Diosta mañakuymanta: ¿Imanasqataq Diosta mañakunanchik?

QALLARINMANMI

DIOSTA MAÑAKUYMANTA. Achka runakunam kaymanta yachayta munanku, chaymi kay qillqapi yachachkasunchik runakuna imayna mañakusqankumanta hinaspa bibliapa nisqanman hinaqa imayna mañakunamanta. Kay yachachikuykunam yanapawasun allinta mañakunanchikpaq, manaraq mañakuqkunatañataq mañakuyta qallarinankupaq.

YAQA llapallan runakunam maypi kaspankupas Diostaqa mañakunku. Wakinkum mañakunku iglesiankupi utaq may huñunakunanku wasikunapipas. Servichikunkutaqmi rosarionkuta, mañakunanku libronkuta utaq imatapas. Wakinpim mañakunku sapallanku, wakinpiñataqmi huñunasqa.

^ par. 5 Kay qillqapi ñawpaq testamentoqa Chuya Qellqa sutiyuq bibliamantam kachkan.

Jehova Diosqa tukuy rikchaq animalkunatam unancharqa. Paykunapas mikuspa, yakuta tomaspa hinaspa wayrawanmi kawsakunku ñuqanchik hina, ichaqa runakunallam Diostaqa mañakunchik (Eclesiastes 3:19) *. ¿Imanasqa?

Runakunaqa mañakunku Diosman asuykuyta munasqankuraykum. Bibliapas niwanchikmi chaynapaq unanchasqa kasqanchikta (Eclesiastes 3:11). Chaymi Jesus kaynata nirqa: “Mayna kusisqam Diosta maskaqkunaqa”, nispa (Mateo 5:3).

Runakunaqa Diosta maskasqankuraykum achka iglesiakunata hatarirachinku, hinaspam anchata tiempochakunku mañakunankupaq. Wakin runakunañataqmi hawka tarikuyta munaspanku sapaq runakunapa yanapakuyninta maskanku. Runakunaqa wañuqllam kanchik hinaspapas manam sumaqtaqa imamantapas yachayta atichwanchu chayraykum hawkalla kanapaqqa mana yanapanakuytaqa atichwanchu. Tukuy atiyniyuq hinaspa yachayniyuq Diosllam hawka kawsakunanchikpaqqa yanapaykuwachwan. ¿Ima llakikuna qatiwaptinchiktaq Diosta mañakuyta munanchik?

¿Yaqachu haykapipas tarikurqanki mana pipapas yanapaykuy atisqan? Arí, chaynam tarikunchik wakinpiqa pi kuyasqanchik ayllunchikpas wañukuptin, allinta kawsakunapaq yachayta munaspa hinaspa ima mana allintapas ruwaruspanchik. Chayna tarikuptiki pipas rimapayaykusuptiki utaq consejaykusuptiki, ¿hinallachu llakisqa utaq hukmanyasqa tarikurqanki?

Bibliam niwanchik chayna tarikuptinchik Diosta mañakuylla anchata yanapawasqanchikmanta. Bibliapim willawanchik achka qarikuna hinaspa warmikuna sasachakuypi tarikuspanku Diosta mañakusqankumanta. Paykunam mañakurqaku Dios consuelaykunanpaq, allinta kawsakunankupaq hinaspa ima pantasqankumantapas pampachasqa kanankupaq, chaynallataq imakunapas kasqanmanta yachaykachinanpaq (Salmo 23:3; 71:21; Daniel 9:4, 5, 19; Habacuc 1:3).

Chay Diosman sunqu runakunaqa yacharqakum pita mañakuyta. Kay tiemponchikpi runakunam ichaqa mana yachankuchu. Chaymantam qatiqninpi yachaykuchkasun.