Exodo 34:1-35
34 Chaymantam Jehova Diosqa Moisesta nirqa: “Chamqarusqayki iskay tabla rumikunata hinayá ruway.+ Chaypim ñutusqayki+ rumikunapi punta qillqasqayta hina kaqmanta qillqasaq.+
2 Chaypaqyá Sinai urquman paqarin qispinaykipaq qipichakuy, hinaspam urqu puntanpi ñuqaman asuykamuwanki.+
3 Manam pipas qanwan kuskaqa hamunanchu, manataqmi Sinai urqupiqa pipas michinanchu ovejatapas nitaq vacatapas”, nispa.+
4 Chaymi Moisesqa ruwarqa iskay tabla rumikunata punta tabla rumikunata hina. Hinaspam paqarintin tutapayta hatariruspan Jehova Diospa kamachisqanman hina Sinai urquman qispirqa, aparqataqmi llaqllasqan iskay tabla rumikunatapas.
5 Hinaptinmi Jehova Diosqa Moisesman puyupi rikuriykurqa.+ Chaypim Jehova Diosqa imayna Dios kasqanta Moisesman willarqa.+
6 Jehova Diosmi Moisesman rikuriykuspan nirqa: “Ñuqa Jehova Diosqa kani llakipayarikuqmi,+ ñuqa Jehova Diosqa kani kuyapayakuqmi,+ mana chaylla piñakuqmi,+ imaña kaptinpas ancha kuyakuqmi,+ mana llullakuqmi,+
7 achkallay-achka runakunata kuyaqmi*,+ mana allin ruwaqta pampachaykuqmi, mana kasukuqtawan huchallikuqta pampachaykuqmi.+ Mana kasukuspa hinalla huchallikuqtam ichaqa castigan,+ chaymantapas taytankupa huchanmantam churinkunata, willkankunata hinaspa paykunapa churinkutapas sasachakuypi saqin”, nispa.+
8 Hinaptinmi Moisesqa chaylla qunqurakuykuspan pampakama kumuykurqa.
9 Hinaspam nirqa: “Kuyawaspaykiqa Jehova Dioslláy amayá saqirullawaykuchu.+ Manaña kasukuq kaptiykupas+ Jehova Dioslláy amayá saqirullawaykuchu, huchaykuta pampachaykuwaspaykikuyá kuyasqayki runaykikunata hina chaskiykullawayku”, nispa.+
10 Diosñataqmi nirqa: “Kunanmi qamkunawan contratota* ruwasaq, ñuqam qamkunapaq ruwasaq pipapas mana ruway atisqanta, kay pachapipas utaq may llaqtapipas mana pipapas ruway atisqantamá ruwasaq.+ Ñuqa Jehova Diospa manchakuypaq ruwasqaykunatam qunay allpapi runakuna qawanqaku.+
11 Allinta uyariy imam nisqayta.+ Qawachkaptikim qarqusaq Amorreo runakunata, Canaan runakunata, Het runakunata, Perizita runakunata, Hev runakunata hinaspa Jebus runakunata.+
12 Qunay allpapi yachaq* runakunawanqa amam imata ruwanaykipaqpas tantianakunkichu,+ manachayqa sasachakuypim kanki.+
13 Aswanqa altarninkutam taqmanki, yupaychanankupaq sayachisqanku ruminkutam ñutupanki, hinaspapas sayachisqanku kullunkutam pakipanki.+
14 Amam taytachakunapa ñawpaqninpiqa kumuykunkichu.+ Ñuqa Jehova Diosqa ñuqallata yupaychawanaykichiktam munani, arí, ñuqa Diosllata yupaychawanaykichiktam munani.+
15 Qunay allpapi yachaq runakunawanqa amam imata ruwanaykipaqpas tantianakunkichu. Paykunaqa taytacha-mamachankuta yupaychaspam huchallikunku, hinaspam taytachankupaq imatapas nakapunku,+ hinaptinmi nakapusqankuta hukkaqnin quykusuptikichik mikuruwaqchik.+
16 Hinaspañataqmi qari churikichikkunata paykunapa warmi churinkuwan casarachiwaqchik,+ hinaptinmi chay warmikunañataq taytacha-mamachankuta yupaychachispa churikichikta huchallichinmanku.+
17 Amam chulluchisqa fierromanta taytacha-mamachataqa ruwankichikchu.+
18 Yuyarinaykichiktaqmi mana levadurayuq tanta ruwana hatun punchawtapas*.+ Kamachisqayman hinam chay punchawpiqa mana levadurawan ruwasqa tantata mikunkichik. Qanchis punchawpunim chaytaqa abib* killapi mikunkichik,+ chay killapim Egiptomanta lluqsimurqankichik.
19 Llapallan piwi* qari churikichikmi ñuqapaq kanqa.+ Ñuqapaqtaqmi kanqa vacaykichikpa, ovejaykichikpa chaynataq cabraykichikpa punta naceq urqu uñanpas.+
20 Punta naceq asnoykichikpa rantinpim ovejata quwankichik, mana quspaqa asnoykichiktam matankanpi* wañuqpaq waqtankichik. Chaymantapas lliw piwi churikichikpa+ rantinpim imallatapas quwanaykichik, amam hinallaqa asuykamuwankichikchu.
21 Suqta punchawmi imapas ruwanaykichiktaqa ruwankichik, qanchis kaq punchawpim ichaqa yapunaña utaq kawsay huñunaña kaptinpas samanaykichik*.+
22 Watan-watanmi yuyarinaykichik cosecha qallariy hatun punchawta*, chaytaqa yuyarinaykichik trigopa punta kaq rurunta ñuqaman quwaspaykichikmi. Chaymantapas wata tukuytam yuyarinaykichik cosecha tukuy hatun punchawta*.+
23 Llapallan qarikunam watapi kimsa kutita ñuqa Jehova Diosnikichikman asuykamuwanaykichik.+
24 Qawachkaptikichikmi huklaw llaqtayuq runakunata qarqusaq,+ hinaptinmi allpaykichikqa hatun kanqa. Watapi kimsa kutita ñuqa Jehova Dios yupaychaq hamunaykichikkamaqa manam pipas allpaykichiktaqa hapikuykunqachu.
25 Animalta ñuqapaq nakaspaykichikqa amam yawarnintaqa imapas levadurawan ruwasqa kaqtawan kuskataqa quwankichikchu.+ Pascua punchawpi carnerota utaq chivochata nakaspaykichikqa amam paqarintinpaqqa churankichikchu.+
26 Ñuqa Jehova Diospa wasiymanmi allinnin kaq punta qispiq rurukunata apamuwankichik.+
Amam uña cabrachataqa mamanpa lechenpiqa yanunkichikchu”, nispa.+
27 Jehova Diosqa Moisestaqa nirqataqmi: “Kay nisqaykunatayá qillqay,+ kunan rimasqayman hina kananpaqmi qanwan hinaspa Israelpa mirayninkunawan contratota ruwachkanchik”, nispa.+
28 Moisesqa chaypim Jehova Dioswan karqa 40 punchaw hinaspa 40 tuta, manam imallatapas mikurqachu nitaq tomarqachu.+ Diosñataqmi chay contrato ruwasqankuta tabla rumikunapi qillqarqa, chay qillqasqanqa chunka kamachikuykunam karqa.+
29 Chaymantam Moisesqa Sinai urqumanta kutimurqa Diospa qillqasqan iskaynin tabla rumikunata aparikuspan.+ Hinaptinmi Dioswan rimarusqanrayku uyan kancharirqa, Moisesmi ichaqa mana musyakurqachu.
30 Aaronwan Israelpa mirayninkunañataqmi qawarqaku Moisespa uyan kancharisqanta, chaymi payman asuykuytaqa manchakurqaku.+
31 Moisesñataqmi Aaronta hinaspa Israelpa mirayninkunapi kamachiqkunata qayachirqa, hinaspam paykunawan huñunakuspa rimarqa.
32 Israelpa lliw mirayninkuna asuykuptinñataqmi Sinai urqupi Jehova Diospa kamachikuykuna qusqanta willarqa.+
33 Paykunawan rimayta tukuruspanñataqmi Moisesqa uyanta telawan tapakurqa.+
34 Jehova Dioswan rimaq yaykuspanmi ichaqa mana tapakuqchu rimayta tukunankama.+ Lluqsiramuspanñataqmi Diospa kamachisqankunata Israelpa mirayninkunaman willaq.+
35 Israelpa mirayninkunañataqmi Moisespa uyan kancharisqanta qawaqku. Hinaptinmi Moisesqa kaqmanta uyanta tapakuq Dioswan rimaq yaykunankama.+
Willakuykuna
^ Kaypiqa rimachkan imaña kaptinpas hinalla kuyasqanmantam.
^ Utaq: “Pactota”. Qaway kay palabrapa ima ninan kasqanta.
^ Utaq: “Tiyaq”.
^ Utaq: “Fiestatapas”.
^ Qaway B15 kaq yachachikuyta.
^ Utaq: “Punta naceq”.
^ Utaq: “Kunkanpi”.
^ Utaq: “Sabado punchawpaq kamachisqayta kasukunkichik”.
^ Utaq: “Semanantin fiestata”.
^ Utaq: “Ramadakuna ruway fiestata”.
