2 Samuel 10:1-19
-
Ammon hinaspa Siria soldadokunata vencesqankumanta (1-19)
10 Chaymanta qipatam Ammon runakunapa kamachiqnin+ Naas wañukurqa, hinaptinmi churin Hanunña kamachirqa.+
2 Chaymi David nirqa: “Hanuntaqa kuyakuywanmi imaña kaptinpas yanapasaq, taytan Naas yanapawasqanman hina”, nispa. Chaymi Davidqa runankunata Hanunman kacharqa taytan wañukusqanmanta sunqunta tiyaykachimunankupaq. Davidpa runankuna Ammon runakunapa allpanman chayaruptinkum
3 kamachiq Hanuntaqa yanapaqninkuna nirqaku: “Davidqa manam taytaykita kuyaspan sunquykita tiyaykachinanpaqchu runankunataqa kachamurqa, aswanqa wañurachiwananchikpaq llaqtata qawaqmi”, nispa.
4 Chaymi Hanunqa Davidpa kachasqan runakunapa barbanta huklaw uyallanta qatqarurqa*,+ pachankutapas siki patankamam kuchururqa. Hinaspanmi kachaykurqa kutikunankupaq.
5 Chay runakunaqa pinqakuyllawanñam karqaku. Chay ruwasqankuta willaykuptinkum Davidqa runankunawan willachimurqa: “Barbaykichik wiñanankamayá Jerico llaqtapi+ qipakamuychik, chaymantañayá kutimuychik”, nispa.
6 Davidmi Ammon runakunata chiqnirurqa runankunata pinqaypi churasqanrayku. Chayta yacharuspankum Ammon runakunaqa Bet-reob+ hinaspa Zoba lawmanta+ 20.000 Siria soldadokunata pagaspa huñuchimurqa. Maaca+ llaqtamantañataqmi huñuchimurqa kamachiqta hinaspa 1.000 soldadokunata, Istob* llaqtamantañataqmi huñuchimurqa 12.000 soldadokunata.+
7 Chayta yacharuspanmi Davidqa Joabta kacharqa lliw soldadontinta, rirqataqmi aswan kallpasapa soldadokunapas.+
8 Ammon runakunaqa llaqtapa punkunpim churakururqaku peleanankupaq. Zoba hinaspa Reob lawmanta Siria soldadokunañataqmi Istob chaynataq Maaca llaqtayuq soldadokunawan huklaw pampapi karqaku.
9 Joabñataqmi ñawpaqninpi hinaspa qipanpi soldadokunata qawaykuspan allin peleaq soldadokunallata akllarqa, hinaspanmi churarurqa Siria soldadokunawan peleanankupaq.+
10 Wakin soldadokunatañataqmi wawqin Abisaiman+ saqiykurqa Ammon runakunawan peleanankupaq.+
11 Hinaspam Joabqa Abisaita nirqa: “Siria soldadokunawan peleayta manaña atiptiyqa yanapawaqniymi hamunki. Ammon soldadokunawan manaña peleayta atiptikiñataqmi yanapaqniki hamusaq.
12 Qarinchakuspayá mana manchakuspa+ peleasunchik llaqtanchikrayku hinaspa Diospa quwasqanchik llaqtakunarayku. Jehova Diosmi tantiasqanta ruwanqa”, nispa.+
13 Chaymantam Joabqa soldadonkunapiwan asuykurqaku Siria soldadokunawan peleanankupaq, hinaptinmi paykunaqa lluptikururqaku.+
14 Chayna lluptikusqankutam Ammon soldadokuna rikururqaku, hinaspankum paykunapas Abisaimanta lluptikuspanku llaqtaman yaykururqaku. Chaymantam Joabqa Ammon soldadokunata saqiruspan Jerusalenman kutirqa.
15 Israel soldadokuna mancharachisqanta qawaykuspankum Siria soldadokunaqa kaqmanta huñunakururqaku.+
16 Hadadezermi+ Eufrates mayu+ lawpi yachaq* Siria runakunata qayarachirqa, hinaptinmi paykunaqa Helam lawman hamurqaku Hadadezerpa soldadonkunapa jefen Sobacpiwan.
17 Chayta Davidman willaykuptinkum chaylla huñurachirqa Israelpi llapallan soldadokunata. Paykunaqa Jordan mayuta chimpaspankum Helam lawman chayarurqaku. Hinaptinmi Siria soldadokunaqa peleanankupaq kinrayninpaman churakuruspanku Davidwan pelearqaku.+
18 Chaymantam Siria soldadokunaqa Israel soldadokunamanta ayqikurqaku. Davidmi wañurachirqa 700 carretayuq soldadokunata hinaspa 40.000 caballopi silladakunata. Wañurachirqataqmi soldadokunapa kamachiqnin Sobactapas.+
19 Chay runakunata Israel runakuna wañurachisqanta qawaykuspankum Hadadezerpa runankunaqa paykunawan rimarqaku hawkaña kawsakunankupaq, hinaspankum runankunaña karqaku.+ Siria runakunaqa manañam Ammon runakunataqa yanapayta munarqakuñachu.
