QAWAY kay familiata. Paykunam Jacobpa 12 qari churinkuna. Paypaqqa warmi churinkunapas karqataqmi. ¿Yachankichu wakin churinkunapa sutillantapas? Wakillanmantapas yachaykusunchikyá.

Lea wachakurqa Ruben, Simeon, Leviy hinaspa Juda sutiyoq wawakunata. Raquelñataqmi wawata mana wachakuspan llumpayta llakikurqa. Chaymi sirvientan Bilhata Jacobman qoykurqa, payñataqmi wachakurqa Dan hinaspa Neftaliy sutiyoq wawakunata. Leañataqmi sirvientan Zilpata Jacobman qoykurqa, paymi Gad hinaspa Aser sutiyoq wawakunata wachakurqa. Chaymantapas, Leaqa wachakurqa Isacar hinaspa Zabulon wawakunataraq.

Raquelmi chayraq wawata wachakurqa. Hinaspam Joseywan suticharqa. Chaymantañam astawan Joseymantaqa yachasunchik, paymá ancha reqsisqa runa karqa. Kay 11 Jacobpa churinkunaqa nacerqaku Raquelpa taytan Labanpa wasinpi Jacob yachachkaptinraqmi.

Jacobpaqa karqa warmi churinkunapas, Bibliam ichaqa willan huknillanmanta. Paytam Dina nispa suticharqaku.

Hinaptinmi Labanta saqenanpaq hinaspa Canaan lawman kutinanpaqña Jacobqa alistakurqa. Chaymi, familianta chaymanta ovejankunata hinaspa animalninkunata hatajontinta huñururqa, hinaspam illayta qallarirqa.

Jacob familiantin Canaan lawman kutiramuspanku illamuchkaptinkum, Raquelqa huk wawatawan wachakurqa. Hinaptinmi Raquelqa ñakarispa wachakuchkaspa wañururqa. Wawacham ichaqa allinlla kachkasqa. Jacobñataqmi payta suticharurqa Benjaminwan.

Yuyariyta munanchikmi Jacobpa 12 churinkunapa sutinta, Israel nacionmi paykunapa mirayninmi karqa. Israel nacionpi 12 ayllukunataqa Jacobpa chunka churinkunapa hinaspa Joseypa iskay churinkunapa sutinwanmi suticharurqaku. Isaacqa achka watatam kawsakurqaraq kay warmachakuna nacesqankumantaqa, hinaspa kusikurqachá achkallaña willkankuna kaptin. Qawasunyá willkan Dinata ima pasasqanta.