqa wasikimanñayá kutikuy, llaqtaman chayaykuptillaykim wawaykiqa wañukunqa.
13 Hinaptinmi llapallan Israel runakuna waqaspanku pampanqaku. Payllam Jeroboanpa ayllunmantaqa pampasqa kanqa. Payllatataqmi Israelpa yupaychasqan Jehova Diosqa allin kasqanta qawan.
14 Jehova Diosmi Israel nacionpi rikurichinqa huk kamachiqta, paymi Jeroboanpa mirayninkunata chinkachinqa.+ Chay punchawqa chayaykamuchkanñam.
15 Jehova Diosmi Israel runakunata ñakarichinqa, paykunaqa kanqaku yakupa aytinyachisqan suqus hinam. Suqusta sapinmanta chutachkaq hinam Israel runakunataqa ñawpaq abuelonkuman qusqan allpamanta qarqurunqa,+ hinaspanmi chiqirachinqa Eufrates mayupa waklawninkamaraq.+ Chaynataqa ruwanqa yupaychanapaq kulluta sayarachispa+ Jehova Diosta piñachisqankuraykum.
16 Israel runakunataqa qipancharunqa Jeroboan huchallikusqanraykum hinaspa Israel runakunata huchallichisqanraykum”, nispa.+
17 Chaymantam Jeroboanpa warminqa kutispan Tirza llaqtaman chayarurqa. Wasinman chayaykuptillanmi wawanqa wañukurqa.
18 Pamparuptinkum llapallan Israel runakuna waqarqaku, chayqa karqa Aiyawan Jehova Diospa willachisqanman hinam.
19 Jeroboanpa imayna kawsakusqanqa, imayna peleasqanqa+ hinaspa imayna kamachisqanqa Israelpi kamachiqkunamanta willakuq libropim qillqasqa kachkan.
20 Jeroboanqa 22 watam kamachirqa. Pay wañukuptinmi+ churin Nadabña kamachiq karqa.+
21 Salomonpa churin Reoboamñataqmi Juda nacionta kamachirqa. Reoboamqa 41 watanpim karqa kamachiyta qallarispanqa. Jerusalenpim kamachirqa 17 wata, chay llaqtatam Jehova Diosqa Israel nacionpi lliw ayllukunamanta akllarqa+ sutinta riqsichikunanpaq.+ Reoboampa mamanmi karqa Ammon kasta Naama sutiyuq warmi.+
22 Judapi runakunam Jehova Diospa chiqnisqan kaqkunata ruwaqku,+ chaywanmi ñawpaq abuelonkumanta astawanraq Diosta piñachiqku.+
23 Paykunaqa llapallan muqukunapi+ hinaspa kallmasapa sachakunapa sikinpim+ taytacha-mamachakunata yupaychanankupaq churaqku, sayachirqakutaqmi suytu rumikunatapas hinaspa kullukunatapas+ yupaychanankupaq.
24 Chaypiqa karqataqmi taytacha-mamachankuta yupaychaspa qarimasillanwan kakuqkunapas, qullqirayku qarimasillanwan kakuqkunapas.+ Judapi runakunaqa millakuypaq kaqkunatam ruwarqaku Israel runakunapa qayllanmanta Jehova Diospa qarqusqan llaqtakuna hina.
25 Pichqa wataña Reoboam kamachichkaptinmi Egipto nacionta kamachiq* Sisac+ Jerusalen llaqtata yaykururqa.+
26 Hinaspam Jehova Diospa wasinpi chaynataq kamachiqpa wasinpi quri-qullqimanta kaq tukuy imata apakurqa.+ Apakurqataqmi Salomonpa ruwachisqan qurimanta llapallan harkachikunatapas.+
27 Chaymi kamachiq Reoboamqa chaykunapa rantinpi ruwachirqa broncemanta harkachikunataña, hinaspam waqaychaqnin soldadokunapa kamachiqninkunata* nirqa cuidanankupaq, paykunam kamachiq Reoboampa wasin punkupi kaqku.
28 Jehova Diospa wasinman Reoboam riptinmi llapallan harkachikunata hurquspanku riysiqku, chaymantañataqmi maymi kasqanman kutiykachiqku.
29 Reoboampa imayna kawsakusqanmanta hinaspa tukuy ima ruwasqanmantaqa Judapi kamachiqkunamanta willakuq libropim qillqasqa kachkan.+
30 Reoboanwan Jeroboanqa peleayllapiñam karqaku.+
31 Reoboam wañukuptinmi pamparurqaku ñawpaq abuelonkunapa pampakusqan Davidpa llaqtan sutiyuq llaqtapi.+ Reoboampa mamanmi karqa Ammon kasta Naama sutiyuq warmi.+ Chaymantam Reoboampa churin Abiyamña*+ kamachiq karqa.
Willakuykuna
^ Utaq: “Profeta”.
^ Utaq: “Tiyaq”.
^ Utaq: “Faraon”.
^ Hebreo rimaypiqa nichkan: “Kallpaqkunata”, nispam.
^ Huknin sutinñataqmi Abias.
