Kamachiq Pilatomanmi riqsisqa sacerdotekuna Jesusta pusarurqaku, chaymi Pilato paykunata tapurqa: “¿Imatataq kay runa ruwarun?”, nispa. Paykunañataqmi nirqaku: “‘Kamachiqmi kani’ niwankum”, nispa. Hinaptinmi Jesusta Pilato tapurqa: “¿Judiokunapa kamachiqninchu kanki?”, nispa. Jesusñataqmi nirqa: “Gobiernoyqa manam kay pachapi kamachiqkunapa hinachu”, nispa.

Chaymantam Pilatoqa Galilea llaqta kamachiq Herodesman ­Jesusta pusachirqa. Herodespas Jesus mana huchayuq kaptinmi yapamanta Pilatoman kutichirqa, chaymi Pilatoqa runakunata nirqa: “Ñuqapaqpas Herodespaqpas Jesusqa mana huchayuqmi, chaymi kacharisaq”, nispa. Runakunam ichaqa qaparispa nirqaku: “¡Wañuchiy! ¡Wañuchiy!”, nispanku. Hinaptinmi soldadokuna Jesusta waqtarqaku, tuqarqaku hinaspa maqarqaku. Chaymantapas kichkamanta coronatam umanman churarurqaku, hinaspankum asikuspa nirqaku: “¡Rimaykullaykiku judiokunapa kamachiqnin!”, nispa. Yapamantam Pilatoqa runakunata nirqa: “Manam ima huchantapas Jesuspataqa tarinichu”, nispa. Chaywanpas runakunam nirqaku: “¡Qirupiyá wañuchun!”, nispanku. Chaymi Pilatoqa runakunaman Jesusta quykurqa wañuchinankupaq.

Hinaptinmi runakunaqa Golgota lawman Jesusta pusarurqaku, hinaspam qirupi clavowan takaruspanku warkururqaku. Jesusñataqmi taytanta mañakuspan nirqa: “Taytáy pampachaykuyá, paykunaqa manam yachankuchu imam ruwasqankutaqa”, nispa. Runakunam asikuspa nirqaku: “¡Diospa churin kaspaykiqa qirumanta uraykamuspayá librakuy!”, nispa.

Jesuspa sapa law waqtanpim warkusqa karqa mana allin ruwaq runakuna, hukninmi Jesusta nirqa: “Kamachiqña kaspaykimá yuyarillawanki”, nispa. Hinaptinmi Jesus nirqa: “Ñuqawanmi sumaq huertapi kanki”, nispa. Tardenñataqmi kimsa hora tutayarurqa. Jesuspa wakin qatiqninkunawan maman Mariam Jesusta qawaspanku qiparurqaku. Chaypim apostolnin Juanta Jesus mañakurqa mamanta hina Mariata qawananpaq.

Wañukunanpaqñam Jesus nirqa: “¡Ñam ruwasqaña!”, nispa. Hinaspam umanta kumuykachispan wañukurqa, hinaptillanmi allpapas llumpayta kuyururqa. Diospa wasinpi “Chuya” sutiyuq cuartotawan “Chuyay-chuyay” cuartota rakinaq hatun cortinapas chawpimantam llikikururqa. Soldadokunata kamachiqñataqmi nirqa: “¡Diospa churinmiki kasqa!”, nispa.