JESUSMI Olivos moqopi kachkan. Paypa ladonpi tawa runakunañataqmi apostolninkuna. Paykunaqa Andreswan Pedrom wawqepura chaynataq Jacobowan Juan wawqepura. Chay karupi rikukuq hatun palacioqa Jerusalen llaqtapi Diospa templonmi.

Ñam iskay punchawña pasarun Jerusalen llaqtaman asnopi Jesuspa yaykusqanmanta. Martes punchawñam. Chay punchawllapim Jesusqa templopi kachkarqa. Chaypim sacerdotekunaqa wañurachinankupaq hapiyta munarqaku. Ichaqa Jesusqa runakunapa agradonpaq kasqanta qawaspanku mana imanarqakupaschu.

Chaymi Jesusqa sacerdotekunata nirqa: ‘¡Culebrakuna, culebrapa castankuna!’ nispa. Hinaspam nirqa mana allinkunata rurasqankumanta Dios castigananta. Chaymantam Olivos moqoman rirqa, hinaptinmi chay tawa apostolninkunaqa Jesusta tapurqaku. Yachankichu, ¿imakunatam tapuchkanku?

Hamuq tiempopi imakuna pasananmantam tapuchkanku. Yachankutaqmi kay Allpapi mana allin ruraykunata Jesus tukuchinanta. Ichaqa yachayta munachkanku haykapitaq chaykuna kananta. Chaynaqa, ¿haykapitaq Jesusqa Rey hina kamachikamunqa?

Jesusqa yachanmi Allpapi discipulonkunaqa paypa kutimusqantaqa mana rikunankuta. Hanaq pachapi kaspanmi paykunapaqqa mana rikuy atina kanqa. Chaymi payqa hanaq pachapi kamachikuchkaptin kay Allpapi imakuna pasananta apostolninkunaman willarqa. ¿Imakunataq chaykunaqa?

Jesusmi nirqa guerrakunawan, onqoykunawan hinaspa muchuspanku runakuna kanankuta chaynataq wañuchinakuykuna hinaspa terremotokuna kananmantapas. Nirqataqmi Diospa munaychakusqanmanta allin noticia enterollan kay Pachapi willakusqa kananmantapas. Chaykunaqa, ¿pasachkanchu kay tiemponchikpi? ¡Chaynamiki! Cheqaptapunim Jesusqa ñam kamachikuchkanña hanaq pachapi. Chayllam Allpapiqa mana allin ruraykunata tukuchinqaña.