KAY runakunaqa Jesuspa discipulonkunam. Jesusta kasukuspanku Jerusalenpi qepakurqaku. Llapallanku huñunasqa kachkaptinku wasiqa qapariyllawanña huntariykurqa. Wayra hina hamuruspa qonqayllata uyarikurqa. Hinaptinmi sapakamapa umankupa hawanpi nina hina lenguachkaq rikuriramurqa. ¿Rikuchkankichu sapakama discipulokunapa umanpi lenguachkaq ninata? ¿Imataq chayqa?

¡Milagromá kayqa! Jesusqa hanaq pachapim Taytanwan kachkan, hinaspa chaqchurimuq hina chuya espirituta qatiqninkunaman kachamuchkan. ¿Yachankichu imata ruranankupaqtaq chuya espirituqa paykunata kallpancharqa? Llapallankum mana yachasqanku idiomakunapi rimayta qallaykurqaku.

Jerusalen llaqtapi wayra hina qapariqta uyariruspankum lliw runakuna huñunakaramurqaku chay lugarman. Wakin runakunaqa huklaw nacionkunamantam hamurqaku Pentecostes fiestapi kanankupaq. ¡Maynataraqmi kay watukuqkunaqa admirakurqaku! Sapakamapa rimayninkupim Diospa yachachikuyninkunata discipulokuna rimasqankuta uyarirurqaku.

Chay huklaw nacionkunamanta runakunam ninakurqaku: ‘Kay rimaqkunaqa lliwchankum Galilea law runakuna. ¿Imaynanpimá achka nacionkunamanta kaspanchik sapakamapa rimayninchikpiqa rimaqta uyarinchik?’, nispa.

Hinaptinmi Pedro sayariykuspan qayakuq hina runakunaman willarqa imaynatam Jesusta wañurachirqaku, hinaptin Jehová Dios wañuymanta kawsarichimusqantapas. Nirqataqmi: ‘Kunanñataq Jesusqa hanaq pachapi Diospa alleqnin lawnillanpim kachkan. Hinaspa prometekusqanman hina chuya espirituta kachamurqa. Chaytam qawachkankichik hinaspa uyarichkankichik’ nispa.

Pedropa nisqanta uyariruspanku runakuñataq sonqonkupi llumpayta llakikururqaku Jesusta wañuchisqankumanta, hinaspa tapurqaku: ‘¿Imatataq rurallasaqku?’ nispa. Pedroñataqmi nirqa: ‘Huchaykichikmanta wanakuspaykichik bautizachikuychik’ nispa. Hinaptinmi chay punchawllam 3.000 runakuna bautizakuspanku Jesuspa qatiqninkunaña karqaku.