Jeremias 42:1-22
42 Jeremiasmanmi asuykurqaku soldadokunapa kamachiqninkuna, Careapa churin Joanan,+ Hosayapa churin Jezanias chaynataq llapallan runakunapas hatun-uchuy.
2 Hinaspam Diosmanta willakuq* Jeremiasta nirqaku: “Ruegakusqaykutayá uyariykullawayku. Jehova Diostayá ñuqaykupaqwan kay puchuq runakunapaq mañapuwayku, qawasqaykiman hinam aschallaña kachkaniku.+
3 Jehova Diosyá niwachunku mayninta rinaykupaq chaynataq imata ruwanaykupaqpas”, nispa.
4 Diosmanta willakuq Jeremiasñataqmi nirqa: “Allinmi, niwasqaykichikman hinam Jehova Diosta qamkunapaq mañakusaq, hinaspam Jehova Diospa niwasqanta mana pakaykuspa imam kaqta willasqaykichik”, nispa.
5 Paykunañataqmi Jeremiasta nirqaku: “Jehova Diospa willachiwasqankumantaqa kikin Jehova Diosyá testigo kachun kasukusqaykumanta utaq mana kasukusqaykumantapas.
6 Allinniykupaq utaq mana allinniykupaq kaptinpas mañapuwanaykikupaq nisqaykuraykum Jehova Diospa nisqantaqa kasukusaqku. Chaynapim Jehova Diosta kasukusqaykuqa allinniykupaq kanqa”, nispa.
7 Chunka punchaw pasaruptinmi Jehova Diosqa Jeremiasta rimapayarqa.
8 Chaymantam Jeremiasqa qayachirqa Careapa churin Joananta, paywan kaq soldadokunapa kamachiqninkunata hinaspa llapallan runakunata hatun-uchuyta.+
9 Paykunatam nirqa: “Ruegakunaypaq niwasqaykichik Israelpa yupaychasqan Jehova Diosmi nin:
10 ‘Kay nacionpi qipakuptikichikqa ñuqam pirqata hina pirqasqaykichik, manam tuñichisqaykichikchu. Sachata hina plantaruspaypas manam pilasqaykichikchu, ñakariykuna kacharimusqaymantam ñuqaqa llakipayasqaykichik.+
11 Manchakusqaykichik Babiloniata kamachiqtaqa amañayá manchakuychikchu’, nispa.+
Ñuqa Jehova Diosmi nini: ‘Amayá paytaqa manchakuychikchu, ñuqam qamkunawan kachkani libraykunaypaq hinaspa paypa makinmanta hurquykunaypaq.
12 Qamkunata llakipayaptiymi+ paypas llakipayasunkichik, hinaspam nacionnikichikman kutichisunkichik.
13 Sichu ninkichik: “Manam, ñuqaykuqa manam kay nacionpiqa qipasaqkuchu”, nispa. Hinaspapas ñuqa Jehova Diospa nisqayta mana kasukuspaykichik
14 ninkichik: “Manam, kaypi qipanaykumantaqa Egipto+ allpamanmi risaqku, chaypiqa manam piwanpas peleasaqkuchu, manataqmi waqrapa waqasqantapas uyarisaqkuchu, manataqmi yarqaymantapas kasaqkuchu, chaypim yachamusaqku*”, nispa.
15 Juda runakuna, chaynata nispaykichikqa ñuqa Jehova Diospa nisqaytayá uyariychik. Angelkunata kamachiq ñuqa Jehova Diosmi nini, Israelpa Diosninmi nini: “Egiptopipuni yachayta munaspaykichikqa hinaspa chaypi yachanaykichikpaq pasakuptikichikqa,
16 manchakusqaykichik wañuchinakuymi Egipto allpapi hayparamusunkichik, muchuyta manchakusqaykichikmi Egiptopi hayparamusunkichik, chaypimá wañunkichik.+
17 Egiptopipuni yachay munaq runakunam llapallanku wañunqaku espadawan, yarqaymanta chaynataq unquywan. Kacharimusqay ñakariymantaqa manam mayqillankupas puchunqakuchu”’, nispa.
18 Angelkunata kamachiq Jehova Diosmi nin, Israelpa Diosninmi nin: ‘Imaynam Jerusalenpi runakunaman llumpa-llumpay piñakuyniyta kachaykurqani,+ chaynam qamkunamanpas Egiptoman pasakuptikichikqa piñakuyniyta kachaykamusaq, hinaptinmi ñakasqaña kankichik, hukkunapas mancharisqallañam qawasunkichik, runakunapa asikunanñam kankichik, hukkunapa mana respetasqanñam kankichik,+ allpaykichiktaqa manañam haykapipas rikunkichikchu’, nispa.
19 Juda runakuna, Jehova Diosmi qamkuna imayna kanaykichikmanta nirusunkichik. Amayá Egiptomanqa riychikchu. Kunanmi chunkay-chunkayta nichkaykichik.
20 Mana kasukuspaykichikqa wañunkichikmi. Qamkunam Jehova Diosta mañakunaypaq niwarqankichik: ‘Jehova Diostayá ñuqaykupaq mañapuwayku, hinaspayá Jehova Diospa tukuy ima nisusqaykita willawayku, ñuqaykuqa kasukusaqkum’, nispa.+
21 Kunanqa ñam willaykuykichikña, qamkunam ichaqa mana kasukunkichikchu Jehova Diospa niwasqantaqa, manataqmi imapas kamachiwasqantaqa ruwankichikchu.+
22 Kunanyá allinta yachaykuychik, maypipas yachay munasqaykichikpim wañunkichik espadawan, yarqaymanta hinaspa unquywan”, nispa.+
