BIBLIAPIQA Rut sutiyoq librotam tarinki. Chayqa Israel llaqtapi juezkuna gobiernasqan tiempopi huk ayllumanta willakuymi. Rutqa Moab nacionniyoq warmim karqa; manam Diospa llaqtan Israel casta warmichu. Jehová Diosmanta Rut yacharuspanmi ichaqa sinchillataña Diostaqa kuyarqa. Noemiyñataqmi yuyaq warmi karqa, paymá Ruttaqa Jehová Diosmanta yachananpaq yanaparqa.

Noemiyqa Israel casta warmim karqa. Paymi qosanwan chaynataq iskaynin wawankunapiwan Moab casta runakunapa allpanman ripukurqaku Israel nacionpi muchuy kaptin. Hinaptinmi Noemiypa qosanqa wañukurqa. Chaymantam, iskaynin qari wawankuna Moab nacionniyoq Orfa hinaspa Rut sutiyoq warmikunawan casarakurqaku. Yaqa 10 wata pasaruptinmi, Noemiypa iskaynin qari wawankuna wañukurqaku. ¡Ay, imaynaraq karqa pobrella! ¿Imatam Noemiyqa ruranman karqa?

Chaymantam Noemiyqa karuta illaspan llaqtamasinkunaman kutikurqa. Paytam Rut hinaspa Orfa kuyapayaspanku, paywan rirqaku. Ichaqa richkaptinkum Noemiyqa iskaynin llumchuyninkunata nirqa: ‘Kutikuychikyá sapakama mamaykichikpa wasinman’ nispa.

Hinaptinmi Noemiyqa iskayninta muchaykarispan rakinakurqa. Chaymi paykunaqa qaparispa waqarqaku Noemiyta kuyaspanku. Hinaspa nirqaku: ‘¡Ñoqaykuqa qanwanmi ripusaqku llaqtaykiman!’ nispa. Hinaptinmi Noemiyñataq nirqa: ‘Kutikuychikyá wawallaykuna llaqtaykichikpim aswan allinqa kankichik’ nispa. Hinaptinmi Orfa llaqtanman kutikurqa. Rutñataqmi suegranwan qeparurqa.

Hinaptinmi Noemiyqa Rutta nirqa: ‘Waqaya Orfa kutikun. Chaynayá qampas kutikuy’ nispa. Ichaqa Rutmi nirqa: ‘¡Ama ruegawaychu qanmanta rakikuspa kutikunaypaq! Maymi risqaykimanmi ñoqapas risaq, maymi yachasqaykipim ñoqapas yachasaq, aylluykikunam ñoqapa aylluy kanqa, Diosnikipas ñoqapa Diosniymi kanqa, maypim wañukusqaykipim ñoqapas wañukusaq, chaypitaqmi pampakusaqpas’ nispa. Noemiyqa chayta Rutmanta uyariruspan manaña hikutarqachu kutikunanpaq.

Chaynapimá iskaynin warmikuna Israel llaqtaman chayaruspa chaypiña yachakurqaku. Chayllam Rutqa llamkayta qallarirqa chakrapi cebada rutuy tiempoña kaptin. Booz sutiyoq runam chakranpi cebadata pallapakunanpaq mana harkarqachu. ¿Yachankichu pitaq Boozpa mamanqa karqa? Jerico llaqtamanta Rahab sutiyoq warmim karqa.

Hinaptinmi Boozqa Rutman nirqa: ‘Yachaniñam imaynam Noemiywan vida pasasqaykita. Yachanitaqmi tayta-mamaykitapas hinaspa nacekusqayki llaqtaykitapas saqemuspa mana reqsisqayki llaqtaman hamusqaykita. Jehová Diosyá qanman llumpayta pagapusunki’ nispa.

Rutñataqmi nirqa: ‘Taytáy, ñoqallaytaqa favoreceykuwanki. Kuyakuywan rimapayaykuwaspaykim kallpanchaykuwanki’ nispa. Boozqa Rutta kuyaspan paywan casarakurqa. ¡Maynataraq kayqa Noemiyta kusichirqa! Noemiyqa astawanmi kusikurqa Boozpa Obed sutiyoq churinta Rut wachakuptin. Chaymantañataqmi Obedqa Davidpa abuelon karqa, Davidmantaqa chaymantaña astawan yachasunchik.