2 Samuel 8:1-18
8 Chaymanta qipatam Davidqa Filistea runakunata munaychakururqa,+ hinaspam Meteg-ama allpankutapas hapikuykurqa.
2 Chaymantapas Moab runakunata+ hapiruspanmi kamachirqa pampapi chutarayanankupaq, hinaptinmi tupusqankuqa kimsa waska karqa. Iskay waskapa chayasqankamam wañuchisqa karqaku, wakinkuñataqmi mana.+ Moab runakunaqa Davidpa munaychakusqanñam karqaku, hinaptinmi mañakusqanta quqku.+
3 Davidqa Zoba nacionta+ kamachiq Hadadezerta hinaspa runankunatapas munaychakururqam Eufrates mayu lawpi allpankunata kutichikunanpaq richkaptin. Hadadezerqa karqa Reobpa churinmi.+
4 Davidmi qichururqa Hadadezerpa 1.700 caballopi silladankunata hinaspa 20.000 chakillawan riq soldadonkunata. Hinaspanmi carretata aysaq caballonkupa ankunkunata kuchururqa, 100 caballokunallapatañam manaqa.+
5 Damasco llaqtamantam+ Siria runakuna rirqaku Zoba nacionta kamachiq Hadadezerta yanapaq, hinaptinmi Davidqa wañurachirqa 22.000 runakunata.+
6 Chaymantam Davidqa Siria runakunapa Damasco llaqtanpi soldadokunata churarurqa, chaymi Siria runakunaqa Davidpa makinpiña kaspanku impuestota quqku. Davidtaqa Jehova Diosmi maymanña peleaq riptinpas yanapaq.+
7 Chaymantapas, Davidqa Hadadezerpa soldadonkunapa ruyru harkachikunanta qichuruspanmi Jerusalenman aparqa, chay harkachikunankuqa qurimantam karqa.+
8 Davidqa apakurqataqmi Beta hinaspa Berotai llaqtakunamanta achkallaña broncetapas, chay llaqtakunaqa karqa Hadadezerpa kamachisqan llaqtakunam.
9 Hamat llaqtata kamachiq+ Toimi uyarirurqa Hadadezerpa soldadonkunata David wañurachisqanta.+
10 Chaymi Toiqa churin Joramta kamachirqa Davidpa imayna kasqanta tapumunanpaq hinaspa Hadadezerpa runankunata wañuchisqanmanta alabaykunanpaq. Hadadezerqa achka kutikamam kamachiq Toiwan pelearqa. Joramqa Davidmanmi tukuy imata aparqa, chay apasqanqa karqa qullqimanta, qurimanta hinaspa broncemantam.
11 Tukuy chaykunatam kamachiq Davidqa Jehova Diospaq sapaqcharqa, munaychakusqan runakunapa quri-qullqinta sapaqchasqanman hina.+
12 Paykunaqa karqaku: Siria runakunam, Moab runakunam,+ Ammon runakunam, Filistea runakunam+ hinaspa Amalec runakunam.+ Sapaqcharqataqmi Zobata kamachiq Hadadezermanta+ qichumusqantapas.
13 Davidqa ancha riqsisqataqmi karqa 18.000 Edom runakunata wañurachisqanwanpas, wañurachirqaqa Kachi sutiyuq wayqupim.+
14 Edom runakunapa allpanpim Davidqa tukuy hinastinpi soldadokunata churarurqa, hinaptinmi Edom runakunaqa Davidpa makinpiña karqaku.+ Davidtaqa Jehova Diosmi maymanña peleaq riptinpas yanapaq.+
15 Davidqa hinallam Israel runakunapa kamachiqnin+ hinaspa jueznin karqa mana pimanpas sayapakuspan.+
16 Davidpa soldadonkunata kamachiqñataqmi karqa Zeruyapa wawan Joab.+ Ailudpa churin Jeosafatñataqmi+ karqa imapas pasasqanmanta qillqaq.
17 Sacerdotekunañataqmi* karqa Aitubpa churin Sadocwan+ Abiatarpa churin Aimelec. Serayañataqmi karqa kamachiqpa secretarion.
18 Jeoyadapa churin Benayañataqmi+ karqa Keret runakunapawan Pelet runakunapa+ kamachiqnin. Davidpa churinkunaqa autoridadkunam* karqaku.
Willakuykuna
^ Qaway kay palabrapa ima ninan kasqanta.
^ Hebreo rimaypiqa nichkan: “Sacerdotekunam”, nispam.
