Jeremias 41:1-18
41 Qanchis kaq killapim kamachiqpa mirayninmanta kaq Ismaelqa+ chunka runankunapiwan Mizpa llaqtaman chayaramurqa, payqa kamachiqpa huknin runantaqmi karqa. Ismaelqa karqa Elisamapa willkanmi, Guedaliaswan kuska Mizpapi+ mikuchkaptinkum,
2 Netaniaspa churin Ismaelqa chunka runankunapiwan hatariykuspan Aicampa churin Guedaliasta espadawan wañurachirqa, Aicamqa karqa Safanpa churinmi. Chaynatam Ismaelqa wañurachirqa llaqtapi nanachikunanpaq Babilonia kamachiqpa churasqan Guedaliasta.
3 Ismaelqa wañurachirqataqmi Mizpa llaqtapi Guedaliaswan kaq lliw judiokunatapas chaynataq chaypi kaq Caldea soldadokunatapas.
4 Guedaliasta wañurachisqankumanta paqarintillanmi, manaraq pipas yachachkaptin
5 Sichenmanta*,+ Silomanta+ hinaspa Samariamanta+ 80 runakuna hamururqaku. Paykunaqa chayaramurqaku barbanku qatqasqakamam*, pachanku llikchisqakamam chaynataq aychanku kuchusqakamam.+ Paykunam apamusqaku miski asnaq sachapa wiqintawan kawsaykunamanta ofrendakunata+ Jehova Diospa wasinman apanankupaq.
6 Hinaptinmi Netaniaspa churin Ismaelqa Mizpa llaqtamanta lluqsiruspan waqastin paykunaman tariparqa, paykunawan tuparuspanmi nirqa: “Aicampa churin Guedaliasta qawaqyá hakuchik”, nispa.
7 Ichaqa llaqtaman yaykuykuptillankum Netaniaspa churin Ismaelqa runankunapiwan wañurachirqaku, hinaspankum pozoman wischuykurqaku.
8 Ichaqa paykunamanta chunka runakunam Ismaelta nirqaku: “Amayá wañuchiwaykuchu, purunpim pakasqata saqiramuniku trigota, cebadata, aceiteta hinaspa mielta”, nispa. Chaymi paykunataqa mana wañuchirqakuchu.
9 Ismaelqa wañuchisqan runakunatam hatun pozoman wischuykurqa, chay pozotaqa ruwachirqa kamachiq Asam Israelta kamachiq Baasawan peleaspan,+ chay pozotam Netaniaspa churin Ismaelqa wañuchisqan runakunawan huntarachirqa.
10 Mizpa+ llaqtapi puchuq runakunatam Ismaelqa pusakurqa, pusakurqam kamachiqpa warmi churinkunatapas chaynataq Mizpa llaqtapi puchuq llapallan runakunatapas, paykunamanta nanachikunanpaqmi soldadokunapa kamachiqnin Nebuzaradan Aicampa churin Guedaliasta+ churarqa. Netaniaspa churin Ismaelqa paykunata pusarikuspanmi Ammon runakunapa allpanta pasarqa.+
11 Careapa churin Joananwan+ soldadonkunapa kamachiqninkunam Netaniaspa churin Ismaelpa mana allinkuna ruwasqanta yacharurqaku,
12 hinaspam llapallan runankunapiwan rirqaku Netaniaspa churin Ismaelwan peleaq, paykunawanmi tuparurqaku Gabaon llaqtapi kaq yakukunapa kasqanpi*.
13 Ismaelpa pusasqan runakunaqa Careapa churin Joananta chaynataq soldadonkunapa kamachiqninkunata rikuykuspankum anchata kusikurqaku.
14 Chaymi Mizpa+ llaqtamanta Ismaelpa pusasqan runakunaqa Careapa churin Joananwan kutikurqaku.
15 Netaniaspa churin Ismaelmi ichaqa pusaq runankunapiwan Joananmanta ayqikururqaku Ammon runakunapa allpanman.
16 Careapa churin Joananwan soldadonkunapa kamachiqninkunam Mizpa llaqtamanta kaq runakunata llaqtankuman kutichirqaku, paykunataqa Netaniaspa churin Ismaelmi Aicampa churin Guedaliasta+ wañurachispan pusakuchkarqa. Gabaonmantam kutichirqa llapallan runakunata, soldadokunata, warmikunata, warmachakunata chaynataq kamachiqpa yanapaqninkunatapas.
17 Chaymanta rispankum Belen+ llaqtapa hichpan Kimampi samaykurqaku, chaynapi hinalla rispanku Egiptoman+ chayanankupaq.
18 Paykunaqa Caldea runakunatam manchakurqaku, manchakurqakuqa Netaniaspa churin Ismael Aicampa churin Guedaliasta wañurachisqanraykum. Guedaliastaqa Babiloniata kamachiqmi chay nacionmanta nanachikunanpaq churarurqa.+
Willakuykuna
^ Utaq: “Siquenmanta”.
^ Utaq: “Siksisqakamam”.
^ Ichapas kanman: “Hatun pozopa kasqanpi”, niqpas.
