KAYPIM apostol Pedroqa sayarayachkan, qepanpiñataqmi amigonkuna kachkan. Ichaqa, ¿imanasqataq Pedropa ñawpaqninpi runaqa qonqorakuchkan? ¿Allinchu chayna rurasqanqa? ¿Yachankichu pitaq payqa?

Chay runapa sutinqa Corneliom. Payqa Roma nacionpa tropankunapa capitanninmi. Cornelioqa manam Pedrota reqsirqachu, ichaqa kamachisqa karqa wasinman Pedrota pusachimunanpaq. Qawasunchikyá imaynam chayna karqa.

Jesuspa punta kaq qatiqninkunaqa judiokunam karqaku, Corneliom ichaqa manam judiokunapa castanmantachu karqa. Payñataq Diosta manchakuspa serviq, runakunata yanapaq hinaspam tukuy tiempo Diosta mañakuq. Huk punchawmi tarden lawta huk angel rikuriykuspan nirqa: ‘Diospa agradonpaqmi kanki hinaspa mañakusqaykitam chaskiykun. Kunanyá runakunata Jope llaqtaman kachay Pedrowan sutichasqa runata pusamunankupaq. Payqa lamar qochapa patanpi Simonpa wasinpim kachkan’ nispa.

Hinaptinmi chaypunilla Cornelioqa runankunata kacharqa. Paqarinnintinta Pedroqa seqarqa Simonpa wasinpa altonman. Chaypim Diosqa Pedrota revelacionninpi rikuchirqa hanaq pachamanta lliklla hina uraykamuqta. Chay llikllapim karqa imaymana animalkuna. Diospa leynin nisqanman hina kay animalkunaqa manam mikunapaqchu karqa, ichaqa kayna niqta uyarirqa: ‘Hatariy Pedro, wañuchispa mikuy’ nispa.

Chaymi Pedroñataq nirqa: ‘Manapunim mikuymanchu. Ñoqaqa haykapipas manam mikurqanichu mana mikuna kaqkunataqa’ nispa. Chaymi payta huktawan nimurqa: ‘Mikunapaqmi nispa Diospa nisqankunataqa amayá niychu: Manapunim mikunapaqchu nispaqa’ nispa. Kimsa kutikaman chaynata uyarirqa. Hinaspam Pedroqa chayna uyarisqanmanta tapukuchkaptin, wasiman chayaykamurqaku Pedrota maskastin Corneliopa kachamusqan runakuna.

Chaymi uraykuspan Pedro nirqa: ‘Ñoqam kani qamkunapa maskasqaykichik. ¿Imamantaq hamurqankichik?’ nispa. Hinaptinmi runakunaqa willakurqaku Cornelioman Diospa angelnin nisqan hina Pedrota wasinman qayachinanpaq, chaymi Pedroqa rinantam nirqa. Paqarinnintintam Pedroqa amigonkunapiwan Cesarea llaqtaman Corneliopa wasinman pasarqa.

Cornelioñataqmi ayllunkunatawan kuyasqan amistadninkunata huñuruspan Pedrota suyachkasqa. Hinaptin Pedro chayaykuptinmi, Cornelioñataq Pedropa ñawpaqninman qonqorakuykurqa qawasqaykiman hina. Ichaqa Pedrom nirqa: ‘Sayariy, ñoqapas qam hina runallam kani’ nispa. Chaynamá, Bibliaqa sutillatam qawachin runakunaman qonqorakuykuspa adorayqa mana allin kasqanta. Jehová Diosllatam yupaychananchikqa.

Hinaptinmi Pedroqa wasipi kaqkunata predicarqa. Nirqataqmi: ‘Diosqa chaskinmi lliw nacionkunapi payta serviy munaqta’ nispa. Chaynata Pedro rimachkaptinraqmi Diospa chuya espiritun hamurqa lliw uyariqninkunaman, hinaptinmi rimayta qallarirqaku mana yachasqanku idiomakunapi. Chaymi Pedrowan riq judio kaq discipulokunaqa llumpayta admirakurqaku judio kaq runakunallaman Diospa yanapasqanta piensaspanku. Kayqa paykunata musyachirqa Diosqa ima castatapas huk kaqnin castakunamantaqa aswan allinta hinaqa mana qawasqanta. ¿Manachu ñoqanchikpas chayta yuyarinanchik?