YAQA llapallan runakunam ninku imaynataña mañakuptinkupas Dios uyarisqanmanta. Religionkunapi punta apaqkunapas, chaynataq llapallan religionkuna allin kasqanta niqkunapas chaynatam ninku, ichaqa ¿chaynachu?

Bibliam nin Diosta mana mañakuptinchikqa mañakusqanchik yanqa kasqanta, biblia qillqasqanku tiempopim runakunaqa mañakuqku taytacha-mamachakunata, Jehova Diosmi ichaqa achka kutikama llaqtanta nirqa ama chayta ruwanankupaq. Salmos 115:4-6 * taytachakunamanta rimaspan nin: ‘Rinriyuq kaspapas manam uyarinkuchu’, nispa. Bibliapa kayna nisqanqa sutillatam qawachiwanchik taytacha-mamachakunata mañakuyqa yanqa kasqanta.

Chayna kasqanta yachaykunapaq qawaykusunchik Eliaspa tiemponpi ima pasakusqanmanta. Eliasmi Baal taytacha serviqkunata nirqa taytachankuta mañakunankupaq payñataq Diosninta mañakunanpaq chaynapi ciertotapuni pim kawsaq Dios kasqanta yachanankupaq, chaymi Baal taytachata yupaychaqkunaqa “arí” nispanku taytachanku mañakuyta qallaykurqaku. Ichaqa “manam imallatapas uyarirqakuchu manataqmi pipas contestamurqachu” (1 Reyes 18:29).

Elias mañakuyta tukuykuptillanmi ichaqa hanaq pachamanta Dios ninata kachaykamurqa qusqan ofrendapa qawanman, ¿imanasqataq Diosqa Eliaspa mañakusqanta uyariykurqa? 1 Reyes 18:36, 37 Eliaspa imayna mañakusqan qillqasqa kachkan, chaypim sutillata qawanchik kimsa kutikama Jehova Diospa sutinta rimasqanta.

Baal taytachaqa, Canaan llaqtayuq runakunapa taytachanmi karqa. Paytaqa sapa llaqtapim imaymana sutiwan riqsirqaku, Jehova Diospa sutinmi ichaqa chullalla enteron allpa pachapi. Kikinmi bibliapi nin: “Ñuqaqa kani Jehovam. Chaymi sutiy. Manam munanichu ñuqamanta hukta pitapas yupaychanankutaqa”, nispa (Isaias 42:8, TNM).

Chaynaqa, ¿Baal taytachata serviqkunapa mañakusqantaqa Jehova Dios uyarinmanchu karqa? Manam. Baal taytachata serviqkunaqa taytachankupaqmi runakunata wañuchiqku, hinaspam millakuypaq kaqkunata ruwaqku. Jehova Diosmi ichaqa serviqninkunata yachachirqa allinta kawsakunankupaq hinaspa millakuypaq kaqkunataqa ama ruwanankupaq. Jehova Diosqa manam Baal taytachata yupaychaqkunapa mañakusqankutaqa uyarinmanchu karqa. Kaypi piensarisun. Kuyasqayki amistadnikiman sutinpi cartata apachiwaq hinaptinqa manam huk mana allin kawsakuq runamanqa quykunmankuchu, ¿aw?

Jehova Diosta mañakuspaqa unanchawaqninchik Diostam mañakuchkanchik. * Bibliata qillqaq Isaiaspas nirqam: “Jehova Diosllayku, qamqa taytaykum kanki”, nispa (Isaias 63:16, TNM). Jesuspas qatiqninkunatam nirqa: “Richkanim taytayman hinaspa qamkunapapas taytaykichikman, Diosniyman hinaspa qamkunapapas Diosnikichikman”, nispa (Juan 20:17). Jehova Diosqa Jesuspa taytanmi. Paytam Jesusqa mañakurqa, chaymi qatiqninkunatapas Jehova Diosta mañakunankupaq yachachirqa (Mateo 6:9).

¿Bibliaqa yachachinchu Jesusta, Mariata utaq angelkunatapas mañakunanchikpaq? Manam. Jehova Diosllatam mañakunanchikqa. ¿Imanasqa? Bibliapim yachachiwanchik Jehova Diosllata yupaychananchikpaq (Exodo 20:5). Chaymantapas payllam “pipapas mañakusqantaqa” uyariykun (Salmo 65:2). Jehova Diosqa imatapas ruwanankupaq hukkunata valekuspampas, mañakusqanchiktaqa kikinpunim uyariykun.

Mañakusqanchikta Jehova Dios uyariykunanpaqqa paytam sutinpi mañakunanchik, bibliam nin: “Pipas Jehova Diosta sutinmanta ruegakuspa mañakuqmi ichaqa salvasqa kanqa”, nispa (Hechos 2:21). Chaynaqa, ¿paypa sutinpi lliw mañakusqankutachu Diosqa uyarin, icha imaynatawanraqmi mañakuchwan? Chaymantam qatiqnin yachachikuypi yachaykusun.