2 Cronicas 36:1-23
-
Juda runakunata Jehoacaz kamachisqanmanta (1-3)
-
Juda runakunata Jeoyakim kamachisqanmanta (4-8)
-
Juda runakunata Joakin kamachisqanmanta (9, 10)
-
Juda runakunata Sedequias kamachisqanmanta (11-14)
-
Jerusalenta kañaykusqankumanta (15-21)
-
Diospa wasinta kaqmanta hatarichinankupaq Ciropa kamachisqanmanta (22, 23)
36 Chaymantam runakunaqa Josiaspa rantinpi churin Jehoacaztaña+ kamachiq kananpaq Jerusalen llaqtapi churarurqaku.+
2 Jehoacazqa 23 watanpi kachkaspam kamachiyta qallaykurqa. Payqa Jerusalen llaqtamantam Juda nacionta kimsa killalla kamachirqa.
3 Paytaqa Egipto nacionta kamachiq Nekom Jerusalenpi kamachiq kasqanmanta qarqururqa, hinaspanmi lliw runakunamanta mañarqa 3.420 kilo* qullqitawan 34 kilo masnin* qurita.+
4 Chaymantapas, Jehoacazpa rantinpi Jerusalen llaqtamanta Juda nacionta kamachinanpaqmi churarurqa wawqin Eliakimtaña. Hinaspanmi Jeoyakim nispaña suticharurqa. Jehoacaztañataqmi Nekoqa+ Egipto nacionman pusarurqa.+
5 Jeoyakimqa+ 25 watanpi kachkaspam kamachiyta qallaykurqa. Payqa Jerusalen llaqtamantam Juda nacionta 11 wata kamachirqa. Jeoyakimqa Jehova Diospa chiqnisqan kaqkunatam ruwarqa.+
6 Chaymi Babilonia nacionta kamachiq Nabucodonosor+ hamururqa bronce cadenakunawan nacionninman pusananpaq.+
7 Nabucodonosormi Babilonia nacionman apakurqa Jehova Diospa wasinpi kaq wakin serviciokunata, hinaspanmi wasinman churarurqa.+
8 Jeoyakimpa imayna kawsakusqanmantaqa, millakuypaq kaqkunata ruwasqanmantaqa chaynataq huchallikusqanmantaqa Israel naciontawan Juda nacionta kamachiqkunamanta willakuq libropim qillqasqa kachkan. Jeoyakim wañukuptinmi churin Joakinña kamachiyta qallaykurqa.+
9 Joakinqa+ 18 watanpi kachkaspam kamachiyta qallaykurqa. Payqa Jerusalen llaqtamantam kamachirqa kimsa killa chunka punchawllan. Joakinqa Jehova Diospa chiqnisqan kaqkunatam ruwarqa.+
10 Wata qallariytam* Joakinta Babilonia nacionman pusanankupaq+ Nabucodonosor kamachirqa. Apanankutaqmi karqa Jehova Diospa wasinpi imapas allinnin kaqkunata.+ Chaymantapas, Nabucodonosorqa Jerusalenmanta Juda nacionta kamachinanpaqmi churarurqa Joakinpa tion Sedequiastaña. Payqa karqa taytanpa wawqinmi.+
11 Sedequiasqa+ 21 watanpi kachkaspam kamachiyta qallaykurqa. Payqa Jerusalen llaqtamantam Juda nacionta 11 wata kamachirqa.+
12 Sedequiasqa Jehova Diospa chiqnisqan kaqkunatam ruwarqa. Jehova Diospa nisqanta willakuq* Jeremias rimapayachkaptinpas manam riqsikurqachu+ mana allin ruwasqankunataqa.
13 Nabucodonosorta kasukunanpaq Diospa sutinpi rimasqantapas Sedequiasqa manam kaqpaqpas hapirqachu.+ Sedequiasqa mana kasukuq rumi sunqum karqa. Manam Israelpa yupaychasqan Jehova Diosman kutirikuytapas munarqachu.
14 Sacerdotekunapa kamachiqninkunapas chaynataq llapallan runakunapas huklaw nacionniyuq runakuna hinam millakuypaq kaqkunata ruwarqaku. Jerusalen llaqtapi Jehova Diospa sapaqchasqan wasipipas mana allinkunatam ruwarqaku.+
15 Ñawpaq abuelonkupa yupaychasqan Jehova Diosqa runankunatawan wasinta llakipayasqanraykum willakuqninkunawan sapa kuti willachirqa.
16 Paykunam ichaqa Diospa runankunamanta asikurqaku.+ Diospa nisqanta mana uyarispankum+ willakuqninkunamantapas asikurqaku.+ Chaymi Jehova Diosqa runankunapaq piñakurqa+ manaña pipas yanapay atinankama.
17 Chaymi Diosqa Caldea runakunapa kamachiqninta paykunaman kacharqa,+ hinaptinmi Diospa wasinpi+ musukunata wañurachirqa.+ Manam llakipayarqachu sipaskunatapas, yuyaqkunatapas+ nitaq mana kallpayuqkunatapas. Diosqa llapallankutam makinman churaykurqa.+
18 Babilonia nacionmanmi apakurqa Diospa wasinpi llapallan serviciokunatapas. Apakurqataqmi Jehova Diospa wasinpi quri-qullqitapas chaynataq kamachiqpawan yanapaqninkunapa quri-qullqintapas.+
19 Kañaykurqam Diospa wasintapas,+ torrenkunatapas, tuñirachirqam Jerusalen llaqtapa pirqantapas.+ Ñutuparurqataqmi runakunapa allin kapuqninkunatapas.+
20 Mana wañuchisqan runakunatañataqmi Babiloniaman pusakurqa,+ chaypim paypapas chaynataq churinkunapapas serviqninkuna karqaku+ Persia nacion munaychakunankama.+
21 Chaynaqa karqa Jeremiaswan Jehova Diospa willachisqanman hinam.+ Allpankupas purmarurqam, mana samachisqankuraykum+ 70 wata samarqa.+
22 Persiata kamachiq Ciro+ huk wata kamachichkaptinmi Jehova Diosqa payta kallpancharqa runankunaman kamachikuyta qunanpaq, chaynapi Jeremiaswan+ Jehova Diospa willachisqanman hina kananpaq. Chay kamachikuy qillqasqanmi+ nirqa:
23 “Persia nacionta kamachiq Cirom nini: ‘Hanaq pachapi kaq Jehova Diosmi llapallan kamachiqkunata quykuwan.+ Paytaqmi niykuwan Juda nacionpa Jerusalen llaqtanpi wasita ruwapunaypaqpas.+ Chaynaqa, qamkuna ukupi pipas Jehova Diospa runan kaspanqa kutikuchunyá, paymi yanapanqa’”, nispa.+
Willakuykuna
^ Utaq: “100 talento”. Qaway B14 kaq yachachikuyta.
^ Utaq: “Huk talento”.
^ Kayqa karqa marzo utaq abril killapim.
^ Utaq: “Profeta”.
