Jeremias 52:1-34
52 Sedequiasqa+ 21 watanpi kachkaspam kamachiyta qallaykurqa. Payqa Jerusalen llaqtamantam Juda nacionta 11 wata kamachirqa. Mamanmi karqa Libna llaqtayuq Jeremiaspa churin Amutal.+
2 Sedequiasqa Jeoyakim hinam Jehova Diospa chiqnisqan kaqkunata ruwarqa.+
3 Tukuy chaykunaqa Jerusalen llaqtapiwan Juda nacionpim pasarqa Jehova Dios llumpayta piñakusqanrayku, chaymi chinkarachirqa.+ Sedequiasqa manañam kasukurqachu Babilonia nacionta kamachiqtaqa.+
4 Isqun wataña Sedequias kamachichkaptinmi Babilonia nacionta kamachiq Nabucodonosorqa Jerusalen llaqtaman hamurqa llapallan soldadonkunapiwan. Chayqa karqa chunka kaq killapa chunka punchawninpim. Llaqtata muyuriruspankum yaykunankupaq allpata muntururqaku.+
5 Llaqtapa muyuriqninpim karqaku Sedequiaspa kamachisqan 11 watakama.
6 Llaqtapi mikuy mana kaptinmi runakunaqa yarqaymanta karqaku.+ Tawa kaq killapa isqun punchawninpim+
7 Babilonia soldadokuna murallata uchkururqaku. Chaymi Jerusalen llaqtapi llapallan soldadokunaqa kamachiqpa huertan lawpi punkunta tuta lluptikurqaku. Babilonia soldadokuna llaqtapa muyuriqninpi kanankukamam paykunaqa Araba lawman riq ñanninta ayqikurqaku.+
8 Babilonia soldadokunam ichaqa qatispanku hayparurqaku Jerico llaqtapa hichpan pampapi.+ Hinaspankum paywan riq soldadokunata chiqirachirqaku.
9 Kamachiq Sedequiastañataqmi hapiruspanku Babilonia nacionta kamachiqman pusarqaku, payqa kachkarqa Hamat allpapi kaq Ribla llaqtapim. Chaypim nirqaku Sedequiasta ima ruwanankumanta.
10 Babiloniata kamachiqqa Sedequias qawachkaptinmi churinkunata wañurachirqa. Hina Ribla llaqtapitaqmi wañurachirqa Juda nacionta kamachiqpa llapallan yanapaqninkunatapas.
11 Chaymantam Babiloniata kamachiqqa Sedequiasta+ ñawsayarachirqa, hinaspam broncemanta cadenawan wataruspan Babilonia nacionman pusarqa. Chaypim wañukunan punchawkama presochasqa karqa.
12 Pichqa kaq killapa chunka punchawninpim Jerusalen llaqtaman chayaramurqa Babilonia nacionta kamachiq Nabucodonosorpa yanapaqnin Nebuzaradan. Payqa karqa soldadokunapa kamachiqninmi.+ Nebuzaradanqa chayaramurqa 19 wataña Nabucodonosor kamachichkaptinmi.
13 Hinaspanmi kañaykurqa Jehova Diospa wasinta,+ kamachiqpa wasinta, Jerusalenpi wasikunata hinaspa hatun wasikunata.
14 Nebuzaradanqa Babilonia soldadokunapiwanmi Jerusalen llaqtapa murallanta tuñirachirqa.+
15 Hinaspanmi pusakurqa wakcha runakunata, llaqtapi puchuq runakunata, Babilonia nacionta kamachiqman hukllawakuqkunata chaynataq imapas ruway yachaq runakunatapas.+
16 Qalaypaq wakcha runakunatam ichaqa saqirurqa llaqtapi uvas huertakunata cuidanankupaq hinaspa llamkanankupaq.+
17 Babilonia soldadokunam Jehova Diospa wasinpi broncemanta pilarkunata ñutuparurqaku.+ Ñutuparurqakutaqmi Jehova Diospa wasinpi carretakunatapas+ chaynataq broncemanta ruyru estanquetapas,+ hinaspankum broncetaqa Babiloniaman llapallanta apakurqaku.+
18 Apakurqakutaqmi baldekunatapas, palakunatapas, nina wañuchinakunatapas, tazonkunatapas,+ vasokunatapas+ chaynataq Diospa wasinpi* broncemanta lliw serviciokunatapas.
19 Nebuzaradanmi apakurqa qurimantawan qullqimanta ruwasqa+ sansa apanakunata, tazonkunata, baldekunata, candelabrokunata,+ vasokunata hinaspa tazonkunata.+
20 Jehova Diospa wasinpaqmi Salomon ruwachirqa broncemanta iskay pilarkunata, ruyru estanqueta, chay estanque tiyananpaq 12 torokunata+ hinaspa carretakunata. Chaykunata ruwachisqan bronce achka kasqanraykum llasayninqa mana yachakurqachu.
21 Sapa pilarkunapa sayayninmi karqa pusaq metro*. Muyuriqninñataqmi karqa pichqa metro masnin*.+ Chay pilarkunaqa karqa vacio ukuyuqmi hinaspa tawa dedo* raktayuqmi.
22 Chay pilarkunapa puntanpi broncemanta ruyruniqñataqmi karqa iskay metro masnin* sayayniyuq.+ Chay ruyrupa sikinpi kaq muyuriqninpi mallakuna hinaspa siqinpi granadakunaqa llapanmi broncemanta karqa. Pilarkunawan granadakunaqa iskayninmi chayniraqkamalla karqa.
23 Waqtanpim karqa 96 granadakuna, llapanpiqa 100 granadakunam mallata muyurirqa.+
24 Nebuzaradanqa pusakurqataqmi ancha riqsisqa sacerdote Serayatapas,+ sacerdote Sofoniastapas+ chaynataq punku cuidaq kimsa runakunatapas.+
25 Llaqtamantaqa pusakurqataqmi soldadokunapa kamachiqnintapas, kamachiq Sedequiaspa qanchis yanapaqninkunatapas, 60 runakunatapas hinaspa soldadokunata kamachiqpa secretariontapas. Paymi peleaq rinankupaq runakunata huñumuq.
26 Llapallankutam Nebuzaradanqa pusarqa Ribla llaqtapi Babiloniata kamachiqman.
27 Hinaptinmi Babiloniata kamachiqqa Ribla+ llaqtapi paykunata wañuchirqa, chayqa karqa Hamat lawpim. Chaynatamá Juda nacionniyuq runakunaqa pusasqa karqaku.+
28 Qanchis wata kamachichkaspanmi Nabucodonosorqa Juda runakunata pusakurqa, paykunaqa karqaku 3.023 runakunam.+
29 Nabucodonosorqa+ 18 wataña kamachichkaspanmi Jerusalen llaqtamanta pusakurqa 832 runakunata.
30 Nabucodonosor 23 wataña kamachichkaptinñataqmi Nebuzaradanqa 745 Juda runakunata pusakurqa.+
Llapallan pusasqankum karqa 4.600 runakuna.
31 Evil-merodacmi Babilonia nacionta kamachiyta qallaykuspan Juda nacionta kamachiq Joakinta+ preso kasqanmanta hurqururqa. Chayqa karqa 37 wataña Babilonia nacionpi Joakin kachkaptinmi. Hurqururqaqa 12 killapa 25 punchawninpim.+
32 Evil-merodacqa Joakinta llakipayaspanmi Babilonia nacionpi tarikuq wakin kamachiqkunamantapas aswan riqsisqata ruwarurqa.
33 Joakinqa preso kasqan pachanta mudakuruspanmi wañukunankama kamachiqwan kuska mikurqa.
34 Babilonia nacionta kamachiqqa sapa punchawmi Joakinmanqa wañukunan punchawkama mikuyta qurqa.
Willakuykuna
^ Utaq: “Templopi”.
^ Utaq: “18 kuchus”. Qaway B14 kaq yachachikuyta.
^ Utaq: “12 kuchus”.
^ Huk dedoqa karqa yaqa iskay centimetrom.
^ Utaq: “Pichqa kuchus”.
