Salmos 116:1-19
116 Qayakusqayta uyariwasqanraykum Jehova Diosta kuyani.
Yanapaykuwananpaq qayakusqayta uyariwasqanraykum paytaqa kuyani.+
2 Payqa kurkuykamuspanmi uyariykuwan.+
Chayraykum kawsanaykamaqa payta qayakusaq.
3 Wañuymi waska hina muyuriruwarqa.
Wañuqkunapa kasqanmanmi* uraykuchkarqaniña.+
Hukmanyasqallañam karqani. Llakisqallañam karqani.+
4 Ichaqa Jehova Diostam sutinmanta qayakurqani.+
Kaynatam nirqani: “Jehova Dioslláy, yanapaykullaway”, nispay.
5 Jehova Diosqa llakipayakuqmi, payqa allin ruwaqmi.+
Diosninchikqa llakipayakuqllañam.+
6 Jehova Diosqa chayllaraq imapas ruway yachaqkunataqa waqaychanmi.+
Ñuqaqa qalaypaqñam karqani, hinaptinmi payqa yanapaykuwarqa.
7 Ñuqaqa kaqmantayá samaykusaq.
Jehova Diosmi kuyapayaykuwan.
8 Qamqa wañuymantam harkaykuwarqanki.
Mana waqanaypaqmi yanapaykuwarqanki.
Mana urmarunaypaqmi hapiykuwarqanki.+
9 Jehova Diospa ñawpaqninpim purisaq, runakunapa yachasqan* allpa pachapim purisaq.
10 Diospi hapipakusqayraykum rimarqani.+
Llumpa-llumpay ñakariypim tarikurqani.
11 Llumpa-llumpay mancharisqa kaspaymi nirqani:
“Llapallan runakunam llullalla rimaq kanku”, nispay.+
12 ¿Imaynatataq Jehova Diosman kutichipuyman?
¿Imaynatataq kutichipuyman allin kaqkuna ruwapuwasqanmanta?
13 Tukuy imapi yanapaykuwasqanmantam agradecekusaq.
Jehova Diostam sutinmanta qayakusaq.
14 Jehova Diosman imapas ruwanaypaq nisqaykunataqallapallan runankunapa qayllanpim cumplisaq.+
15 Jehova Diosqa anchatam llakikunpayman sunqu kaqkuna wañukuptinqa.+
16 Jehova Dioslláy, yupaychaqniki kasqayraykum qayakamullayki.
Yupaychaqnikim kani,yupaychasuqniki warmipa wawanmi kani.
Cadenaykunamantam kachaykuwanki.+
17 Ñuqapaq tukuy imata ruwasqaykiraykum animalkunata nakapusqayki.+
Jehova Diostam sutinmanta qayakusaq.
18 Jehova Diosman imapas ruwanaypaq nisqaykunataqa+
llapallan runankunapa qayllanpim cumplisaq,+
19 Jehova Diospa wasinpa pationkunapim+ cumplisaq.
Jerusalen llaqtapa chawpinpim cumplisaq.
¡Jehova Diostayá hatunchaychik*!+
Willakuykuna
^ Hebreo rimaypiqa nichkan: “Seolmanmi”, nispam. Qaway kay palabrapa ima ninan kasqanta.
^ Utaq: “Tiyasqan”.
^ Utaq: “¡Aleluya!”. Kaypi Jehova sutitaqa Jah nispapas nichwanmi.
