Jonas 4:1-11
4 Jonasqa llumpaytam piñakururqa Ninive llaqtata Dios llakipayaykuptin.
2 Chaymi Jehova Diosta mañakuspan nirqa: “Jehova Dioslláy, llaqtaypi kachkaspallayraqmá chayna kanantaqa yacharqaniña. Chayraykum Tarsis lawmanqa pasakurqani.+ Yacharqanim kuyapayakuq kasqaykita, llakipayarikuq kasqaykita, mana chaylla piñakuq kasqaykita chaynataq imaña kaptinpas ancha kuyakuq kasqaykita,+ qamqa manam munankichu pipas ñakarinantaqa.
3 Jehova Dioslláy, wañurachiwayñayá. Wañukuyniymi aswan allinqa kanman kawsanaymantaqa”, nispa.+
4 Hinaptinmi Jehova Diosqa Jonasta nirqa: “¿Allintachu ruwachkanki piñakuruspayki?”, nispa.
5 Chaymi Jonasqa Ninive llaqtamanta lluqsiruspan intipa qispimunan lawpi tiyaykurqa. Chaypim kaspikunawan llantuta ruwaspan llaqtata ima pasananta qawananpaq tiyaykurqa.+
6 Hinaptinmi Jehova Diosqa purun calabazata* wiñarachirqa Jonasta llantunanpaq chaynataq llantuptin hawka kananpaq. Jonasñataqmi anchata kusikurqa.
7 Ichaqa Diosmi paqarintin achikyaqta utuskuruwan purun calabazata kachurachirqa, chaymi purun calabazaqa chakirurqa.
8 Inti qispiramuptinñataqmi Diosqa intipa lluqsimunan lawmanta quni wayrata pukuchimurqa, chaymi Jonasqa inti rupaptin mana kallpayuq rikurirurqa. Hinaspam wañuyta munaspan kaqmanta nirqa: “Wañukuyniymi aswan allinqa kanman kawsanaymantaqa”, nispa.+
9 Hinaptinmi Diosqa Jonasta nirqa: “¿Purun calabaza chakiruptinchu llumpayta piñakurunki?”, nispa.+
Jonasñataqmi nirqa: “Yanqamantachumá piñakuruniqa, ¿chaychu mana rabiawanpas wañuruyman?”, nispa.
10 Jehova Diosñataqmi nirqa: “Qamqa mana tarpusqayki hinaspa mana wiñachisqayki purun calabazamantam llakikuchkanki, chayqa huk tutallapim wiñarurqa, huk tutallapitaqmi chakirurqapas.
11 Hinaptinqa, ¿manachu ñuqapas Ninive hatun llaqtapi runakunata llakipayariyman?+ Chay llaqtapi 120.000 masnin runakunaqa manam yachankuchu imam allin utaq imam mana allin kasqantapas, chaypiqa kachkantaqmi achka animalkunapas”, nispa.+
Willakuykuna
^ Ichapas kanman: “Higuerillata”, niqpas.
