2 Samuel 14:1-33
14 Davidmi churin Absalonwan tupaykuyta munarqa, chaytam Zeruyapa+ wawan Joab yacharurqa.+
2 Chaymi Joabqa Tekoa llaqtapi+ sakri warmita maskarachimurqa, hinaspam yachachispan nirqa: “Pi aylluykipas wañukuptin waqachkaq hinayá qachqa pachawan hinakuy. Aceitewanqa amam hinakunkichu.+ Chaynaqa kanayki wañukuq ayllunmanta unayña waqachkaq warmi hinam.
3 Chaymantam kamachiq Davidman rispayki yachachisqayta nimunki”, nispa. Hinaspanmi Joabqa yachachirqa imam ninanta.
4 Chaymi Tekoa llaqtayuq warmiqa kamachiq Davidman chayaruspan ñawpaqninpi qunqurakuykuspan kumuykurqa, hinaspam nirqa: “¡Kamachiqlláy, yanapaykullaway!”, nispan.
5 Davidñataqmi nirqa: “¿Imanantaq?”, nispa. Chay warmiñataqmi nirqa: “Qusay wañukuptinmi viudaña kallani.
6 Taytáy, ñuqapam kapuwarqa iskay qari wawaykuna. Huk kutipim iskayllanku peleaptinku pipas mana rakiykuqnin karqachu, hinaptinmi hukninta wañurachirqa.
7 Chaymi llapallan aylluykuna ñuqapaq piñakuruspanku niwachkan: ‘¡Maymi wañuchiq wawayki, wawqin wañuchisqanmanta wañuchinaykupaq!+ Payllaña* wawayki kaptinpas qumuwayku’, nispanku. Ninata wañuchichkaq hinachá sapallanña wawayta wañurachinqaku, hinaptinchá qusaypa sutinpas hinaspa mirayninpas chinkarunqa”, nispa.
8 Hinaptinmi Davidñataq chay warmita nirqa: “Wasikiman kutikuy, ñuqam sasachakuynikita allichachisaq”, nispa.
9 Chay warmiñataqmi nirqa: “Kamachiqlláy, wawayta wañuchisqanmantaqa ñuqawan taytaypa ayllunyá huchayuq kasaqku, amayá qamchu nitaq miraynikikunachu”, nispa.
10 Davidñataqmi nirqa: “Pipas kaqmanta imatapas nisuptikiqa pusaramuway, chaynapim manaña imatapas nisunkichu”, nispa.
11 Chay warmiqa nirqaraqmi: “Taytalláy, amayá Jehova Diostaqa qunqaruychu, chaynapi huknin wawayta aylluy mana wañurachinanpaq”, nispa.+ Davidñataqmi nirqa: “Kawsaq Jehova Diospa sutinpim niki,+ wawaykitaqa manam imananqakuchu”, nispa.
12 Hinaptinmi warmiñataq nirqa: “Taytalláy, kay nisqaytawanyá uyariykullaway”, nispa. Davidñataqmi nirqa: “Niway”, nispa.
13 Hinaptinmi chay warmiqa Davidta nirqa: “¿Imanasqataq Diospa runankunata mana allinta ruwarurqanki?+ Churikita huklawman qarquruspaykim mana kutichimunkichu, rimasqaykiwanmi huchayuq kasqaykita qawachikuchkanki.+
14 Runaqa wañuqllam kanchik, pampaman yaku tallisqa hina chinkaruqllam kanchik. Diosqa manam runataqa wañuchinmanchu. Payqa yachanmi qarqusqa runa payman imanasqa kutirikunantaqa.
15 Kamachiqlláy, runakuna manchachiwaptinmi kaykunata willaykuqniki hamurqani. Ñuqam nikurqani: ‘Kamachiqwanyá rimaramusaq, ichapas mañakusqayta uyariykuwanman.
16 Ichapas kamachiq uyariykuwaspanqa wawayta hinaspa ñuqatapas harkaykuwanmanku mana imanawanankupaq. Chaynapi Diospa quwasqanku allpaykumanta mana qarquwanankupaq’, nispay.+
17 Qamqa Diospa angelnin hinam allin kaqtapas hinaspa mana allin kaqtapas yachanki. Chaymi nikurqani: ‘Kamachiqllayqa sunqullaytam tiyaykachinqa’, nispay. Taytáy, Jehova Diosyá qanwan kachun”, nispa.
18 Kamachiq Davidñataqmi chay warmita nirqa: “Ama imatapas pakaspaykim niwanayki kay tapusqayta”, nispa. Chay warmiñataqmi nirqa: “Kamachiqlláy, niykullaway”, nispa.
19 Davidñataqmi nirqa: “¿Joabchu kayta ruwanaykipaq yachachimusurqanki?”, nispa.+ Chay warmiñataqmi nirqa: “Kamachiqlláy, kay niwasqaykiqa chaynapunim. Yanapaqniki Joabmi yachachiwarqa imata ruwanaypaq hinaspa imata rimanaypaq.
20 Chaytaqa ruwarqa churikiwan allinyanakunaykipaqmi. Qamqa kamachiqlláy, Diospa angelnin hina yachayniyuq kaspaykim munaychakusqayki allpapi imapas pasakusqanta yachanki”, nispa.
21 Chaymantam Davidqa Joabta nirqa: “Nisqaykiman hinayá kachun.+ Rispayki Absalonta kutichimuy”, nispa.+
22 Joabñataqmi qunqurakuykuspan kumuykurqa, hinaspam kamachiq Davidta alabayta qallaykurqa. Hinaspam nirqa: “Taytalláy, mañakusqaytam uyariykuwanki. Chaywanmi yachani ruwasqaywan kusisqa kasqaykita”, nispa.
23 Joabqa Guesur llaqtata+ pasaspanmi Absalonta Jerusalenman kutirachimurqa.
24 Davidmi ichaqa nirqa: “Absalonqa wasinmanyá kutimuchun, manam ñuqamanqa asuykamuwanmanchu”, nispa. Chaynapim Absalonqa wasinman kutirqa, manam Davidmanqa rirqachu.
25 Israel runakunamantaqa manam pipas karqachu Absalon hina kuyayllapaq kasqanmanta alabasqa runaqa. Payqa chaki pampanmanta uma puyuqninkamam kuyayllapaq karqa.
26 Chukchan llasasqanraykum watapi huk kutita rutuchikuq. Ruturachikuptinmi kamachiqpa wasinpi pesoman hina chukchanqa llasaq yaqa iskay kilo partenta*.
27 Absalonpam karqa kimsa qari churinkuna+ hinaspa warmi churin Tamar, payqa karqa kuyayllapaqmi.
28 Absalonqa iskay watañam Jerusalenpi yacharqa*, chaywanpas manam kamachiq Davidmanqa rirqachu.+
29 Chaymi Absalonqa Joabta qayachirqa kamachiq Davidman rinanpaq, Joabmi ichaqa mana munarqachu. Absalonqa kaqmantam qayachirqa, chay kutipipas manam munarqachu.
30 Mana munaptinmi Absalonqa runankunata nirqa: “Chakraypa waqtanpi Joabpa cebadayuq chakrantayá kañaykamuychik”, nispa. Chaymi paykunaqa kañaykamurqaku.
31 Hinaptinmi Joabqa wasinta rispan Absalonta nirqa: “¿Imanasqataq runaykikuna cebadayta kañaykamunku?”, nispa.
32 Absalonñataqmi nirqa: “Qayachimuspaymi willachimurqayki: ‘Hamuy kamachiqta nipamuway, Absalonmi nisunki: “¿Imapaqtaq Guesur llaqtamanta hamurqani?+ Aswan allinchá kanman karqa wakllapi qipakamuyniyqa. Qamta qawaykuytam munani, imapas huchay kaptinqa wañurachiwayá”’”, nispa.
33 Joabñataqmi kamachiq Davidman rispan Absalonpa nisqanta willaykurqa. Hinaptinmi Davidqa Absalonta qayarachiptin ñawpaqninpi qunqurakuykuspa pampakama kumuykurqa. Chaymantam Davidqa Absalonta muchaykurqa.+
Willakuykuna
^ Utaq: “Taytanpa kapuqninkunawan qipaq”.
^ Utaq: “200 siclota”. Qaway B14 kaq yachachikuyta.
^ Utaq: “Tiyarqa”.
