¿Imaynataq kanku allin amistadkunaqa?
8 YACHACHIKUY
¿Imaynataq kanku allin amistadkunaqa?
Brittanim nin: “Piñasqa, llakisqa utaq kusisqa kaspayqa munanim pimanpas willakuyta utaq pipas uyariykuwananta, chaymi amistadniyuq kayqa ñuqapaqqa ancha allin”, nispa.
IMAYNAM warmachakunapas warmamasichankunawan pukllayta munanku, chaynam musu-sipaskunapas amistadniyuq kayta munanku. Musu-sipaskuna, ¿imapitaq mana chaynallachu kanku pukllaqmasikiwan amistadnikiqa?
Pukllaqmasikiqa qanwan pukllayllatam munan.
Allin amistadqa allinkunata ruwanaykipaqmi kallpanchasunki.
Bibliapas ninmi: “Ancha kuyakuq amistadqa imaña-haykaña kaptinpas hinallam kuyasunki, payqa llumpay sasachakuypi tarikuptikipas kuyasqa aylluyki hinam yanapaykusunki”, nispa (Proverbios 17:17). Arí, amistadnikiqa manamá pukllaqmasiki hinallachu.
Hamuq tiempopi allin yuyayniyuq kanaykipaqqa amistadnikikunaqa kanan:
1) Allin sunquyuqmi.
2) Diospa munasqanman hina kawsakuqmi.
3) Qatipakunaykipaq hinam.
Chaymi tapukunayki: “¿Yaqachu amistadniykunaqa chayna kanku?”, nispa. Chaykunamantayá sapakamamanta qatiqninpi allinta yachaykusun.
Punta kaq: Allin sunquyuqmi kanan
¿Imatam yachanayki? Manamá llapallan “amistadnikim kani” niqkunachu allin amistadkunaqa kanku, bibliam nin wakin runakuna amistadninchiktukuspanku ‘llumpay sasachakuyman wichiykachiwasqanchikmanta’ (Proverbios 18:24). Chayna nisqanmantaqa yaqapaschá iskayrayawaq, ichaqa ¿yaqachu haykaqllapipas allinpaq hapisqayki amistadniki mana allinta ruwasurqanki, qanmanta wasaykipi mana allinkunata rimarqa utaq hukkunaman llullakunata willakachakurqa? Chayta ruwasuptikiqa manañachá hinalla amistadniki kananpaqqa munawaqñachu ¿aw? * Achka amistadniyuq kanamantaqa aswan allinqa allin amistadniyuq kaymi.
¿Imatam ruwawaq? Allin sunquyuq utaq qatipakunaykipaq hina runakunatayá akllay amistadniki kananpaqqa.
17 watanpi Yvette sutiyuq sipasmi nin: “Yaqa lliw runakunam amigay Fionamanta allinllata rimanku, ñuqapas munaymanmi pay hina kayta chaynapi runakuna ñuqamantapas allinllata rimanankupaq”, nispa.
Kaytam ruwawaq:
1. Leey Galatas 5:22, 23.
2. Tapukuwaqmi: “¿Yaqachu amistadniykunaqa Diospa atiyninwan yanapachikusqankurayku bibliapa chayna nisqanman hina kawsakunku?”, nispa.
3. Allin amistadnikikunapa sutintam papelpi qillqawaq hinaspaykim sutin qillqasqaykipa waqtanpi qillqawaq imayna runa kasqankuta.
Sutin
․․․․․
Imayna runa kasqan
․․․․․
Yuyaymananaykipaq: Sichu amistadnikikunapa sutinta qawaptiki mana allin ruwasqankunalla umaykiman chayaramusuptikiqa tantiakuwaqmi paykunawan manaña hukllawakunaykipaq. Aswanqa huk amistadkunatañam maskawaq.
Iskay kaq: Diospa munasqanman hinam kawsakuna
¿Imatam yachanayki? Achka amistadniyuq kayta chaylla munaspaykiqa mana allin amistadkunatam akllaruwaq. Chaymantapas yuyariyá bibliapa kayna nisqanta: ‘Mana yuyayniyuq sonso runakunawan hukllawakuqqa sasachakuypim kanqa’, nispa (Proverbios 13:20). ¿Pikunataq kanmanku ‘mana yuyayniyuq sonso runakunaqa’? Manam profesorninkupa imapas nisqanta sasata entiendeqkunachu, aswanqa mana allinta tantiarispa imapas mana allin ruwaqkunam hinaspa mana kasukuqkunam. Manachá qamqa munawaqchu amistadnikikuna chayna kanantaqa ¿aw?
¿Imatam ruwawaq? Amistadnikikunata allinta akllay, manam lliwchu amistadnikikunaqa kanman (Salmos 26:4). Kaywanqa manam as runakunallawan hukllawakunaykipaqchu nichkaykiku, aswanqa amistadnikikunata allinta akllanaykipaqmi. Bibliapa nisqanman hinam qawanayki “pim allin ruwaq kasqanta, pim mana allin ruwaq kasqanta, pim Diosta yupaychaq kasqanta hinaspa pim Diosta mana yupaychaq kasqanta” (Malaquias 3:18).
13 watanpi Cristofer sutiyuq musum nin: “Tayta-mamaymi yanapawarqa allin amistadkunata akllanaypaq. Amistadniykunaqa llapallankum Diosman sunqu kanku, chaywanmi anchata kusikuni”, nispa.
Kaypi piensariy:
¿Manchakunkichu amistadnikikuna mana allinkunata ruwanaykipaq hikutasunaykimanta?
□ Arí
□ Manam
¿Manchakunkichu tayta-mamayki amistadnikikunata riqsiykuspa piñakunankuta?
□ Arí
□ Manam
Yuyaymananaykipaq: Kay tapukuykunata leeruspayki “arí” nispaykiqa, allinmi kanman Diospa munasqanman hina kawsakuq amistadkunata akllakunaykipaq kallpanchakuyniki.
Kimsa kaq: Qatipakunaykipaqmi kanan
¿Imatam yachanayki? Bibliam nin: “Mana allin kawsakuq runakunawan hukllawakuspaykichikqa allin kaqkuna ruwasqaykichiktam saqirunkichik” nispam (1 Corintios 15:33). Bibliapa chayna nisqan chayna kasqanmanta Lauren sutiyuq sipas cuentata qukurqa. Paymi nin: “Ñuqaqa munarqani estudiaqmasiykuna allinpaq hapiwanantam. Chaypaqqa paykunapa imapas niwasqantam kasukunay karqa. Sapallay tarikusqayraykum paykuna hinaña imatapas ruwaq kani, chaynapi paykunawan kuska kanaypaq”, nispa. Amistadnikikunapa imapas nisusqaykita kasukuspaykiqa Lauren hinam paykunapa makinpi pukllana hina kawaq. Chaymi paykunaqa maymanpas munasqanman pusarusunkiman. ¿Chaytachu munanki?
¿Imatam ruwawaq? Karunchakuyá paykuna hinaña kanaykipaq hikutasuqniki amistadnikikunamantaqa. Ichapas as amistadniyuqllaña qiparunki, ichaqa ancha kusisqam tarikunki. Chaymantapas tiempopa risqanman hinam musuq allin amistadkunata tarinki, chay musuq amistadnikikunaqa qatipakunaykipaq hinam kanqaku (Romanos 12:2).
21 watanpi Jason sutiyuq musum nin: “Huk kaqnin kuyasqa amistadniypa sutinmi Clint. Payqa imapaqpas allintam tantian, entiendeykuwanmi hinaspapas tukuy tiempom kallpanchawan”, nispa.
Kaypi piensariy:
¿Amistadnikikunata kusichiyta munasqaykiraykullachu manaña ñawpaqta hina pachakunki, rimanki hinaspa imatapas ruwanki?
□ Arí
□ Manam
¿Runakunapa mana allin qawasqan sitioman amistadnikikuna risqanraykuchu qampas rinki?
□ Arí
□ Manam
Yuyaymananaykipaq: Kay tapukuykunata leeruspayki “arí” nispaykiqa tayta-mamaykita utaq yuyaqña runakunatam niwaq qatipakunaykipaq hina allin amistadkunata akllanaykipaq yanapasunaykipaq. Jehova Diospa testigonña kaspaykiqa iñiqkunapi punta apaqkunawanmi rimawaq.
KAYMANTAM ASTAWAN YACHANKI MUSU-SIPASKUNAPA YACHAY MUNASQANKUMANTA (2 KAQ) LIBROPA 9 YACHACHIKUYNINPI
¿Haykallapipas warmamasikikuna hikutasurqankichu mana allinkunata ruwanaykipaq utaqchu qampas mana allinkunata ruwayta munarqanki?
[Willakuy]
^ Llapanchikmi pantanchik (Romanos 3:23). Chaymi huk kaqnin amistadniki sunquykita nanarachispan pampachaykunaykipaq nisuptikiqa yuyarinaykim bibliapa kayna nisqanta: “Kuyakuq runaqa maynaña huchatapas pampachanmi”, nispa (1 Pedro 4:8).
BIBLIAPIM NIN
‘Kantaqmi wawqimantapas aswan confiakunaraq amigo’ (Proverbios 18:24)
KAYTAM RUWAWAQ
Kallpanchakuy allinkunata ruwanaykipaq, hinaptinqa chayna kawsakunankupaq kallpanchakuqkunam asuykamusunki. Chayna amistadkunaqa anchatam yanapasunki allin runa kanaykipaq.
¿YACHARQANKICHU?
Jehova Diosninchik lliw runakunata kuyaspanpas, pay kasukuqkunallatam amistadnin kanankupaqqa chaskin (Salmos 15:1-5).
IMATA RUWANAYKIPAQ QILLQAY
¿Imatam ruwayman allin amistadta tarinaypaq? ․․․․․
Kay yuyaq iñiqmasinchikkunatam astawan riqsiyta munani: ․․․․․
Astawan yachanaypaqmi tayta-mamayta kaymanta tapusaq: ․․․․․
QAMQA, ¿IMA NIWAQTAQ?
● Amistadnikikuna, ¿imayna kanantataq munanki?
● ¿Imakunapim kallpanchakunayki qampas allin amistad kanaykipaq?
[Recuadro]
Carlosmi nin: “Tayta-mamaymi niwarqa wakin amistadniykunamanta karunchakunaypaq. Ichaqa paykunalla amistadniy kasqanraykum mana munarqanichu paykunamanta karunchakuytaqa. Tayta-mamayqa allinniypaqmi rimapayawarqa. Tiempopa risqanman hinam cuentata qukurqani achka riqsisqay runakuna ñawpaq amistadniykunamantaqa aswan allin amistadkuna kasqankumanta”, nispa.
[Recuadro]
Kaytawanraq ruway
Tayta mamaykiwan rimay. Paykunata tapuykuy warma kaspanku pikuna amistadninkuna kasqankumanta. Ichayá mana allin amistadninkuna karqa hinaptinqa tapuykuy imaynata mana chaynapi tarikunaykipaq.
Tayta-mamaykiman amistadnikikunata riqsiykachiy. Sunquykipi chayta mana munaspaykiqa piensariy imanasqa mana munasqaykipi. Ichayá amistadnikikunaqa mana allin warmakuna. Chayna kaptinqa kallpanchakuy allin ruwaqkunawan hukllawakunaykipaq.
Amistadniki imatapas willasuptiki uyariykuy. Chayna kaptikiqa yachanqakum kusisqa kananku munasqaykita (Filipenses 2:4).
Amistadniki pantaruptinqa pampachaykuy. Amistadnikikunaqa qam hina pantaqmi, Santiago 3:2 nisqanman hinam ‘llapallanchik pantanchik’.
Amayá qamllapaqchu imatapas munay. Amistadnikikuna imapas ruwayninkuta saqiykuspa munasqaykita ruwanankupaqqa ama obligaychu. Paykunaqa kikinkumantam sasachakuypi kaptikiqa yanapaykusunki (Eclesiastes 4:9, 10).
[Foto]
Amistadnikikunapa nisusqaykita kasukuspaykiqa paykunapa makinpim pukllana hina kawaq hinaspam maymanpas apaykachasunkiman.
Kaykunatapas leeykuy
WARMAKUNAPAQ, MUSU-SIPASKUNAPAQ
Musu-sipaskunam tapukunku
Musu-sipaskunam tapukunku warmi-qari puñuymanta, amistadninkumanta, tayta-mamankumanta hinaspa estudiasqankumanta.
