Romanos 15:1-33
15 Chaynaqa, Diospa munayninmanta allintaña yachaqkunam manaraq sumaqta yachaqkunata imapas sasachakusqankupi yanapananchik,+ manam kikillanchikpa munasqallanchiktachu ruwananchik.+
2 Sapakamayá runamasinchikpa allinninpaq kaqkunata hinaspa kallpanchasqa kanankupaq kaqkunata ruwasunchik.+
3 Cristopunipas* manam kikinpa munasqallantachu ruwarqa,+ chayna kananmantaqa qillqasqañam karqa: “Qamta kamisusqaykiwanmi sunquypas nanarin”, niq.+
4 Ñawpaq tiempopi tukuy ima qillqakusqanqa yachachiwananchikpaqmi qillqasqa kachkan.+ Chaynapi tukuy imata aguantaspanchik+ hinaspa Diospa qillqanwan sunqunchikta tiyaykachispanchik Diospa quwananchikta suyananchikpaq.+
5 Sunqunchikta tiyaykachiq hinaspa aguantanapaq kallpa quwaqninchik Diosyá llapallaykichikta yanapaykusunkichik Jesucristo hina piensanaykichikpaq.
6 Chaynapi huk sunqulla+ kaspaykichik huk similla señor Jesucristopa taytan Diosta hatunchanaykichikpaq.
7 Chaynaqa sumaqllatayá chaskiykanakuychik+ imaynam Cristopas sumaqllataña chaskiykuwasqanchikman hina,+ chaynapi Dios hatunchasqa kananpaq.
8 Munanim kayta yachanaykichikta: Qari kayninkupi señalachikuq runakunapa serviqninmi Cristoqa karqa,+ chaynam karqa Diospa mana llullakuq kasqan sutilla kananpaq hinaspa ñawpaq abuelonkuman Diospa nisqankuna chiqap kasqanta yachakunanpaq+
9 chaynataq llakipayakuq kasqanmanta Diosta huklaw nacionniyuq runakunapas hatunchanankupaq.+ Chayna kananmantam ñawpaq qillqakunapi nirqa: “Chayraykum nacionkunapipas qamta hatunchasqayki. Takikunawanmi sutikita hatunchallasaq”, nispa.+
10 Nirqataqmi: “Diospa runankunawan kuskayá kusikuychik llapallan nacionkunapi runakuna”, nispa.+
11 Nirqataqmi: “Jehova* Diostayá hatunchaychik llapallan nacionmanta kaq runakuna. Llapallaykichikyá payta hatunchaychik”, nispa.+
12 Isaiaspas kaynatam nirqa: “Hukkaqmi Jeseypa ayllunmanta* hamunqa,+ paymi achka nacionkunata kamachinqa,+ nacionkunañataqmi allinkuna ruwananta kusikuyllawanña suyanqaku”, nispa.+
13 Chaynaqa niwasqanchikta mana iskayrayaspa suyanapaq yanapawaqninchik Diosyá paypi hapipakusqaykichikrayku kusisqa hinaspa hawka kanaykichikpaq yanapasunkichik, chaynapi Diospa atiyninwan* imapas suyasqaykichikta mana iskayrayaspa suyanaykichikpaq.+
14 Wawqi-panillaykuna, ñuqaqa manam iskayrayanichu allin runakunaña kasqaykichikmantaqa, tukuy imakunata yachasqaykichikmantaqa nitaq kikikichikpura rimapayanakuyta* yachasqaykichikmantaqa.
15 Chayna kaptinpas mana imatapas pakaspaymi qillqamuchkaykichik chaykunata mana qunqanaykichikpaq. Tukuy chaykunataqa nikichik kuyasqa kanaypaq hina mana kachkaptiypas Diosninchik anchata kuyawasqanraykum,
16 anchata kuyawaspanmi Diosqa churaykuwan Jesucristopa serviqnin kaspay huklaw nacionniyuq runakunaman paymanta sumaq willakuyta willakunaypaq.+ Diospa quwasqan kay llamkaytaqa ruwachkani huklaw nacionniyuq runakuna Diosman qusqa kaptinku chaskisqa kanankupaqmi, paykunaqa Diospa atiyninwanmi* chuyanchasqa kachkanku.
17 Chaymi ñuqaqa Jesucristopa qatiqnin kasqayrayku hinaspa Diospa ruwayninta ruwasqayrayku kusisqa kachkani.
18 Ichaqa manam ñuqapa ruwasqaykunamantachu rimasaq, aswanqa Cristopa ruwasqankunamantam. Payqa huklaw nacionniyuq runakunatam kasukuq kanankupaq yanaparqa ñuqapa rimasqaywan hinaspa ruwasqaywan.
19 Paykunaqa kasukurqaku Diospa atiyninwan milagrokuna hinaspa mana haykapipas qawasqanku kaqkuna ruwakuptinmi.+ Chaymi Jerusalenmanta qallaykuspay llapan llaqtachakunaman rirqani Ilirico provinciakama Cristomanta sumaq willakuyta llapankuman willanaypaq.+
20 Ñuqaqa tantiarurqaniñam Cristopa sutinmanta uyarisqanku lawkunapiqa sumaq willakuymanta manaña willakunaypaq, chaynapi hukpa cimiento churasqanpi pirqata amaña hatarichinaypaq.
21 Chayna kananmantam ñawpaq qillqakunapi nin: “Paymanta mana willasqa kaqkunam yachanqaku, paymanta mana uyariqkunam entiendenqaku”, nispa.+
22 Chayraykum achka kutita qamkunaman hamuyta mana atimurqanichu.
23 Kunanmi ichaqa kaylawkunapiqa manaña kanchu Diosmanta mana willakusqay llaqtakunaqa, ñuqaqa unayñam* qamkunaman hamuyta munachkani.
24 Chaymi manaraq Españaman chayachkaspay qamkunawan tupaykuyta munachkani, munachkanitaqmi qamkunawan chaypi huk tiempo kusisqa kaykuptinchik parte ñankama riysiwanaykichiktapas.
25 Kunanmi ichaqa Jerusalentaraq risaq Diospa runankunata yanapanaypaq.+
26 Macedonia lawpi hinaspa Acaya lawpi iñiqkunam imapas kaqninkunata kusikuywan qurqaku Jerusalenpi kaq wakcha iñiqkunaman apanaypaq.+
27 Kusikuywan chayta ruwaspankupas ruwanallankutam ruwachkanku paykunawan manupi hina kasqankurayku. Jerusalenpi iñiqkunaqa Diosmanta allinkuna chaskisqankutam huklaw nacionniyuqkunaman qurqaku, chaymi paykunataqa kapuqninkuwan yanapanankupuni.+
28 Chay apachiwasqankuta quykuspallaymi Españata risaq, ichaqa manaraq chayachkaspaymi qamkunata watukuykuq muyuykamusaq.
29 Chaymantapas Cristomantam allin kaqkunata qamkunaman apamusqaykichik.
30 Wawqi-panillaykuna, ñuqanchikqa señorninchik Jesucristopi iñikuspam Diospa atiyninwan kuyakuqllaña kanchik, chayraykum valekamuykichik Diosta tukuy sunquwan mañapuwanaykichikpaq imaynam ñuqapas qamkunapaq mañakusqayman hina.+
31 Chaynapi Judeapi kaq Diospi mana iñiq runakunamanta librasqa kanaypaq+ hinaspa kay apasqayta Jerusalenpi kaq iñiqkuna kusikuywan chaskiykunankupaq.+
32 Chaynapi Dios munaptinqa qamkunaman kusisqallaña hamunaypaq hinaspa llapallanchik kallpanchanakunanchikpaq.
33 Hawka kananchikpaq yanapawaqninchik Diosyá llapallaykichikwan kachun.+ Chaynayá kachun*.
Willakuykuna
^ Utaq: “Diospa akllasqan runapas”.
^ Qaway A5 kaq yachachikuyta.
^ Griego rimaypiqa nichkan: “Jeseypa sapinmanta”, nispam.
^ Utaq: “Yachachinakuyta”.
^ Utaq: “Chuya espirituwanmi”.
^ Ichapas kanman: “Iskay-kimsa watañam”, niqpas.
^ Utaq: “Amen”.
