Jeremias 19:1-15
19 Jehova Diosmi niwarqa: “Allpa mankata ruwaq runapata rispayki puyñuta rantimuy,+ hinaspayki sacerdotekunapi ancha riqsisqa runakunatawan llaqtapi punta apaqkunata pusarikuspa
2 ‘Paki mankakunapa kanan’ sutiyuq punkupa kasqan Hinon wayquman riy.+ Chaypiyá nisqaykunata willakamuy.
3 Kaynatam ninki: ‘Juda llaqtata kamachiqkunawan Jerusalen runakuna, Jehova Diospa nisqantayá uyariychik, angelkunata kamachiq Jehova Diosmi nin, Israelpa Diosninmi nin:
“Kaymanmi ñakariyta apamusaq, pipas kayta uyariqqa manchakuymantam kanqa.
4 Kaytaqa ruwasaq saqiruwasqankuraykum+ hinaspa kay allpatapas manaña riqsipata ruwarusqankuraykum.+ Paykunaqa taytacha-mamachapaqmi animalkunata nakachkanku. Paykunapas, ñawpaq abuelonkupas chaynataq Juda llaqtata kamachiqkunapas chay taytacha-mamachakunataqa manam haykapipas yupaycharqakuchu. Paykunam ichaqa chaykunata ruwaspanku mana huchayuq runakunapa yawarninwan manaña rikuyta kay allpata ruwarunku.+
5 Muqukunam Baal taytachata yupaychanankuña rikurirun, chaypim churinkuta Baal taytachapaq kañanku,+ chaytaqa manam ñuqaqa kamachirqanichu, manataqmi piensayllapas-piensarqanichu”’, nispa.+
6 ‘Jehova Diosmi nin: “Hamuchkanmi punchawkuna, chay punchawkunapiqa kay sitiotaqa manañam sutichankichikñachu Tofetwanqa nitaq Hinon wayquwanqa, aswanqa sutichankichik Wañuchinakuypa kanan wayquwanñam.+
7 Juda runakunapawan Jerusalen runakunapa imam tantiasqantam kaypi yanqachasaq, chiqniqninkunam espadawan wañuchinqa, wañuchiqkunapa makinmanmi churasaq, ayankutapas alton pawaqkunamanmi qarasaq, purun animalkunamanmi qarasaq.+
8 Kay llaqtataqa manchakuypaqtam ruwasaq, hukkunapa asikunantam* ruwasaq, pipas chayninta puriqqa qawaykuspanmi mancharisqaraq qipanqa, asikunqakum kay llaqtata tukuy ima pasasqanmanta.+
9 Churi-wawallankutam mikunqaku, kikinkupuram mikunakunqaku, paykunaqa manam ima ruwaytapas atinqakuchu chiqniqninkuna muyuruptinqa hinaspa wañuchiyta munaqninkuna chawpicharuptinqa”’, nispa.+
10 Qamñataqmi apasqayki puyñuta pakinki pusasqayki runakuna qawachkaptin,
11 hinaspam paykunata ninki: ‘Angelkunata kamachiq Jehova Diosmi nin: “Kay puyñuta hinam kay llaqtatawan kay runakunata ruwasaq, pipas allpa mankata pakiruptinqa manañam chay mankataqa allichayta atinmankuñachu, paykunaqa Tofetpim wañuqkunata pampanqaku, manaña sitiopas kanankamam pampanqaku”’, nispa.+
12 Jehova Diosmi nin: ‘Chaytam ruwasaq kay llaqtawan hinaspa kay llaqtapi yachaq runakunawan, chaynapi kay llaqta Tofet hinaña kananpaq.
13 Jerusalenpi wasikunawan Juda llaqtata kamachiqkunapa wasinqa kay Tofet hinam millakuypaqña kanqa,+ paykunaqa wasinkupa hawanpim tukuy imata quqku intiman, killaman hinaspa lucerokunaman.+ Taytacha-mamachakunapaqpas vinokunatam talliqku, chaymi chay wasikunaqa llapallan millakuypaqña kanqa’”, nispa.+
14 Jeremiastaqa Jehova Diosmi Tofetpi willakamunanpaq kacharqa, chaymanta kutiramuspanmi Jeremiasqa Jehova Diospa wasinpa punkunman rirqa, hinaspam runakunata nirqa:
15 “Angelkunata kamachiq Jehova Diosmi nin, Israelpa Diosninmi nin: ‘Kay llaqtamanwan llapallan llaqtachakunamanmi nisqayman hina ñakariyta kacharimusaq, paykunaqa rumi sunquyaruspankum nisqaykunataqa mana kasukurqakuchu’”, nispa.+
Willakuykuna
^ Hebreo rimaypiqa nichkan: “Silbanantam”, nispam.
