Jeremias 39:1-18
39 Juda nacionta kamachiq Sedequias isqun wataña kamachichkaptinmi, chunka kaq killapi Babilonia nacionta kamachiq Nabucodonosor llapallan soldadonkunapiwan hamuspan Jerusalenta muyurirurqa.+
2 Sedequias 11 wataña kamachichkaptinmi, tawa kaq killapa isqun punchawninpi Jerusalenman yaykururqaku.+
3 Babiloniata kamachiqpa yanapaqninkunam yaykuruspanku chawpi kaq punkupi tiyaykurqaku,+ paykunam karqa samgarwan riqsisqa Nergal-sarezer, kamachiqpa yanapaqnin* Nebo-sarsekim, layqa ruwaqkunapa kamachiqnin* Nergal-sarezer chaynataq Babilonia kamachiqpa wakin yanapaqninkuna.
4 Paykunata rikuruspankum Juda nacionta kamachiq Sedequiaswan llapallan soldadokuna llaqtamanta ayqirqaku,+ paykunaqa kamachiqpa huertan chawpintam tuta ayqirqaku, hinaspam lluqsirurqaku pirqakunapa chawpinpi kaq punkunta, Araba lawman riq ñannintam ayqirqaku.+
5 Caldea soldadokunaqa Sedequiasta qatispankum Jerico+ llaqtapa hichpan pampapi hayparurqaku. Sedequiastaqa hapiruspankum Babiloniata kamachiq Nabucodonosorman pusarqaku, payqa kachkarqa Hamat+ allpapi kaq Ribla+ llaqtapim, chaypim nirqaku Sedequiasta ima ruwanankumanta.
6 Babiloniata kamachiqmi hina Ribla llaqtapi Sedequiaspa churinkunata wañuchinankupaq kamachirqa, Sedequias qawachkaptinmi wañuchirqaku. Babiloniata kamachiqqa nirqataqmi Judapi llapallan ancha riqsisqa runakunata wañuchinankupaqpas.+
7 Chaymantam Sedequiaspa ñawinta hurquruspan Babiloniaman pusarqa broncemanta cadenawan wataruspan.+
8 Caldea runakunaqa kañaykurqakutaqmi kamachiqpa wasintapas chaynataq llaqtapi runakunapa wasintapas.+ Jerusalen llaqtapa murallantapas lliwmi taqmarurqaku.+
9 Soldadokunapa kamachiqnin Nebuzaradanñataqmi+ llaqtapi puchuq runakunata Babiloniaman pusarqa, pusarqataqmi kikinkumanta paykunaman hukllawakuqkunatapas chaynataq wakin puchuqkunatapas.
10 Mana imayuq wakcha runakunatam ichaqa Nebuzaradanqa Juda allpapi saqirurqa, hinaspam uvas huertakunatawan chakrakunata qurqa chaypi llamkanankupaq*.+
11 Babiloniata kamachiq Nabucodonosormi Nebuzaradanman nirqa Jeremiasmanta:
12 “Payta maskamuspaykiyá payta cuidamuy, paytaqa amam imatapas ruwankichu, imapas mañakususqaykitam qunki”, nispa.+
13 Chaymi soldadokunapa kamachiqnin Nebuzaradan, kamachiqpa yanapaqnin* Nebusazban, layqa ruwaqkunapa kamachiqnin* Nergal-sarezer chaynataq Babiloniata kamachiqpa yanapaqnin runakuna kamachirqaku
14 Guardia sutiyuq patiomanta+ Jeremiasta hurqumunankupaq, hinaspam Aicampa+ churin Guedaliasman+ quykurqaku wasinpiña yachananpaq*, Aicamqa karqa Safanpa+ churinmi, chaynapim Jeremiasqa llaqtapi runakunawanña yacharqa.
15 Guardia sutiyuq patiopi+ preso kachkaptinmi Jehova Diosqa Jeremiasta rimapayaspan nirqa:
16 “Etiopia llaqtayuq Ebed-melecman+ rispaykiyá nimuy: ‘Angelkunata kamachiq Jehova Diosmi nin, Israelpa Diosninmi nin: “Kay llaqtata ima pasananmanta nisqaytaqa cumplisaqpunim, ñuqaqa nirqani manam allin kanankumantachu aswanqa sasachakuypi kanankumantam, chayna kasqantaqa rikunkimá”’, nispa.
17 Ñuqa Jehova Diosmi niki: ‘Chay punchawqa libraykusqaykim, manchakusqayki runakunapa makinmanqa manam chayankichu’, nispa.
18 Ñuqa Jehova Diosmi niki: ‘Espadawan wañunaykimantam libraykusqayki, ñuqapi hapipakusqaykiraykum hinalla kawsanki’”, nispa.+
Willakuykuna
^ Utaq: “Rabsaris”.
^ Utaq: “Rabmag”.
^ Ichapas kanman: “Llamkachinanpaq”, niqpas.
^ Utaq: “Rabsaris”.
^ Utaq: “Rabmag”.
^ Utaq: “Tiyananpaq”.
