Exodo 30:1-38
30 Chaymantapas Diosqa nirqam: “Acacia sachamantam+ incienso* kañana altarta ruwanki.+
2 Chayqa kanan cajon hina tawa waqtayuqmi, sapa waqtanmi kanan yaqa parte metro*, sayayninñataqmi kanan yaqa metro*. Chay incienso kañana altarpa tawan esquinanpi waqrachankunaqa huk piezallamanta ruwasqam kanan.+
3 Quriwanmi llusinki hawanta, patanpi waqrakunata hinaspa muyuriq waqtankunata. Dibujoyuq quritataqmi laqanki muyuriq patankunapipas.
4 Chay patanpa urayninpim rinrinkunata churanki, chaynapi kaspikunata ustuchispa apanaykichikpaq.
5 Chay ustuchinayki kaspikunaqa acacia sachamantam kanan, hinaspapas quriwan llusisqam kanan.
6 Chay ruwasqayki incienso kañana altartaqa baulniyta+ rakiq hatun cortinapa ñawpaqninpim churanki, qanman rikurinay chay baulpa tapanpa ñawpaqnin lawpim churanki.+
7 Chay incienso kañana altarpa hawanpim+ Aaronqa+ inciensota quntichinan.+ Chaytaqa sapa tempranom quntichinan mecherokunata alistaq rispan.+
8 Inti siqaykuyta achki ratachiq yaykuspanpas Aaronqa inciensotam quntichinan. Chaytaqa ñuqa Jehova Diospaqmi quntichinan, sapa kutim chaytaqa miraynikichikkunapas quntichinan.
9 Chay incienso kañana altarpiqa amam quntichinkichikchu mana kamachisqaytaqa,+ amam ima animaltapas kañankichikchu, nitaq kawsaykunamanta qusqaykichik ofrendatapas*. Amataqmi ñuqapaq tallinaykichik kaqtaqa tallinkichikchu.
10 Watapim huk kutillata Aaronqa incienso kañana altarta chuyanchanan.+ Chaypaqqa yawartam waqrankunaman llusinan, chay yawarqa kanan huchayuq kasqaykichikmanta nakasqaykichik animalpa wakin yawarninmi.+ Chaytaqa watapi huk kutitam ruwanaykichik qamkunapas hinaspa miraynikichikkunapas. Chay altarqa chuyay-chuyaymi ñuqa Jehova Diospaqqa kanan”, nispa.
11 Chaymantapas Jehova Diosqa Moisestam nirqa:
12 “Israelpa mirayninkuna pikuna hinaspa hayka kasqankuta yachanaykipaq listata ruwaptikiqa+ sapakamam mana wañurunankupaq ñuqa Jehova Diospaq qullqita qunanku. Chayta ruwaspankuqa manam ima sasachakuypipas kanqakuchu.
13 Yupasqa kanankupaq lliw asuykuqkunam yaqa suqta gramo* qullqita qunanku. Chay suqta gramoqa carpaypi tantiasqa llasaypa partellanmi*.+ Paykunaqa suqta gramo qullqitam ñuqa Jehova Diospaq qunanku.+
14 Ñuqa Jehova Diospaqmi chayna qullqita qunanku 20 watayuqmanta hanayman lliw yupasqa kaqkuna.+
15 Apupas wakchapas hina chaynallatam qullqitaqa qunanku, chay qullqiqa mana wañurunankupaq ñuqa Jehova Diosman qunanku qullqim.
16 Israelpa mirayninkunapa qusqanku chay qullqita chaskispaykim carpaypa imanpaqpas churanki. Chay qullqiqa Israelpa mirayninkunata ñuqa Jehova Dios mana wañuchisqayta yuyarinapaqmi”, nispa.
17 Jehova Diosqa nirqataqmi:
18 “Ruwankitaqmi broncemanta mayllakunapaq lavatoriotapas chaynataq tiyanantapas,+ hinaspam churanki altarmanta carpayman rinapi. Hinaspañataqmi lavatorioman yakuta huntachinki.+
19 Chaypim Aaronwan churinkunaqa makinkuta hinaspa chakinkuta mayllakunanku.+
20 Chay yakuwanmi mayllakunanku carpayman yaykunankupaq hinaspa altarpi ñuqa Jehova Diospaq imatapas kañanankupaq. Mana mayllakuspankuqa wañunqakum,
21 mana wañurunankupaqqa makinkutawan chakinkutam mayllakunanku. Chayqa Aaronpaqwan mirayninkunapaq una-unaypaq kamachikuymi”, nispa.+
22 Moisestaqa Jehova Diosqa nirqataqmi:
23 “Chaymantañataqmi huñunki kichkayuq sachapa miski asnaq wiqinta* suqta kilota, huñunkitaqmi kimsa kilo miski asnaq canelatapas, kimsa kilo miski asnaq quratapas*,
24 huk rikchaq suqta kilo canelatapas* chaynataq aceitunasmanta hurqusqa yaqa tawa litro* aceitetapas. Tukuy chaytaqa huñunki carpaypi tantiasqa llasayman hinam.+
25 Tukuy chaykunawanmi sumaqta chapuspa* aceiteta ñuqapaq ruwanki.+ Chayqa akllasqa runakunaman tallinapaq miskillaña asnaq aceitem kanan.
26 Ñuqapaq sapaqchanaykipaqmi chay aceiteta tallinki carpayman,+ baulniyman,
27 carpaypi kaq mesaman hinaspa servicionkunamanpas, candelabromanpas chaynataq servicionkunamanpas. Chay aceitetaqa tallinkitaqmi incienso kañana altarmanpas,
28 huknin altarmanpas, servicionkunamanpas, lavatoriomanpas chaynataq tiyananmanpas.
29 Chaynatam lliwta sapaqchanki ñuqapaq chuyay-chuyay kananpaq.+ Pipas chaykunata llachpaykuqqa ñuqapaq sapaqchasqam kanan.+
30 Chaymantapas Aarontawan+ churinkunata+ akllaspaykim ñuqapaq sapaqchanki sacerdoteykuna kanankupaq.+
31 Chaymantapas Israelpa mirayninkunatam ninki: ‘Kaymi tallinapaq sapaqchasqay aceite kanqa lliw miraynikichikkunapaq.+
32 Amam pipas chay aceitewanqa llusikunqachu, amataqmi chayman rikchakuq huk aceitetaqa ruwankichikchu. Chay aceiteqa ñuqapaq sapaqchasqam kanan.
33 Pipas chayman rikchakuq huk aceiteta ruwaruspanqa hinaspa mana akllasqa kaqman* llusiruspanqa wañuchisqam kanqa’”, nispa.+
34 Jehova Diosqa nirqaraqmi: “Huñuytaq molle hina* sachapa hinaspa huk sachapa* miski asnaq wiqintapas, hinojo hinapa* chaynataq sachapa miski asnaq yuraq wiqintapas*.+
35 Tukuy chaykunawanmi quntichinapaq inciensota sumaqta ruwanki,+ hinaspam kachita hinanki.+ Chayqa ñuqapaq sapaqchasqam kanan.
36 Lliwta hukllawaruspam wakinta ñutuy-ñutuyta kutanki, hinaspam kutasqaykimanta wakinta ñuqapa rikurinay baulniypa ñawpaqninman churanki. Chay quntichina inciensoqa ñuqapaq sapaqchasqam kanan.
37 Amam chaynataqa qamkunapaqqa ruwakunkichikchu.+ Chay quntichina inciensoqa ñuqa Jehova Diosllapaq sapaqchasqam kanan.
38 Pipas kikinpaq chayna inciensota ruwaruspanqa wañuchisqam kanqa”, nispa.
Willakuykuna
^ Kayqa karqa miski asnaq kutacha hinam.
^ Utaq: “Huk kuchus”. Qaway B14 kaq yachachikuyta.
^ Utaq: “Iskay kuchus”.
^ Kaytaqa kutasqata utaq imatapas ruwaspam quqku.
^ Utaq: “Parte siclo”. Qaway B14 kaq yachachikuyta.
^ Utaq: “20 guerallam”. Qaway B14 kaq yachachikuyta.
^ Utaq: “Mirrata”.
^ Utaq: “Calamotapas”.
^ Utaq: “Casiatapas”.
^ Utaq: “Huk hin”. Qaway B14 kaq yachachikuyta.
^ Utaq: “Perfumekunata sumaqta ruway yachaqpa ruwasqanta hina”.
^ Utaq: “Mana Aaronpa ayllun kaqman”.
^ Utaq: “Estacte”.
^ Utaq: “Uña aromaticapa”.
^ Utaq: “Galbanopa”.
^ Utaq: “Chuya olibano”.
