Proverbios 11:1-31
11 Jehova Diosqa chiqninmi suwakuq balanzataqa,imam kaqta pesaq balanzam+ ichaqa payta kusichin.
2 Hatuntukuyta qallaykuq runaqa pinqaypim kanqa,+mana hatuntukuq* runam ichaqa yachayniyuq kanqa.+
3 Allin ruwaq runaqa Diosta kasukuq kasqanraykum haykapipas allin kaqllata ruwan,+iskay uya runam ichaqa mana kasukuq kasqanrayku chinkanqa.+
4 Diospa piñakuynin punchawpiqa quri-qullqipas* yanqapaqmi kanqa,+allin kaqta ruwaymi ichaqa runata yanapanqa hinalla kawsakunanpaq.+
5 Mana huchallikuq runaqa allinta ruwasqanraykum allin kawsakunqa,pasaypaq huchallikuq runam ichaqa mana allin ruwasqanrayku mana allinpi tukunqa.+
6 Allin kawsakuq runaqa salvasqam kanqa,+iskay uya runam ichaqa munasqanwan aysachikuspan sasachakuypi kanqa.+
7 Mana allin runa wañuruptinqa ima munasqanpas tukurunmi,kallpanwan tukuy ima ruway munasqanpas tukurunmi.+
8 Allin ruwaq runaqa ima sasachakuymantapas librasqam kanqa,mana allin ruwaq runañataqmi paypa rantinpi chay sasachakuypi kanqa.+
9 Diosta qipanchaq runaqa rimasqanwanmi runamasinta ñakarichin,allin ruwaq runakunam ichaqa imam kaqta yachasqankurayku ñakariymanta librasqa kanqaku.+
10 Allin ruwaq runakunapa imapas ruwasqanwanmi llaqtapi runakuna kusikun,mana allin ruwaq runakuna wañuruptinpas llaqtapi runakunam kusikuymanta qaparinku.+
11 Allin ruwaq runakunata Dios bendeciptinqa* llaqtapas ancha riqsisqam,+mana allin ruwaqkunapa rimasqanwanñataqmi llaqtaqa mana allinpi tukunqa.+
12 Mana yuyayniyuq runaqa runamasintam imapas rimasqanwan waqachin*,yuyayniyuq runam ichaqa upallaykuyta yachan.+
13 Runamasinta yanqamanta tumpaq runaqa mana willana kaqkunatam willakachakun,+confianza runam ichaqa ima willasqankutapas mana willakachakunchu.
14 Yachaywan rimapayakuq runakuna mana kaptinqa llaqtapi runakunam ñakarin,achka rimapayakuqkuna kaptinmi ichaqa imapas allinpi tukunqa.+
15 Mana riqsisqan runaman qullqita prestanankupaq garantizaq runaqa sasachakuypim kanqa,+mana chayta ruwaq* runam ichaqa hawka kawsakunqa.
16 Kuyakuq warmiqa hukkunapa allin qawasqanmi kanqa,+mana llakipayakuq piña runañataqmi kapuqniyuq kayllata haypanqa.
17 Allin sunquyuq runaqa* kikintam allinta ruwakun,+mana llakipayakuq runañataqmi kikillan mana allinta* ruwakun.+
18 Mana allin ruwaqpa imapas huñusqanqa yanqallam,+allin kaqta ruwaq runam ichaqa allin kaqllata huñukunqa.+
19 Haykapipas allinllata ruwananpaq tantiakuq runaqa hinallam kawsakunqa,+mana allinllata ruway munaq runam ichaqa wañunqa.
20 Mana allinllata ruwaq runataqa Jehova Diosqa chiqninmi,+mana huchallikuspa allin ruwaq runañataqmi sunqunta kusichin.+
21 Mana allin ruwaq runaqa huchanman hina castigasqa kananmantaqa manapunim librakunqachu,+allin ruwaq runapa churinkunam ichaqa imawanpas mana ñakarinqakuchu.
22 Kuchipa chuñunpi qurimanta anillo hinammana yuyayniyuq kuyayllapaq warmiqa.
23 Allin ruwaq runapa imapas munasqanqa allinpim tukun,+mana allin runapa imapas munasqanmi ichaqa piñanakuypi tukun.
24 Achkanpi qukuykuq runaqa aswan achkataraqmi chaskinqa,+imatapas runamasinman quyta atichkaspan maqlla* runam ichaqa wakchayaypi kanqa.+
25 Imallantapas qukuykuq runaqa tukuy imayuqmi kanqa,+runamasinpa sunqun tiyaykachiq* runaqa sunqun tiyaykachisqam paypas kanqa.+
26 Kawsayninkunata rantikuyta* mana munaq runataqa llaqtamasinkunam ñakanqa,kawsayninkunata rantikuq runamantam ichaqa allinkunata rimanqaku*.
27 Allin kaqta ruwananpaq anchata kallpanchakuq runaqa chaskisqam kanqa,+mana allinllata ruwaq runam ichaqa ñakariypi kanqa.+
28 Kapuqllanpi hapipakuq runaqa sasachakuypim kanqa,+allin kaqta ruwaq runam ichaqa kallmasapa sacha hina waytarinqa.+
29 Wasinpi kaqkunata ñakarichiq* runaqa manam imatapas chaskinqachu.+
Ruqru uma runaqa yachayniyuq runapa sirvientenmi kanqa.
30 Kawsay qukuq sacha hinam+ allin ruwaq runakunapa imapas ruwasqanqa.
Runamasinta allin kawsakunanpaq yanapaq runaqa yachayniyuqmi.+
31 Sichu kay pachapi allin ruwaq runa imam chaskinanta chaskichkaptinqa,¡astawanraqchá mana allin ruwaqwan huchallikuq runaqa mana allin ruwasqanrayku imam chaskinanta chaskinqa!+
Willakuykuna
^ Utaq: “Mana ruway atisqanta riqsikuq”.
^ Utaq: “Kapuqniyuq kaypas”.
^ Ichapas kanman: “Llaqtamasinkunata allin ruwaq runakuna bendeciptinqa”, niqpas.
^ Utaq: “Mana kaqpaqta hina hapin”.
^ Hebreo rimaypiqa nichkan: “Maki hapiykanakuyta chiqniq”, nispam.
^ Utaq: “Pinqayta”.
^ Kaypiqa rimachkan imaña kaptinpas kuyakuq kasqanmantam.
^ Utaq: “Mana qukuykuq”.
^ Utaq: “Yakuta hukkunaman quykuq runaqa”.
^ Utaq: “Vendeyta”.
^ Utaq: “Rantikuq runapaqmi ichaqa Diospa bendicionninta mañapunqaku”.
^ Utaq: “Pinqayman churaq”.
