Abrahanqa churin Isaactam yachachirqa Diosta kuyananpaq hinaspa Diospi hapipakunanpaq. Ichaqa Isaac 25 watanpi kachkaptinmi Jehova Diosqa sasa ruwayta ruwananpaq ­Abrahanta nirqa. ¿Imata ruwananpaqmi nirqa?

Abrahantam nirqa: “Moria allpaman kuyasqayki churikita pusay, hinaspa chaylaw urqupi kañapamuway”, nispa. Diospa chayna nisqanta mana entiendespanpas Abrahanqa kasukurqam.

Chaymi tuta-tutaylla churin Isaacwan hinaspa iskay serviqninkunawan rirqa, hinaspam kimsa punchawmanta chay urquta rikuruspan serviqninkunata nirqa: “Kayllapi suyawachkaychik, churiy Isaacllawanña Diospaq animalta kañapuq qispirusaqku”, nispa. Hinaspam Isaacta yantata qipichirqa, Abrahanñataqmi cuchillota aparqa. Isaacmi taytanta tapurqa: “¿Maytaq kañanapaq animalqa?”, nispa. Abrahanñataqmi nirqa: “Churilláy, Diosmi quwasun”, nispa.

Urquman qispiruspankum altarta pirqarurqaku. Chaymantañataqmi Abrahanqa altarpa hawanman churin Isaacta makintawan chakinta wataruspan siriykachirqa.

Abrahan cuchillota hapichkaptinmi qunqaymanta Diospa ­angelnin nimurqa: “¡Abrahan! ¡Ama imanaychu churikitaqa! Ñam yachaniña Dios kasukusqaykita, chullalla churiki­tapas kañanaykipaqmi mana harkakurqankichu”, ­nispa. Chaymantam Abrahanqa waqranmanta arwirayaq carnerota rikururqa, hinaspam Isaacpa rantinpi chay carnerotaña Diospaq kañapurqa.

Chay punchawmantam Jehova Dios Abrahanta aswanraq kuyarqa, ¿imanasqa? Sasa kaptinpas Diospa nisqanta tukuypi kasukusqanraykum.

Chaymi Jehova Diosqa kaqmanta Abrahanta nirqa: “Bendecisqaykim, hinaspapas achka churiyuqmi kanki”, nispa. Chaywanqa nichkarqam Abrahanpa mirayninwan allin ­runakunata Jehova Dios yanapananmanta.