Exodo 24:1-18
24 Chaymantam Diosqa Moisesta nirqa: “Ñuqa Jehova Diosman kutimuspaykim Aaronta, Nadabta hinaspa Abiuta+ pusamunki. Pusamunkitaqmi Israelpa mirayninpi 70 punta apaqkunatapas. Hamuspaykichikqa karullamantaraqmi kumuykamunaykichik.
2 Ichaqa qamllam ñuqa Jehova Diosmanqa asuykamuwanki, amam wakiqnikichikqa. Manataqmi Israelpa mirayninkunaqa qispimunankuchu”, nispa.+
3 Hinaptinmi Moisesqa Jehova Diospa lliw nisqankunata hinaspa kamachisqankunata Israelpa mirayninkunaman willaq rirqa.+ Israelpa mirayninkunañataqmi nirqaku: “Jehova Diospa kamachisqankunataqa lliwtam kasukullasaqku”, nispa.+
4 Chaymantam Moisesqa qillqarqa Jehova Diospa lliw rimasqanta.+ Paqarinnin tutapaytañataqmi hatariruspan urqupa sikinpi Diospaq animalta kañananpaq altarta ruwarqa, sayachirqataqmi 12 rumikunatapas, sapa rumim karqa Israelpa 12 ayllunkunaman hina.
5 Chaymantam Moisesqa musukunata akllarqa, hinaptinmi chay musukunaqa Jehova Diospaq animalkunata nakapuspa kañapurqaku, nakapurqakutaqmi torokunatapas Dioswan hawkalla kasqankurayku.+
6 Moisesñataqmi wakin yawarta altarman challarqa, wakintañataq tazonkunaman chaskirqa.
7 Hinaspapas Diospa kamachikuyninkuna qillqasqan* librotam kallpawan leerqa Israelpa lliw mirayninkunapaq.+ Paykunañataqmi nirqaku: “Jehova Diospa kamachisqankunataqa lliwtam kasukullasaqku”, nispa.+
8 Hinaptinmi Moisesqa Israelpa mirayninkunata yawarwan challaspan+ nirqa: “Kay yawarqa Jehova Dioswan kunan contrato* ruwasqanchik valorniyuq kananpaqmi”, nispa.+
9 Chaymantam Moisesqa Aaronwan, Nadabwan, Abiuwan hinaspa Israelpa mirayninpi 70 punta apaqkunapiwan urquman qispirqa.
10 Chaypim Diosta llapanku rikurqaku.+ Diospa sayasqanqa kasqa suma-sumaq alaqa azul* rumi hina hinaspa kichasqa cielo hinam.+
11 Chaytaqa musquyninkupi hinam* qawarqaku, hinaspapas saksanankukamam mikurqaku. Diosqa manam imanarqachu chay runakunataqa.+
12 Chaymantam Jehova Diosqa Moisesta nirqa: “Kay ñuqapa kasqay urquman hamuspayá kaypi kay. Israelpa mirayninkunata yachachinaypaqmi qillqasaq tabla rumipi kamachikuykunata, hinaspam qusqayki”, nispa.+
13 Chaymi Moisesqa yanapaqnin Josueypiwan urquman rinanpaq alistakurqa,+ hinaspanmi Moisesqa urquman qispirqa.+
14 Ichaqa manaraq qispichkaspanmi punta apaqkunata nirqa: “Kayllapi kachkaychik kutimunaykukama.+ Hurwan Aaronqa hinallapim kanqaku,+ chaymi pipapas sasachakuynin kaptinqa paykunaman asuykunqa”, nispa.+
15 Urquman Moises qispiptinmi puyupas tapaykurqa.+
16 Sinai urqupiqa Jehova Diospa ancha atiyninmi sutilla karqa,+ chay urqutam suqta punchawpuni puyu taparurqa. Qanchis kaq punchawpiñataqmi puyu ukumanta Moisesta Dios qayamurqa.
17 Israelpa mirayninkunaqa Jehova Diospa ancha atiynintam urqupa puntanpi rikurqaku manchakuypaq ninata hina.
18 Moisesqa urquman qispispanmi puyu ukuman yaykurqa,+ hinaspam chaypi karqa 40 punchaw hinaspa 40 tuta.+
