1, 2. ¿Ima sumaq invitaciontaq ancha valorniyuq kanman hinaspa imatam tapukunanchik?

 ¿MAYQAN invitacion chaskisqaykitaq astawan kusichisurqanki? Yaqapaschá piensachkanki amistadnikipa casarakusqanman rinaykipaq invitasusqaykipi utaq sumaq llamkayta chaskinaykipaq invitasusqaykipi. Haykapipas chayna invitasqa kaspaykiqa ancha kusisqa hinaspa allin qawasqachá sientekurqanki. Ichaqa, chaykunamantapas aswan sumaq invitaciontaraqmi chaskirunki. Lliwmá chayna invitasqaqa karqanchik, chay invitacionta imayna chaskisqanchikmantam vidanchikqa kanqa. Chay invitacionta chaskikuspaqa allintapunim tantiarunchik.

² ¿Ima invitacionmantam rimachkanchik? Tukuy atiyniyuq Jehova Diospa sapallan churin Jesucristopa invitawasqanchikmantam, chaymi tarikun bibliapi. Marcos 10:21 versiculopim Jesus nirqa: ‘Qatiqniy kay’, nispa. Chaynatam sapakamata invitawanchik. Chaymi tapukunanchik: “¿Ima nisaqtaq?”, nispa. Ima nispa contestanapaqqa sutillamá kachkan, ¡pimá manaqa munanmanchu chayna invitasqa “arí” niytaqa! Ichaqa, achka runakunam mana munankuchu. ¿Imanasqa?

3, 4. (1) ¿Imankunataq karqa wiñay kawsaymanta Jesusta tapuq runapa? (2) ¿Imakunapi allin kasqantam Jesus qawarqa chay kamachiq apu runapi?

 ³ Qawasunyá yaqa iskay waranqa wata ñawpaqta huk runa kayna invitacion chaskisqanmanta. Chay runaqa ancha riqsisqa kaspanpas qullqisapa, kamachiq hinaspa musum karqa, chayna kaytaqa yaqa lliwmi munanku. Arí, bibliapa nisqanman hinaqa karqa ‘musum, llumpay ‘apum’ hinaspa allin riqsisqa ‘kamachiqmi’ (Mateo 19:20; Lucas 18:18, 23). Ichaqa chaykunamantapas aswan allinqa karqa pimantapas allin yachachiq Jesuspa willakusqanta astawan uyariy munasqanmi.

⁴ Chay tiempopi yaqa llapallan kamachiqkunaqa manam Jesustaqa respetaqkuchu (Juan 7:48; 12:42). Ichaqa manam paykuna hinachu chay musuqa karqa. Diospa palabranmi willawanchik: ‘Jesus richkaptinmi huk runa kallpaylla asuykuspan ñawpaqninpi qunqurakuykurqa, hinaspam nirqa: “Allin yachachiq, ¿imatataq ruwanay wiñay kawsayta chaskinaypaq?”’, nispa (Marcos 10:17). Qawasqanchikman hinaqa Cristowanmi rimaytapuni munarqa, chaymi runakuna qawachkaptin kallpaylla asuykurqa wakcha utaq sirviente hina. Chaymantapas, respetowanmi Jesuspa ñawpaqninpi qunqurakuykurqa. Arí, humildem karqa, riqsikurqataqmi Diosta necesitasqantapas. Chayna kasqantam Jesusqa anchata valorarqa (Mateo 5:3; 18:4). Chaymi mana admirakunchikchu ‘qawarispan Jesus llakipayarisqanmantaqa’ (Marcos 10:21). Ichaqa, ¿ima nispantaq chay musuta Jesus contestarqa?

5. ¿Ima nispantaq Jesusqa apu musuta contestarqa hinaspa imaynatam yachanchik “kaytaraqmi ruwanayki” nisqanwanqa wakcha kananmanta mana nisqanta? (Qawaytaq willakuytapas).

⁵ Chay apu musutam Jesus contestarqa wiñay kawsayta imayna haypanapaq Jehova Dios ñawpaqmantaraq willachisqanmanta rimaspan. Chaypaqmi Diospa palabranmanta willarqa, chaymi chay musuqa nirqa Moisespa chaskisqan llapan leykuna kasukusqanta. Runakunapa sunquntapas riqsiq kasqanraykum Jesusqa yacharqa chay runata ima sasachasqanta (Juan 2:25). Cuentatam qukurqa iñiyninpi mana allin kasqanta, chaymi nirqa: “Kaytaraqmi ruwanayki”, nispa. ¿Imataq faltarqa? Jesusmi nirqa:“ Rispaykiyá tukuy imaykita rantikamuspayki wakchakunaman quykamuy”, nispa (Marcos 10:21). ¿Diosta servinapaq wakcha kanamantachu Jesusqa nichkarqa? Manam. a Chayna nisqanwanqa rimachkarqa ancha allin kaq ruwaymantam.

6. ¿Imapaqmi Jesusqa invitarqa kamachiq musuta? ¿Sunqunpi ima kasqantam qawachirqa mana aceptasqanwan?

⁶ Chay musuta ima faltasqanta qawachinanpaqmi Jesusqa kaynata invitarqa: ‘Qatiqniy kay’, nispa. ¡Admirakuypaqmi qatiqnin kananpaq Diospa  churinpa invitasqanqa! Chaymantapas kaynatam prometerqa: ‘Hanaq pachapim kapuqnikikuna kanqa’, nispan. Chaytaqa manachá haykapipas chay qullqisapa musuqa piensarqachu. ¿Chayllachu “arí” nirqa Jesus chaynata invitaptin? Bibliapa nisqanman hinaqa “chaynata niykuptinmi llakikururqa, hinaspam achka kapuqniyuq kasqanrayku llakisqallaña pasakurqa” (Marcos 10:21, 22). Hinaptinqa, Jesuspa chayna contestasqanmi chay runapa sunqunpi ima sasachasqanta qawachirqa, payqa kapuqninkunata, autoridadniyuq kayta hinaspa allin riqsisqa kaytam anchata kuyarqa. Llakikuypaqmi, Cristota kuyananmantaqa tukuy kapuqnintam astawan kuyarqa. Chaymi qawachiwanchik imaraq faltasqanta. Jehova Diostawan Jesusta kuyaspanpas manam tukuy sunqumantachu kuyarqa. Chaymi mana aceptarqachu chay sumaq invitacionta. Ñuqanchikqa, ¿invitasqachu kachkanchik?

7. ¿Imanasqataq seguro kachwan sapakamata Jesus invitawasqanchikmanta?

⁷ Jesusqa manam chay kamachikuq musullatachu nitaq wakin runakunallatachu invitarqa, aswanqa lliw runakunatam nirqa: “Pipas qatiwayta munaqqa amaña kikillanpaq kawsaspayá [...] hinalla qatiwachun”, nispa (Lucas 9:23). Qawasqanchikman hinaqa Cristota ciertotapuni qatikuyta munaspaqa llapanchikmi atichwan. Sunqumanta chay ruway munaqkunataqa Diosmi yanapan, hinaspam kallpanchan churinta qatikunankupaq (Juan 6:44). Jesusqa manam apukunallatachu nitaq wakchakunallatachu invitan. Manataqmi huk rikchaq colorniyuqkunallatachu  nitaq huklaw nacionniyuqkunallatachu, aswanqa llapanchiktam invitawanchik. Chaynaqa, ‘qatiqniy kay’ nispaqa sapakamatam invitawachkanchik. Ichaqa, ¿imanasqataq Cristota qatinanchik? ¿Ima ninantaq Cristota qatiyqa?

8. ¿Imatam lliw runakuna necesitanchik hinaspa imanasqa?

⁸ Runakunaqa allin kamachiqtam necesitanchik, chaytaqa yaqa lliw runakunam mana riqsikunkuchu. Dios yanapaptinmi profeta Jeremias chayna kasqanta riqsikuspan nirqa: “Jehova Dioslláy, ñuqaqa sumaqtam yachani, runaqa manam akllakunmanchu maynin puriytaqa. Runapaqqa manam makinpichu maynin puriyta akllakunanpaqqa”, nispa (Jeremias 10:23). Hinaptinqa, runakunaqa allin kamachinakuytaqa manam atinmankuchu, manataqmi chaypaq unanchasqachu kanku. Arí, ñawpaq tiempomantaraqmi runakunaqa mana allinta kamachinakunku (Eclesiastes 8:9). Jesuspa tiemponpi kamachiqkunaqa humilde runakunatam ñakarichiqku hinaspa engañaqku. Chayraykum Jesus nirqa chay humilde runakunaqa “mana michiqniyuq ovejakuna hina kasqankuta” (Marcos 6:34). Chaynatam nichwan kay tiemponchikpi runakunamantapas. Lliwmi necesitanchik respetana hinaspa confianza kamachiwaqninchikta. ¿Yaqachu Jesus chayna kamachiq kanman? Chaymantayá qatiqninpi yachaykusun.

9. ¿Imanasqataq Jesusqa mana wakin kamachiqkuna hinachu?

 ⁹ Jesusqa Jehova Diospa akllasqanmi. Yaqa lliwmi kamachiqkunaqa pantaq runamasinkupa akllasqan kanku, chaymi engañaspanku mana allinllata ruwanku. Jesusmi ichaqa mana paykuna hinachu, chaytam qawachin Cristowan sutichasqa kasqan. Cristo utaq Mesias ninanqa ‘akllasqa’ ninanmi. Llapallan kamachiq Diosmi Jesustaqa akllarqa utaq nombrarqa munayninta ruwananpaq. Chaymi churinmanta Jehova Dios kaynata nirqa: “Paymi akllasqay serviwaqniy, paytam kuyani, payraykum kusisqa kachkani. Atiyniytam qusaq”, nispa (Mateo 12:18). Imayna kamachiqta necesitasqanchiktaqa unanchawaqllanchikmi yachan. Chaymi ancha-ancha yachayniyuq Jehova Diospa akllasqanpi confiakuchwan (Proverbios 3:5, 6).

10. ¿Imanasqataq Jesusqa allin qatikunapaq?

¹⁰ Jesusqa allin qatipakunapaqmi. Allin kamachiqqa admiranapaq hinaspa qatipakunapaq hina sumaq kayniyuqkunam. Imayna kasqanwanmi yachachin hinaspa yanapan aswan allin runa kanankupaq. ¿Kamachiqpa imayna kasqantaq yanapawanchik astawan respetanapaq? ¿Mana manchakuq kasqanchu? ¿Yachayniyuq kasqanchu? ¿Llakipayakuq kasqanchu icha sasachakuykuna kaptinpas mana hukmanyaq kasqanchu? Jesuspa kay pachapi kawsasqanmanta yachaspanchikmi qawasun chayna sumaq kayniyuqkuna kasqanmanta. Hanaq pachapi taytanman rikchakusqanraykum allintapuni qawachirqa Diospa sumaq kayninkunata. Imapipas mana pantaqmi karqa. Chaymi ima ruwasqanpas, rimasqanpas  hinaspa hukkunamanta sientisqanpas allinpuni qatipakunapaq. Bibliam niwanchik allin ‘qatipakunapaq’ kasqanta (1 Pedro 2:21).

11. ¿Imaynatam Jesus qawachirqa “allin michiq” kasqanta?

¹¹ Jesusqa “allin michiq” kasqantam qawachirqa (Juan 10:14). Chayna michiqkuna imakuna ruwasqantaqa allintam yachaqku chay tiemponpi runakunaqa. Yacharqakum michiqkunaqa ovejankuta cuidanankupaq achka ruwayniyuq kasqankuta. Allin michiqqa imamantapas astawanqa ovejantam cuidanan karqa. Chaytam ruwarqa Jesuspa abuelon rey Davidpas, payqa musu kaspanmi achka kutipi vidantapas peligroman churaspan purun animalkunamanta ovejanta cuidarqa (1 Samuel 17:34-36). Jesusmi ichaqa qatiqninkunarayku aswan mastaraq ruwarqa. Paykunaraykum vidanta qurqa (Juan 10:15). ¿Pi kamachiqtaq vidantapas Jesus hina qunman?  

12, 13. (1) ¿Imakunatam michiqqa ovejankunamanta yachan? ¿Imaynatam ovejapas michiqninta riqsin? (2) ¿Imanasqataq munanki allin michiq Jesucristo cuidasunaykita?

¹² Jesusqa qawachirqataqmi “allin michiq” kasqantaqa rimasqanwanpas, chaymi nirqa: “Ovejaykunataqa riqsinim, ovejaykunapas riqsiwanmi”, nispa (Juan 10:14). Piensasunchik Jesuspa chayna nisqanpi. Achka runakunapaq ovejakuna millwasapa animalkunalla kaptinpas, michiqninpaqqa manam chaynachu. Michiqninqa sapakamatam riqsin. Riqsinmi wacharuspan mayqin yanapana necesitasqanta, unquqkunata chaynataq naceqchakunamanta mayqannin marqana kaqkunatapas. Ovejakunapas  michiqnintaqa riqsinmi, voznintapas riqsinmi, manataqmi pantanchu hukpawanqa. Peligro kaptin michiqnin qayakuptinpas chayllam kasukunku. Chaymantapas, Jesuspa kasqan lawpi ovejakunaqa michiqnintam qatinku mayman riptinpas. Michiqqa yachanmi sumaq pastokuna, chuya yakukuna hinaspa hawka sitiokuna maypi kasqanta. Michiqnin cuidaptinmi ovejakunaqa hawka tarikunku (Salmos 23).

¹³ ¿Pitaq mana munanmanchu chayna cuidasqa kayta? Allin michiq Jesusmi qawachin qatiqninkunata chayna cuidasqanta. Paymi prometewanchik sapakamata pusawaspanchik kusikuyta hinaspa hawkayayta kunan tiempo quwananchikpaq, hamuq tiempopiñataq wiñay kawsayta quwananchikpaq (Juan 10:10, 11; Apocalipsis 7:16, 17). Chaynaqa, yachananchikmi Cristota qatikuy ima ninan kasqanta.

14, 15. ¿Imanasqam “cristianom kani” utaq “Cristotam kuyani” nispallaqa mana Jesustaqa qatichwanchu?

¹⁴ Wara-waranqantin runakunam ninku Cristopa invitacionninta chaskikusqankuta hinaspa cristiano kasqankuta. Yaqapaschá tayta-mamankupa bautizachisqanku religionpipas hinallaraq kachkanku. Ninkutaqmi Cristota kuyasqankutapas chaynataq salvaqninta hina chaskisqankutapas. Ichaqa, ¿chiqaptachu Cristota qatikuchkanku? ¿Chayllata ruwanankumantachu Jesusqa rimachkarqa qatinankupaq  invitaspanqa? Manamá chayllamantachu rimachkarqa.

¹⁵ Piensasun cristianotukuqkunapi, paykunam ninku Cristopa qatiqnin kasqankuta. Ichaqa, ¿Jesuspa yachachisqanman hinachu ruwanku icha wakin runakuna hinachu chiqnikuq, suwakuq hinaspa mana allin ruwaqkuna kanku?

16, 17. ¿Imaraqtaq faltan cristianotukuqkunata? ¿Imaynam kanku Cristopa chiqap qatiqninkunaqa?

¹⁶ Jesuspa nisqanman hinaqa chiqap qatiqninkunaqa ruwasqankuwanmi riqsisqa kananku karqa, manam “Cristotam qatikuni” nisqallankuwanchu. Chaymi Jesusqa huk kutipi nirqa: “Manam ‘¡señorlláy, señorlláy!’ nispa llapallan niwaqniykunachu Diospa gobiernonmanqa yaykunqa, aswanqa hanaq pachapi taytaypa munasqanta ruwaqkunallam”, nispa (Mateo 7:21). ¿Imanasqam achka runakuna Jesusta ninku “señorlláy” nispanku ichaqa Diospa munasqantañataq mana ruwankuchu? Yaqa chay kamachiq apu musu hina kasqankuraykum. ¿Imaraqtaq paykunataqa faltan? Paykunaqa manam tukuy sunqunkuwanchu kuyanku Jesustaqa nitaq kachamuqnin taytantapas.

¹⁷ ¿Imanasqataq chaynata ninchik? ¿Manachu wara-waranqantin cristianotukuqkuna ninku Cristota kuyasqankuta? Arí, ninkum. Ichaqa Jesustawan Jehova Diostaqa kuyana manam rimaspallachu. Jesusmi nirqa: “Pipas kuyawaspanqa nisqaykunatam kasukunqa”, nispa (Juan 14:23). Nirqataqmi: “Ovejaykunaqa ecoytam uyarin, ñuqapas paykunataqa riqsinim, paykunaqa qatiwantaqmi”, nispa (Juan  10:27). Qawasqanchikman hinaqa, Jesusta chiqap kuyasqanchiktaqa qawachinchik manam sientisqallanchikwanchu nitaq rimasqallanchikwanchu, aswanqa ruwasqanchikpiwanmi.

18, 19. (1) ¿Imaynatam yanapawananchik Jesusmanta yachasqanchik? (2) ¿Imapaqmi kay libro ruwasqa kachkan hinaspa imaynatam yanapanqa unay tiempoña Cristo qatisqankuta piensaqkunatapas?

¹⁸ Ruwasqanchikkunam qawachin sunqunchikpi imayna kasqanchikta. Chaymi kallpanchakunanchik allin sunquyuq kanapaq. Jesusmi nirqa: “Wiñaypaqqa kawsanqaku sapallan chiqap Dios kasqaykita riqsiqkunam chaynataq kachamusqayki Jesucristota riqsiqkunam”, nispa (Juan 17:3). Jesusmanta chiqap yachasqanchikpi yuyaymanasqanchikmi yanapawasun. Sapa punchawmi Cristota astawan kuyasun chaynataq hinalla qatiytapas astawan munasun.

¹⁹ Chaypaqmi kay libro ruwasqa kachkan. Manam Jesuspa predicasqanmantawan vidallanmantachu rimachkan, aswanqa payta imayna qatikunamantawanmi. b Ruwasqaqa kachkan Diospa palabranpi espejopi hina qawakuspa: “¿Chiqaptachu Jesusta qatikuchkani?”, nispa tapukunapaqmi (Santiago 1:23-25). Yaqapaschá piensanki unay tiempoña allin michiq Jesusta qatikusqaykita. Ichaqa atichwanmi imapipas aswan allin kayta. Bibliam niwanchik: ‘Hinallayá qawakuy iñiynikipi allin utaq mana  allin kasqaykita’, nispa (2 Corintios 13:5). Allin michiq Jesusta qatisqanchikmanta segurakunapaq kallpanchakuyqa allinmi, paypa makinpim Jehova Dios churawarqanchik.

20. ¿Imamantam yachasun qatiqnin yachachikuypi?

²⁰ Munanikum kay librota estudiaspa Jesustawan Jehova Diosta astawan kuyanaykita. Chayman hina kawsaspaykiqa mana allin ruwaqkunapa kasqanpipas ancha kusikuytawan hawkayaytam tarinki. Chaymantapas, wiñaypaqmi kawsanki allin michiq quwasqanchikmanta Diosta alabaspa. Jesusmanta yachanapaqqa entiendenanchiktaqmi Diospa munaynin cumplikunanpaq ima ruwayniyuq kasqanmantapas. Chaymantam 2 kaq yachachikuypi yachasun.