Hechos 6:1-15
6 Chay punchawkunapim Jesuspa qatiqninkuna aswan-aswan achkayarqa. Hinaptinmi griego rimaq judiokuna quejakurqaku hebreo rimaq judiokunamanta, sapa punchaw mikuyta aypuspanku griego rimaq viudakunaman tupaqninkuta mana qusqankumanta.+
2 Chaymi 12 apostolkuna lliw iñiqkunata qayachispanku nirqaku: “Manam allinchu kanman Diospa palabran yachachiyta saqiruspayku mikuyta aypuyniykuqa.+
3 Chayraykuyá wawqillaykuna qamkuna ukumanta akllaychik mikuyta aypunankupaq+ allin respetasqa qanchis qarikunata,+ paykunaqa kananku Diospa atiyninpa* huntasqan runakunam hinaspa allin yachayniyuq runakunam,+
4 ñuqaykuñataqmi Diosta mañakuypi hinaspa palabranmanta yachachiyllapiña kasaqku”, nispa.
5 Paykunapa nisqankum lliw iñiqkunapaq allin karqa, chaymi akllarqaku Estebanta, payqa karqa Diospa atiyninpa* huntasqan runam hinaspa ancha iñiyniyuq runam. Akllarurqakutaqmi Felipetapas,+ Procorotapas, Nicanortapas, Timontapas, Parmenastapas chaynataq judiokunapa religionninman yaykuq Nicolastapas, payqa karqa Antioquiamantam.
6 Paykunatam apostolkunaman pusarqaku, hinaptinmi apostolkunaqa Diosta mañakuruspanku makinkuta paykunapa hawanman churaykurqaku.+
7 Chaynapim Diospa palabranqa tukuy hinastinpi willakusqa karqa,+ Jerusalenpi iñiqkunapas aswan-aswanmi achkayarqa,+ sacerdotekunapas achkallañam iñikurqaku.+
8 Estebanmi Diospa ancha yanapasqan kaspa chaynataq Diospa atiyninwan huntasqa kaspan runakunapa qayllanpi admirakuypaq kaqkunatawan milagrokunata ruwarqa.
9 Estebanwan atipanakunankupaqmi asuykurqaku Libertos nisqawan sutichasqa runakunapa wakinninku, paykunawan kuskataqmi asuykurqaku Cirenemanta, Alejandriamanta, Ciliciamanta hinaspa Asia lawkunamanta wakin runakunapas.
10 Yachaywan hinaspa Diospa atiyninpa yanapakuyninwan Esteban rimaptinmi paykunaqa mana ima niytapas atirqakuchu.+
11 Chaymi paykunaqa qarikunaman pakallapi yachachirqaku: “Kay runatam uyarirqaniku Moisespa hinaspa Diospa contranpi mana allinkuna rimachkaqta”, nispa ninankupaq.
12 Hinaspankum llaqtapi runakunata, autoridadkunata hinaspa escribakunata umacharqaku contranpi lliw hatarinankupaq, hinaspam paykunaqa Estebanman pawaykuspa hapirurqaku mana munakuchkaqta hinaspam pusarqaku judiokunapa cortenman*.
13 Chaymantam llullakunankupaq runakunata pusamurqaku, hinaptinmi paykuna nirqaku: “Kay runam Diospa wasinpa chaynataq Moisespa chaskisqan kamachikuykunapa contranpi tukuy tiempo mana allinkunata rimachkan.
14 Uyarirqanikum, ‘Nazaretmanta Jesusmi Diospa wasinta tuñirachinqa hinaspam Moisespa saqiwasqanchik costumbrekunata cambianqa’ niqta”, nispa.
15 Hinaptinmi judiokunapa cortenpi lliw tiyaqkuna Estebanta qawarispanku rikurqaku angelpa uyan hina uyayuq kachkaqta.
Willakuykuna
^ Utaq: “Chuya espiritupa”.
^ Griego rimaypiqa nichkan: “Sanedrinman”, nispam. Qaway kay palabrapa ima ninan kasqanta.
