Hechos 16:1-40
-
Timoteota Pablo akllasqanmanta (1-5)
-
Macedonia lawmanta runata musquypi hina Pablopa qawasqanmanta (6-10)
-
Filipos llaqtapi Lidia sutiyuq warmi bautizakusqanmanta (11-15)
-
Pablota hinaspa Silasta carcelman churasqankumanta (16-24)
-
Carcel cuidaq wasinpi kaqkunapiwan bautizakusqankumanta (25-34)
-
Pablo pampachaykunanpaq autoridadkuna mañakusqankumanta (35-40)
16 Chaymantam chayarurqa Derbe llaqtamanwan Listra+ llaqtaman. Chaypim karqa Jesuspa qatiqnin Timoteo,+ payqa Diospi iñiq judia warmipa wawanmi karqa, taytanñataqmi karqa Grecia nacionniyuq.
2 Timoteomantam allinta rimaqku Listra llaqtapiwan Iconio llaqtapi iñiqkuna.
3 Timoteo riysinanta munaspanmi Pabloqa qari kayninpi señalarurqa. Llapa judiokunaqa yacharqakum+ Timoteopa taytanqa Grecia nacionniyuq kasqanta.
4 Viajaspankum sapa llaqtakunaman chayaspa Jerusalenpi apostolkunapa hinaspa iñiqkunapi punta apaqkunapa* tantiasqanku kamachikuykunata qurqaku iñiqkuna kasukunanpaq.+
5 Chayraykum iñiqkunaqa iñiyninkupi aswan-aswan allin karqaku hinaspa sapa punchaw astawan achkayarqaku.
6 Chaymantapas Asia provinciapi Diospa palabranta willakunankuta Diospa atiynin* harkakusqanraykum Frigia lawnintawan Galacia+ lawninta rirqaku.
7 Chaymantapas Misiaman chayaruspankum Bitinia+ lawman yaykuyta munarqaku, ichaqa Jesusmi Diospa atiyninwan harkarurqa.
8 Chaymi Misianta pasaruspanku Troas llaqtaman rirqaku.
9 Tutañataqmi musquypi hina* qawaspan Pablo rikururqa Macedoniamanta kaq runata, chay runam ruegaspan nirqa: “Macedoniaman hamuspaykiyá yanapaykuwayku”, nispa.
10 Chay rikurusqan qipallatam Macedoniaman rinaykupaq kallpanchakurqaniku, ñuqaykuqa entienderurqanikum sumaq willakuyta paykunaman willakunaykupaq Diospa qayachiwasqankuta.
11 Chayraykum Troasmanta botepi rirqaniku Samotracia islakama, paqarintinñataqmi rirqaniku Neapolis llaqtaman,
12 chay llaqtamantañataqmi rirqaniku Roma nacionpa Filipos+ llaqtanman, chay llaqtaqa karqa Macedonia distritopi ancha riqsisqa llaqtam, hinaspam chaypi iskay-kimsa punchaw qipakurqaniku.
13 Samana punchawtañataqmi* llaqtapa punkunman lluqsispayku mayupa patanman rirqaniku Diosta mañakunapaq sitio kasqanta piensaspayku, hinaspam tiyaykuspayku chaypi huñunasqa warmikunaman yachachiyta qallaykurqaniku.
14 Chaypim uyarichkarqa Tiatira+ llaqtamanta Lidia sutiyuq warmi, paymi rantikuq* morado pachakunata hinaspapas Diosta yupaychaqmi karqa, Jehova* Diosmi sunqunta kichaykurqa Pablopa rimasqankunata allinta uyarinanpaq.
15 Wasinpi llapallan kaqkunapiwan bautizakuruspanmi+ ruegawarqaku: “Jehova* Diosman sunqu kasqayta piensaspaykichikqa wasiypi samakamuychik”, nispa. Hinaptinmi ruegawaptinku wasinman rirqaniku.
16 Chaymantañataqmi Diosta mañakuna sitioman richkaspayku tuparurqaniku adivinaq espirituyuq+ sirvienta sipaswan, payqa demonioyuq kaspanmi ima pasananmanta adivinaspan patronninkunata achkallataña ganachiq.
17 Chay sipasmi Pablotawan ñuqaykuta qatiwaspanku qayaykachakuspa+ kaynata nirqa: “Kay runakunaqa hanaq pacha Diosta serviqkunam, paykunaqa salvakunaykichikpaq ñanmantam willasuchkankichik”, nispa.
18 Chaynatam qayaykachaq achka punchaw, hinaptinmi amiruspan Pabloqa muyuriykuspan chay sipaspi demoniota nirqa: “Jesucristopa sutinpim kamachiki kay sipasmanta lluqsinaykipaq”, nispa. Hinaptinmi chay demonioqa chaylla lluqsirurqa.+
19 Qullqi ganachiqninku manaña kaptinmi+ chay sipaspa patronninkunaqa Pablotawan Silasta hapiruspanku pampanta aysarqaku plazapi autoridadkunaman.+
20 Chaymi llaqtapi kamachiqkunaman pusaruspanku nirqaku: “Kay judiokunam llaqtanchikpi llumpay chaqwata ruwachkanku,+
21 hinaspam nichkanku mana ruwananchik costumbrekunata ruwanapaq, ñuqanchikqa Roma nacionniyuqmi kanchik, manam chaykunataqa ruwachwanchu”, nispa.
22 Chaymi llapa runakuna Pablopawan Silaspa contranpi hatarirurqaku, llaqtapi kamachiqkunañataqmi paykunapa pachanta llatanaruspanku kamachirqaku kaspikunawan maqapanankupaq.+
23 Llumpayta maqaparuspankum carcelman hinarurqaku, hinaspam carcel cuidaqta nirqaku mana lluptinankupaq allinta cuidananpaq.+
24 Chaynata kamachiptinkum carcel cuidaqqa carcelpa uku cuartonman paykunata hinarurqa, hinaspam uchkuyuq tablawan* paykunapa chakinta hapirachirqa.
25 Pablowan Silasmi ichaqa yaqa chawpi tutata Diosta mañakuchkarqaku hinaspa takispanku hatunchachkarqaku,+ chaytaqa presokunapas uyarirqam.
26 Hinaptinmi qunqayllamanta hatun terremoto karurqa chaymi carcelpa cimientonkunapas katkatatarqa. Chaymantapas carcelpa llapallan punkunkunam chaylla kichakururqa, lliw presokunapa cadenankunapas kachakuykurqam.+
27 Carcel cuidaq rikchariruspanmi carcelpa punkunkunata kicharayachkaqta qawaykurqa, hinaspam presokuna lluptirusqankuta piensaspan espadanwan wañurachikunanpaqña kachkarqa.+
28 Hinaptinmi Pabloqa qaparispan nirqa: “¡Ama imanakuychu, kaypim llapayku kachkaniku!”, nispa.
29 Chaymi chay carcel cuidaqqa achkita mañakurqa, hinaspam apurawman yaykuruspan katkatatastin Pablopa hinaspa Silaspa ñawpaqninpi qunqurakuykurqa.
30 Hinaspanmi paykunata hawaman pusaruspan nirqa: “Taytallaykuna, ¿imatataq ruwanay salvakunaypaq?”, nispa.
31 Paykunañataqmi nirqaku: “Señor Jesuspi iñiy, hinaspaqa wasikipi kaqkunapiwanmi salvakunki”, nispanku.+
32 Chaymi paykunaqa wasinpi llapallan kaqkunamanwan Jehova* Diospa palabranta willarqaku.
33 Hina chay tutam chay horallapi paykunata pusaspan heridanta mayllarqa. Chaymantam carcelta chay cuidaq runaqa llapallan ayllunpiwan chaylla bautizakurqaku.+
34 Hinaspam wasinman pusaykuspan mikuyta qararqa, payqa Diosman iñikusqanmantam wasinpi llapallan kaqkunapiwan anchata kusikurqa.
35 Achikyaramuptinmi llaqtapi kamachiqkuna guardiakunata kamachirqaku “kachariy chay runakunata” nispa carcel cuidaqta nimunankupaq.
36 Hinaptinmi chayna nimusqankuta Pabloman carcel cuidaq willarqa: “Llaqtapi kamachiqkunam runakunata kacharamun iskaynikichik kacharisqa kanaykichikpaq. Chaynaqa lluqsispaykichikyá hawkalla pasakuychik”, nispa.
37 Pablom ichaqa chay guardiakunata nirqa: “Roma nacionniyuq+ kachkaptiykum manaraq juzgawachkaspanku runakunapa qayllanpi azotewarqaku hinaspa carcelman churawarqaku, ¿kunanñataqchu mana pipa yachasqallanta qarquwachkanku? ¡Manam chaynaqa kanmanchu! Kikinkuyá hamuspanku pusawachunku”, nispa.
38 Chaymi guardiakunaqa chayna nisqanta llaqtapi kamachiqkunaman willarqaku. Paykunañataqmi mancharikurqaku chay presochasqanku runakuna Roma nacionniyuq kasqankuta yacharuspanku.+
39 Chayraykum hamuruspanku pampachaykunankupaq nirqaku, soldadokunawan cuidachispanku hawaman pusaruspankuñataqmi nirqaku llaqtamanta pasakunankupaq.
40 Carcelmanta lluqsiruspankum Pablowan Silasqa Lidiapa wasinman rirqaku, hinaspam iñiqkunata kallpanchaykuspanku+ pasakurqaku.
Willakuykuna
^ Utaq: “Ancianokunapa”.
^ Utaq: “Revelacionpi”.
^ Utaq: “Sabadotañataqmi”.
^ Utaq: “Vendeq”.
^ Qaway A5 kaq yachachikuyta.
^ Qaway A5 kaq yachachikuyta.
^ Utaq: “Cepowan”. Qaway “uchkuyuq tabla” niqpa ima ninan kasqanta.
^ Qaway A5 kaq yachachikuyta.
