Eclesiastes 1:1-18
1 Yachachiqpa* rimasqankuna,+ payqa Davidpa churinmi, Jerusalenpi kamachiqmi.+
2 Yachachiqmi nin: “¡Tukuy imapas yanqam!
¡Tukuy imapas chinkaruqllam! ¡Tukuy imapas yanqallam!”, nispa.+
3 ¿Imatataq runaqa tukuy imapi llamkasqanmanta chaskikunman?
¿Imatataq runaqa chaskikunman kay pachapi* llumpayta llamkasqanmanta?+
4 Huk miray wañuptinpas huk miraymi rikurimun,kay allpa pacham ichaqa wiña-wiñaypaq kanqa.+
5 Intiqa qispimuspanmi siqaykun,chaymantam maymi lluqsimunanman chaylla kutispan kaqmanta lluqsimun.+
6 Wayrapas sur lawman rispanmi norte lawman muyumun.
Wayraqa mana sayaykuspam muyun, wayraqa hinallam muyuchkan.
7 Llapallan mayukunam lamar quchaman rin, lamar qucham ichaqa mana huntanchu.+
Mayukunam maymi kasqanman kutispa kaqmanta kallpamun.+
8 Manaña imatapas niyta atinankamamrunataqa tukuy ima amichin.
Ñawiqa imatapas qawaspanqa manam aminchu,rinripas imatapas uyarispanqa manam aminchu.
9 Imapas kaqkunaqa hinallam kanqa,imapas ruwasqa kaqqa kaqmantam ruwasqa kanqa.
Manam imapas musuqqa kanchu kay allpa pachapiqa.+
10 ¿Yaqachu imapas kanman “kayqa musuqmi” ninapaq hina?
Chayqa ñawpaqmantaraqmi karqa,manaraq kachkaptinchikpas karqañam.
11 Ñawpaq tiempopi runakunataqa manañam pipas yuyanchu.
Chaymanta qipa wiñaykunatapas manañam pipas yuyanqachu.
Paykunatapas manañam yuyanqakuñachu qipa wiñaykunapas.+
12 Ñuqa yachachiqmi Israel runakunata Jerusalenmanta kamachirqani.+
13 Kay pachapi tukuy ima ruwasqankuta yachaywan+ sumaqta entiendenaypaqmi hinaspa sumaqta yachanaypaqmi tukuyta ruwarqani.+ Diospa nisqanman hina runakunapa tukuy ima ruwasqantamá allinta yacharqani.
14 Kay pachapi runakunapa tukuy ima ruwasqanta qawaspaymi yacharurqani tukuy imapas yanqalla kasqanta,wayrata qatikachay hinalla kasqanta.+
15 Qiwisqa kaqtaqa manam derechayta atichwanchu.
Mana kaqtaqa manam yupayta atichwanchu.
16 Chaymi sunquypi nirqani: “Jerusalenpi ñuqamanta ñawpaqta yachaqkunamantapas* aswan yachayniyuqmi rikuriruni.+ Sunquypipas allin yuyayniyuq kaytawan allin yachayniyuq kaytam hayparuni”, nispa.+
17 Yachayniyuq kaytam entiendeyta qallaykurqani, yanqakuna ruway imayna kasqantam yacharurqani, mana yuyayniyuq kay imayna kasqantam yacharurqani.+ Chaykunapas wayrata qatikachay hinallam.
18 Ancha yachayniyuq kayqa uma nanaytam apamun,aswan yachayniyuq kaqqa astawanmi ñakarin.+
Willakuykuna
^ Hebreo rimaypiqa nichkan: “Huñuqpa”, nispam.
^ Hebreo rimaypiqa nichkan: “Intipa urayninpi”, nispam. Kay rimayqa 29 kutikamam Eclesiastes libropiqa rikurichkan.
^ Utaq: “Kamachiqkunamantapas”.
