Piwanpas kuyachikunapaqqa kuyakuqmi kananchik. Jehova Diosmanta astawan yachaspaykiqa astawanmi payta kuyanki chaynataq munaynin ruwaytapas astawan munanki. Dios kuyasqaykim kallpanchasunki Jesuspa qatiqnin kanaykipaq (Mateo 28:19). Wiñaypaqmi qampas Diospa kuyasqan kawaq Jehova Diospa testigonkunawan hukllawakuspaykiqa. ¿Imatam ruwanayki Jehova Diospa testigon kanaykipaq?

Dios kuyasqaykita qawachiy kamachikuyninkunata kasukuspa. “Diosta kuyaspanchikqa kamachikuyninkunatapas kasukunchikmi, kamachikuyninkunaqa manam llumpay sasachu” (1 Juan 5:3).

Yachasqaykikunata ruwayman churay. Jesusmi willakurqa yachayniyuq runamantawan mana yachayniyuq runamanta. Yachayniyuq kaqmi taqra rumipa hawanpi wasichakurqa, mana yachayniyuq kaqñataqmi aqupa hawanpi. Llumpay wayrawan para chayaramuptinmi taqra rumipa hawanpi wasiqa mana tuñirqachu, aqupa hawanpi wasim ichaqa pasaypaqta tuñirurqa. Chaywanmi Jesusqa nichkarqa rimasqankunata kasukuqkunaqa taqra rumipa hawanpi wasichakuq yachayniyuq runaman rikchakusqanta. Yachachisqanta mana kasukuqkunañataq aqupa hawanpi wasichakuq mana yachayniyuq runaman rikchakusqanta. ¿Mayqan kaq runamanmi rikchakuyta munanki? (Mateo 7:24-27).

 Diospa munasqanta ruwanaykipaq tanteakuy. Chaypaqqa Jehova Diosta mañakuspaykim ninayki payllapaqña kawsakunaykimanta. Diospa munayninta ruwaspanchikmi Jesucristopa qatiqninkuna kasqanchikta qawachinchik (Mateo 11:29).

Bautizakuy. “Huchaykichikmanta wanakuspaykichik Jesucristopa sutinpi bautizakuychik” (Hechos 2:38).

Tukuy sunquwan Diosta serviy. ‘Tukuy ima ruwasqaykichiktaqa ruraychik Señorninchikpaq [“Jehová Diospaq”, NM] ruwachkaq hinayá’ (Colosenses 3:23).