Exodo 37:1-29
37 Chaymantam Bezalelqa+ acacia tablamanta Diospa baulninta ruwarqa.+ Chay baulpa largonmi karqa huk metro masnin*, anchonñataqmi karqa parte metro masnin*, sayayninpas karqa parte metro masninmi.+
2 Hinaspam chay baulta hawantawan ukunta quriwan llusirqa, hinaspapas muyuriq patanpim dibujoyuq qurita laqarqa.+
3 Chaymantapas tawan chakinpa hanayllanpim rinrinta churarqa, kaylawninpim iskayta churarqa, waklawninpipas chayna iskaytataqmi churarqa.
4 Chaymantapas acacia sachamanta kaspikunata ruwaspam quriwan llusirqa.+
5 Hinaspanmi chay kaspikunataqa baulpa rinrinman ustuchirqa baulta apanankupaq.+
6 Chaymantapas baulpa tapantam qurimanta ruwarqa.+ Chay tapapa largonmi karqa huk metro masnin*, anchonñataqmi karqa parte metro masnin*.+
7 Chaymantapas iskay querubin angelkunatam+ martillowan takaspa qurimanta ruwarqa. Chay angelkunaqa baulpa tapanpim chimpa-chimpa karqa.+
8 Chay angelkunaqa kaylaw patanpi hinaspa waklaw patanpim karqa. Chaynatam sapa patanpi querubin angelkunata churarqa.
9 Chay angelkunapa rapranqa hanayninpaman kichasqam karqa baulpa tapanta llantuchkaq hina.+ Chimpa-chimpa kaspam kumuykuspa baulpa tapanta qawarqaku.+
10 Ruwarqataqmi acacia sachamanta mesatapas,+ largonmi karqa yaqa metro*, anchonñataqmi karqa yaqa parte metro*, sayayninñataqmi karqa parte metro masnin*.+
11 Hawantawan ukuntam quriwan llusirqa, hinaspapas muyuriq patanpim dibujoyuq qurita laqarqa.
12 Muyuriq patanpim churarqa tawa dedo sayayniyuq* tablata, hinaspam chay muyuriq patanpi dibujoyuq qurita laqarqa.
13 Chaymantapas tawan chakinpa hanayninpim qurimanta rinrinta churarqa.
14 Chay qurimanta rinrinqa mesapa patanpa urayninpim karqa, rinrinqa karqa kaspita ustuchispa mesata apanankupaqmi.
15 Chay kaspikunaqa acacia sachamanta quriwan llusisqam karqa, chay kaspiwanmi mesataqa apananku karqa.
16 Chaymantapas ruwarqam qurimanta platokunata, vasokunata, puyñukunata hinaspa Diosman quspa imapas tallina tazonkunata.+
17 Ruwarqataqmi qurimanta candelabrotapas.+ Chayqa martillowan takaspa ruwasqam karqa, hinaspapas huk piezallamanta ruwasqam karqa. Chay candelabropaqa karqam tiyanan hinaspa kaspin, karqataqmi llaqllasqa waytankuna, waytapa umpankuna hinaspa umpapa sikinpi kaq llaqinkunapas*.+
18 Chullallamantam suqta pallqayuq karqa, sapa waqtanpim kimsa pallqa karqa.
19 Huknin waqtanpim sapa kallmapi almendras wayta hina llaqikuna llaqllasqa karqa, llaqllasqataqmi karqa kimsa umpakunapas chaynataq kimsa waytakunapas, chaykunaqa lliwmi chullachisqa karqa. Chaynallataqmi huknin waqtanpipas karqa. Chaynam candelabropa suqtantin pallqankunaqa karqa.
20 Kaspinpipas almendras wayta hinam tawa llaqikuna llaqllasqa karqa, llaqllasqataqmi karqa tawa umpakunapas chaynataq tawa waytakunapas, chaykunaqa lliwmi chullachisqa karqa.
21 Qallariq iskay pallqakunapa urayninpim karqa huk umpa, qatiqnin iskay pallqakunapa urayninpipas karqam huk umpa, chaynallataqmi hina qatiqnin pallqakunapa urayninpipas karqa huk umpa. Chayna ruwasqam karqa suqtantin pallqakuna.
22 Waytapa umpankunaqa, pallqakunaqa hinaspa candelabroqa huk piezallamantam qurimanta ruwasqa karqa, hinaspapas martillowan takaspa ruwasqam karqa.
23 Ruwarqataqmi qurimanta qanchis mecheronkunatapas,+ achki wañuchinakunatapas chaynataq sansa apanakunatapas.
24 Candelabrota hinaspa servicionkunatapas 34 kilo masnin* quriwanmi ruwarqa.
25 Chaymantapas acacia tablamantam ruwarqa incienso* kañana altarta.+ Chayqa tawa waqtayuqmi karqa, sapa waqtanmi karqa yaqa parte metro*, sayayninñataqmi karqa yaqa metro*. Chay incienso kañana altarpa waqrachankunaqa huk piezallamantam karqa.+
26 Quriwanmi llusirqa hawanta, esquinanpi waqrankunata hinaspa muyuriq waqtankunatapas. Muyuriq patanpipas dibujoyuq quritataqmi laqarqa.
27 Chay patanpa urayninpim rinrinkunata churarqa, chaynapi kaspikunata ustuchispa apanankupaq.
28 Chay ustuchinanku kaspikunataqa acacia sachamantam ruwarqa, hinaspapas quriwanmi llusirqa.
29 Chaymantapas ruwarqam akllasqa runakunaman tallinapaq miskillaña asnaq aceiteta+ hinaspa quntichinapaq inciensota.+ Chaykunaqa sumaq ruwasqam* karqa.
Willakuykuna
^ Utaq: “Iskay kuchus parten”. Qaway B14 kaq yachachikuyta.
^ Utaq: “Huk kuchus parten”.
^ Utaq: “Huk kuchus parten”.
^ Utaq: “Iskay kuchus parten”.
^ Utaq: “Huk kuchus parten”.
^ Utaq: “Huk kuchus”.
^ Utaq: “Iskay kuchus”.
^ Kayqa karqa yaqa qanchis centimetro partenmi. Qaway B14 kaq yachachikuyta.
^ Utaq: “Rapinkunapas”.
^ Utaq: “Huk talento”. Qaway B14 kaq yachachikuyta.
^ Kayqa karqa miski asnaq kutacha hinam.
^ Utaq: “Huk kuchus”.
^ Utaq: “Iskay kuchus”.
^ Utaq: “Perfumekunata sumaqta ruway yachaqpa ruwasqan hinam”.
