1, 2. (1) ¿Ima musuq dibujotaq 1895 watapi Willakuq qillqapa qaranpi rikurirqa? (2) ¿Ima nirqakutaq iñiqmasinchikkuna chay dibujomanta?

 HUK iñiqmasinchikmi 1895 watapi enero killapaq Willakuq qillqapa qaranta qawaykuspan anchata kusikurqa (John Bohnet). Chay qillqapa qaranpim karqa hatun torremanta musuq dibujo, chay torrem tutayaypi kancharirqa wayra-parawan lamar quchapa huqarikusqanta. Chay qillqapa ukunpiñataqmi nirqa qaranpi dibujoqa qillqapa musuq pachan hina kasqanta.

² Chay iñiqmasinchikqa kusisqallañam iñiqmasinchik Charles Russellman cartata apachirqa chaypim nirqa: “Anchatam kusikuni torreta musuq pachawan pachasqata hina qawaspay”, nispa. Huk iñiqmasinchikpas nirqam: “Allinmi qawakun lamar quchapa patanpi qaqa hina sayaq torreqa, llumpay wayra-parawan lamar quchapi yaku laqyaptinpas mana imanakuspam hinalla sayachkan”, nispa (John Brown). Chay qillqapa qaranpi dibujotaqa manam chay kutillapichu cambiarqaku, tiempo pasasqanman hinam noviembre killapipas huk dibujowan cambiarqaku, chaypipas llumpay wayra-parawan yanay-yanay lamar qucham rikurirqa.

3, 4. (1) ¿Ima sasachakuymi iñiqmasinchikkunapaq karqa 1895 watapi 15 noviembre killapaq Willakuq qillqapa nisqanman hina? (2) ¿Imata ruwanankupaqmi chay qillqaqa nirqa?

³ Willakuq qillqapim 1895 watapi 15 noviembre killapaq kaqpim willakurqa, llumpay wayra-parawan lamar quchapi yaku aytinyastin huqarikusqanman hina sasachakuykuna Diospa llaqtanpi kaqkunata hukmanyachisqanmanta. Iñiqmasinchikkunam atipanakuyta qallaykurqaku sapa huñunakuna wasipi pi kamachiqninku kananmanta. Chayna sasachakuyninkuta allichaypi yanapananpaqmi chay qillqaqa Diospa llaqtanta tupanachirqa huk buquewan. Chay qillqaqa qawachirqataqmi lamar quchapi llumpay wayra-parawan hina astawan sasachakuy tiempopaq Diospa llaqtan manaraq listo kasqanta. Chaynaqa, ¿imatam ruwananku karqa?

 ⁴ Chay qillqam rimarqa buqueta allinta manejaq capitanqa lamar quchapi llumpay wayra-para manaraq sasachachkaptin, buquepi riqkuna wañuy patanpi mana kanankupaq tiempowan tukuyta tanteasqanmanta. Chaynallataqmi enteron pachapi Diospa llaqtanpi punta apaqkunapas tanteananku karqa sasachakuy tiempopi aguantanankupaq. Chaymi chay qillqaqa willakurqa, “sapa congregacionpi kaqkuna iñiyninkupi yanapasqa kanankupaq ancianokunata chaylla akllanankupaq” (Hech. 20:28).

5. (1) ¿Imanasqataq ancianokunata akllasqankuqa allinpaq karqa? (2) ¿Ima tapukuykunamantam yachasunchik?

⁵ Ancianokunata akllanankupaq chayna tanteasqankuqa chaypi kaq iñiqkunapaqmi ancha allin karqa. Chayqa iñiqmasinchikkunatam allinta yanaparqa enteron pachapi punta kaq hatun guerrapi sasachakuykunata aguantanankupaq. Chaymanta watakuna pasaytam Jehova Diosqa llaqtanta astawan allinta yanaparqa payta allinta servinankupaq. ¿Bibliapa ima nisqantaq cumplikurqa Diospa munasqanman hina allinta servinankupaq? ¿Imakunapi Diospa llaqtan astawan allinyasqantataq tiempo pasasqanman hina qawarqanki? ¿Imaynatam chayqa yanapasurqanki?

6, 7. (1) ¿Imatam yachachiwanchik Isaias 60:17 nisqanpi willakuyqa? (2) ¿Imamantam rimachkan ‘kamachisuqnikikunam allinkunata ruwaspa kamachisunki’ nispanqa?

⁶ Isqun kaq yachachikuypi yachamusqanchikman hinam Jehova Diosqa yupaychaqninkunata bendecinan karqa achkaman yapakunankupaq (Is. 60:22). Jehova Diosqa prometerqataqmi kaytapas: ‘Quritam qusqayki broncepa rantinpi. Qullqitam qusqayki fierropa rantinpi. Kullupa rantinpim qusqayki bronceta. Rumipa rantinpim qusqayki fierrota. Gobiernaqnikikunam hawkayaypi gobiernasunki. Kamachisuqnikikunam allinkunata ruwaspa kamachisunki’, nispa (Is. 60:17). ¿Ima ninantaq chay willakuykunaqa? ¿Imapitaq chayqa yanapawanchik?

⁷ Isaiasmi willakurqa allin kaqta aswan allin kaqwan Dios cambiananpaq kasqanmanta. Kaypi piensariy: Cobremantaqa qurim aswan allinqa, fierromantaqa qullqim aswan allinqa, kullumantaqa broncem aswan allinqa, rumimantaqa fierrom aswan allinqa. Chaynata rikchanachispanmi Jehova Diosqa qawachirqa tiempo pasasqanman hina llaqtan astawan allin kananmanta. ¿Imakunapi Diospa llaqtan astawan allin kananmantam Isaiasqa willakurqa? ‘Kamachisuqnikikunam allinkunata ruwaspa kamachisunki’ nispanqa Jehova Diosqa rimarqa tiempo pasasqanman hina llaqtanpi munasqanman hina  ima ruwayninkutapas astawan allinta ruwanankumantam.

8. (1) ¿Pipa yanapayninwantaq ima ruwayninchiktapas Diospa llaqtanpi astawan allinta ruwanchik? (2) ¿Imaynatam yanapawanchik? (Qawaytaq 135 paginapi “ Mana hatunchakuspam kasukurqa”, niq yachachikuytapas).

⁸ ¿Pipa yanapayninwantaq ima ruwayninchiktapas Diospa llaqtanpi astawan allinta ruwanchik? Jehova Diosmi nirqa: ‘Quritam qusqayki, qullqitam qusqayki, hawkayaytam qusqayki’, nispa. Diospa llaqtanpi astawan allin tarikusqanchikqa manam iñiqmasinchikkunapa kallpanchakusqankuwanchu, aswanqa Jehova Diospa yanapayninwanmi. Paymi churinta valekurqa llaqtanpi kaqkunata chaynata yanapawananchikpaq. ¿Imaynatam yanapawanchik? Isaiasmi nirqa ‘hawkalla’ hinaspa ‘allin ruwaypi’ tarikunamanta. Diospa kamachikuyninkunamanta yachasqanchikwanmi imayna kawsayninchikta cambiaspa hawkayaypi kanapaq yanapawanchik, allin ruwayta munasqanchikmi kallpanchawanchik llampu sunqu Diosta servinapaq (Filip. 4:9).

9. ¿Imataq yanapawachwan Diospa llaqtanpi huk sunqulla paypa munayninta ruwanapaq?

⁹ Jehova Diosmantam apostol Pablo nirqa: ‘Diosqa hawka kananchiktam munan, manam chaqwa ruwananchiktachu’, nispa (1 Cor. 14:33). ¿Imanasqam hawkalla kananchikta munan? Runakuna allin kawsakunankupaq  imataña tanteaspankupas utaq rimanakuspankupas hawkalla mana kaspankuqa yanqapaqmi. Ichaqa hawkalla kanapaq Jehova Dios yanapawasqanchikraykum ima ruwayninchiktapas hawkalla ruwayta atinchik. Chaymi anchata kusikunchik hawkayay qukuq Diosninchik llaqtan aswan allin kananpaq yanapawasqanchikmanta yachasqanchikwan (Rom. 15:33). Chayna hawkalla kasqanchikmi yanapawanchik enteron pachapi Diospa llaqtanpi huk sunqulla paypa munayninta ruwananchikpaq (Sal. 29:11).

10. (1) ¿Imaynatam Diosqa tiempo pasasqanman hina astawan allin kanankupaq llaqtanta yanaparqa? (Qaway 136 paginapi “ Bibliapa nisqanman hina ancianokuna nombrasqankumanta” niq yachachikuyta). (2) ¿Imakunamantam qatiqninkunapi yachasunchik?

¹⁰ “ Bibliapa nisqanman hina ancianokunata nombrasqankumanta” niq yachachikuymi astawan entiendechiwanchik Diosqa llaqtanta ima ruwayninkupipas allinta ruwanankupaq tiempo pasasqanman hina imayna yanapasqanmanta. ¿Imakunapim Jehova Diosqa Jesucristowan llaqtanta yanapachichkan ‘cobreta’ servichikunanmanta ‘quritaña’ servichikuchkaq hina? ¿Imaynatam bibliapa nisqanman hina ancianokunata nombrasqankuqa Diospa llaqtanpi enteron pachapi huk sunqulla kananchikpaq yanapawanchik? ¿Imaynatam chayqa yanapasunki llampu sunqu Diosta servinaykipaq?

11. (1) ¿Imamantam cuentata qukururqaku bibliata allinta estudiaruspanku? (2) ¿Imapaqmi tantearqaku enteron pachapi Diospa llaqtanpi punta apaqkunaqa?

¹¹ Enteron pachapi Diospa llaqtanpi punta apaqkunam 1964 watamanta 1971 watakama bibliata allinta estudiaspanku yacharurqaku, Jesucristopa punta kaq qatiqninkunapa tiemponpiqa Diosta yupaychana wasipi kaq iñiqkunamanta huk ancianolla mana cuentallikusqanmanta, aswanqa iskay-kimsa ancianokuna kasqankumanta. a (Leey Filipenses 1:1; 1 Timoteo 4:14). Chaymanta allinta entienderuspankum enteron pachapi Diospa llaqtanpi punta apaqkunaqa cuentata qukururqaku Diosta yupaychaqkuna aswan allin kanankupaq Jesucristo imayna yanapasqanmanta, chaymi paypa kamachisqanman hina imatapas ruwanankupaq tantearqaku. Chaymantam bibliapa kamachisqanman hina sapa huñunakunanku wasipi ancianokunata nombranankupaq tantearqaku. ¿Imakunatam 1970 watamantapacha tantearqaku Diospa llaqtanpi?

12. (1) ¿Imapitaq enteron pachapi Diospa llaqtanpi punta apaqkunapas cambiarqaku? (2) ¿Imaynatam cuentallikunku Diospa llaqtanpi punta apaqkunaqa? (Qaway 146 paginapi “ Dios imayna kamachimunanmanta willakunapaqmi cuentallikunku” niq yachachikuyta).

¹² Enteron pachapi Diospa llaqtanpi punta apaqkunapas imayna cuentallikuyninkupim cambiananku karqa. 1970 watakamaqa hanaq pachapaq kaqkunamantam qanchislla Estados Unidospi betel wasimanta cuentallikuqku, paykunam riqsichikuqku “junta de directores” nisqa sutiwan. Ichaqa 1971 watapim qanchismanta chunka hukniyuqmanña yapakururqaku, chaymantaqa manañam chay sutiwanqa riqsichikurqakuñachu. Paykunaqa mana hatunchakuspam imapipas tanteanankupaq hukkaqninkuwan cuentallichikuqku chaypaqmi sapa wata hukkaqninkuta akllaqku.

13. (1) ¿Imaynatam 1932 watamanta 1972 watakamaqa ancianokuna cuentallikurqaku? (2) ¿Imapaqmi 1972 kaq watapi enteron pachapi Diospa llaqtanpi punta apaqkuna tantearqaku?

 ¹³ Enteron pachapim Diospa llaqtanqa cambianan karqa. ¿Imapi? 1932 watamanta 1972 watakamaqa sapa huñunakusqanku lawpim huk ancianolla iñiqmasinkunamanta cuentallikuq. Paykunatam tiempo pasasqanman hina riqsirqaku “director de servicio”, “siervo de compañía”, “siervo de congregación”, “superintendente de congregación” nisqa sutikunawan. Paykunaqa ovejakunata michichkaq hinam Dios serviqkunata iñiyninkupi tukuy sunqunkuwan yanaparqaku. Ichaqa sapallanmi imapaqpas tanteaq, manam tapuqchu ancianomasinkunataqa. Chaymi 1972 watapi enteron pachapi Diospa llaqtanpi punta apaqkuna tantearqaku chaynata manaña ruwanankupaq. ¿Imapim yanaparqa chayna tanteasqankuqa?

14. (1) ¿Imapaqmi tantearqaku 1972 watapi 1 octubremantapacha? (2) ¿Imaynatam congregacionpi ancianomasinkunawan ruwanankupaq yanapaq ancianoqa qawachin Filipenses 2:3 nisqan kasukusqanta?

¹⁴ Bibliapa yachachisqanman hina allin kawsakuq qarikunatam anciano kanankupaq nombrayta qallaykurqaku, chaynapi maymi huñunakusqankupi anciano masinkunawan huk sunqulla iñiqmasinkumanta cuentallikunankupaq. Chayna tanteasqankuqa qallaykurqa 1972 watapa 1 octubre killanmantam. Kay tiempopiqa “congregacionpi ancianomasinkunawan ruwanankupaq yanapaq” ancianoqa manam paykunapa kamachiqnin kasqanpaqchu hapikun, aswanqa mana hatunchakuq kasqanwanmi riqsichikun (Luc. 9:48). Mayna allinmi chayna kaq iñiqmasinchikkunapa Diospa llaqtanpi enteron pachapi yanapakusqankuqa (Filip. 2:3).

15. (1) ¿Imakunapitaq ancha allin ancianokuna huk sunqulla tanteanakuspanku ruwasqankuqa? (2) ¿Imataq qawachin kamachiwaqninchik Jesucristo yachayniyuq kasqanta?

¹⁵ Ancianokuna ima ruwaykunapi yanapanakunankupaq huk sunqulla tanteasqankuqa ancha allinmi. Chayna  kasqanmantayá qatiqninpi yachasun. Punta kaq: Ancianokunatam yanapan Diospa llaqtanta Jesucristo kamachimusqanta riqsikunankupaq (Efes. 5:23). Iskay kaq: Bibliapa nisqanman hina ancianokuna tapurinakuspankuqa imapaqpas allintam tanteanqaku (Prov. 15:22). Imatapas ruwanankupaq huk sunqulla Diospa yachachisqanman hina tanteasqankuqa iñiqmasinkupa allinninkupaqmi kanqa (Prov. 27:17). Chayna tanteasqankutaqa Jehova Diosmi bendicen. Kimsa kaq: Diospa llaqtanqa sapa kutim astawan yapakuchkan, chaymi ancianokunapa yanapakusqankuqa ancha allin, paykunam iñiqmasinchikkunata necesitasqankuman hina Dios serviyninkupi yanapachkanku (Is. 60:3-5). Kaypi piensarisun, 1971 watapiqa enteron pachapim 27.000 masnin congregacionkunalla karqa, 2013 watapaqñataqmi 113.000 masninña karqa. Chaykunam qawachin kamachiqninchik Jesucristoqa ancha yachayniyuq kasqanta chaymi tiempo pasasqanman hina qatiqninkunata yanapawachkanchik ancianokunata churaspan (Miq. 5:5).

16. (1) ¿Imapi yanapakunankupaqmi ancianokunaqa huñunakunanku wasikunapi kanku? (2) ¿Imatam iñiqmasinku yanapaq ancianokunamanta Willakuq qillqa 1925 watapi nirqa?

¹⁶ Ancianokunaqa ñawpaq watakunamantaraqmi cuentata qukururqaku Diosta hinalla servinankupaq iñiqmasinkuta iñiyninkupi yanapanankupaq kasqanmanta (leey Galatas 6:10). 1908 watapim Jesuspa nisqanmanta Willakuq qillqapi nirqa: “Ovejaykunatayá michiy”, nispa (Juan 21:15-17). Chay qillqapim ancianokunaman nirqa: “Jesucristopa encargawasqanchik ovejakunata utaq iñiqmasinchikkunata tukuy sunqunchikwan cuidayqa ancha allinmi, paykunaman mikuchichkaq hina yachachispa Dios serviyninkupi yanapanapaq favorecesqam kanchik”, nispa. 1925 watapipas Willakuq qillqapim ancianokunaman kaqmanta kaynata nirqa: “Diosmi iñiqkunapa dueñonqa, paymi ancianokunamanta cuentata mañanqa iñiqmasinkuta imayna yanapasqankumanta”, nispa.

17. ¿Ima yanapakuykunatam ancianokunaqa chaskirqaku Diospa ovejankunata allinta cuidanankupaq?

¹⁷ ¿Imaynatam Jehova Diospa llaqtanqa ‘fierropa’ rantinpi ‘qullqita’ servichikuchkaq hina ancianokunata yanaparqa iñiqmasinkunata astawan yanapanankupaq? Aswan allinta yanapakunankupaq yachachispankum. Chaypaqmi 1959 watapi ancianokunapaq escuela qallaykurqa. Chay escuelapim yacharqaku “Imaynatam iñiqmasinchikkunata sapakamata yanapachwan” niq yachachikuymanta, hinaspapas ancianokunatam kallpancharqaku “iñiqkunata  sapakamaman watukunankupaq”. Chaypim achka yachachikuykunawan ancianokunata yanaparqaku watukuspa imaynata kallpanchanankupaq. Chaymantapas 1966 watapim hina chayna escuelapi astawan allintaraq yachanankupaq tantearqaku. Chaypim yacharqaku “iñiqmasinchikkunata imanasqa kallpanchanankumanta”. ¿Imamantam chaypi astawan yacharqaku? “Diospa ovejankunata kuyakuywan cuidanankumantam, ichaqa wasinkupi kaqkunata chaynataq Diosmanta willakuyninkuta mana saqiruspankum”. Kunan tiempopiqa astawanraqmi ancianokunapaq escuelakuna kachkan. ¿Imaynatam chay escuelakunaqa Dios serviqkunata yanapachkan? Wara-waranqantin allin yachayniyuq ancianokunam Dios yupaychaqkunata yanapachkanku.

18. (1) ¿Imapitaq ancianokunaqa yanapakunku? (2) ¿Imanasqataq Jehova Dioswan Jesucristoqa ancianokunata kuyanku?

¹⁸ Jehova Diosqa Jesucristowanmi ancianokunata nombrachin tukuypi yanapakunankupaq. ¿Imapim yanapakunku? Kay sasallaña tiempopi Diosta hinalla servinankupaq iñiqmasinkuta yanapaypim (Efes. 4:11, 12; 2 Tim. 3:1). Jehova Dioswan Jesucristoqa anchatam kuyanku kayna kamachikuy kasukuq ancianokunata: ‘Diospa ovejankunatayá michiychik [ichaqa] amayá obligasqa hinachu [...]. Llamkaychikqa tukuy sunquykichikwanyá. Amayá michiychikqa munaychakuq hinachu, aswanqa ejemplonyá kaychik’ (1 Ped. 5:2, 3). Ancianokuna ima ruwaykunapi yanapakusqankumantayá qatiqninpi iskayllamanta yachasun, chayna yanapakusqankum iñiqkunata yanapan hawkalla chaynataq kusisqa kanankupaq.

19. ¿Ima nichwantaq Diosmanta willakuypi yanapawaqninchik ancianokunamanta?

¹⁹ Punta kaq: Ancianokunaqa iñiqmasinkunawan kuskam Diosmanta willakunku. Lucasmi Jesusmanta nirqa: ‘Jesusqa achka llaqtakunapi hinaspa taksa llaqtachakunapipas Dios [imayna kamachimunanmanta] allin noticiata willakustinmi purirqa. Chunka iskayniyuq discipulonkunapas paywanmi rirqaku’, nispa (Luc. 8:1, CQ12). Imaynam Jesuspas discipulonkunapiwan Diosmanta willakurqa chaynam ancianokunapas iñiqmasinkunapiwan Diosmanta willakunku. Chaynata ruwaspankum Diosmanta hinalla willakunankupaq iñiqmasinkuta kallpanchanku. ¿Ima ninkutaq chayna kaq ancianokunamanta wakin iñiqmasinchikkunaqa? Yaqa 90 watayuqña Yanina sutiyuq iñiqmasinchikmi nin: “Ancianowan Diosmanta willakuspayqa paywan parlarispaymi astawan cuentata qukuni imayna runa kasqanmanta”, nispa.  Chaymantapas 30 masnin watayuq Steven sutiyuq iñiqmasinchikpas ninmi: “Ancianowan Diosmanta wasin-wasin willakuspayqa yanapaway munasqantam musyakuni. Chayna yanapaykuwasqanmantam anchata kusikuni”, nispa.

20, 21. ¿Imaynatam ancianokunaqa qatipakunmanku Jesuspa willakusqan tupanachiypi michiqta? Rimarimuy iñiqmasinchikta huk anciano imayna yanapasqanmanta (Qawaytaq 144 paginapi “ Sapa semana watukusqankum yanapan” niq yachachikuytapas).

²⁰ Iskay kaq: Enteron pachapi Diospa llaqtanpi punta apaqkunam ancianokunata allinta yachachinku Diosmanta karunchakuqkunata yanapanankupaq (Heb. 12:12). ¿Imanasqam iñiyninkupi chiriyasqakunata ancianokunaqa yanapananku? ¿Imaynatam chayta ruwananku? Chaymanta yachanapaqmi chinkasqa ovejawan tupanachispan Jesuspa willakusqan yanapawasun (leey Lucas 15:4-7). Michiqqa hukkaqnin ovejan rakikurusqanmanta cuentata qukuruspanmi chullallapas kanman hina chaylla maskan. ¿Imaynatam ancianokunaqa qatipakunmanku chay michiqta? Mayqan iñiqmasinkupas Dios serviyninkupi chiriyaruptinqa chayllam yanapanankupaq kallpanchakunku paykunamanta sientesqankurayku.

²¹ ¿Imatam michiqqa ruwan chinkasqa ovejanta tariruspan? Sumaqllata ‘hombrokuykuspanmi’ wakin ovejankunapa kasqanman apan. Chaynallataqmi ancianokunapas iñiyninpi chiriyasqakunata tukuy sunqunkuwan sumaqllata rimapayaspaqa yanapanmanku kaqmanta iñiqmasinkunawan hinalla huñunakunankupaq. Chaynatam yanaparqaku África lawmanta kaq Victorta, payqa huñunakuykunaman riytam saqirurqa, chaymi pay nin: “8 watañam Dios serviyniypi chiriyarurqani, ancianokunam ichaqa hinalla kallpanchaykuwarqaku”, nispa. ¿Imataq yanaparqa kaqmanta huñunakunanpaq? Payqa nintaqmi: “Huk punchawmi John sutiyuq anciano watukamuwarqa, paywanmi karqani precursorkunata yanapaq escuelapi, payqa chaypi fotochikusqayku wakin fotokunatam apamuwasqa. Chay fotokunata qawaykuspaymi yuyarirurqani Jehova Diosta servisqay tiempopiqa ancha kusisqa kasqayta”. Ancianopa watukusqan qipallatam Victorqa kaqmanta huñunakuyta qallaykurqa, kunanqa kaqmantam precursor kachkan. Iñiqmasinkunata yanapaq ancianokunaqa llapallanchik kusisqa kananchikpaqmi yanapawanchik (2 Cor. 1:24). b

22. ¿Imaynatam yanapawanchik Diospa kamachisqankunata kasukusqanchik chaynataq hawkayayta maskasqanchikqa? (Qawaytaq 139 paginapi “ Anchatam kusikurqaniku” niq yachachikuytapas).

²² Kay yachachikuypi yachamusqanchikman hinam Jehova Diosqa nirqaña llaqtanpi kamachisqankunata  kasukuy chaynataq hawkayay astawan kananmanta (Is. 60:17). Chayna nisqanqa iñiqmasinchikkunawan huk sunqulla kanapaqmi kallpanchawanchik. Chayraykum riqsikunchik Jehova ‘Diosqa chullalla’ kasqanta (Deut. 6:4). Imam mana allin chaynataq imam allin kasqanmanta kamachiwasqanchikkunaqa enteron pachapim serviqninkunapaq huklla. Chay kamachikuykunaman hina kawsasqanchikmi ‘llapallan iñiqkunata’ huk sunqulla kanapaq yanapawanchik (1 Cor. 14:33). Diospa kamachisqankunata kasukuq iñiqkunaqa allinmi tarikunqa. Kamachiwaqninchik Jesucristoqa manam iñiqmasinchikkunawan hawka kanallanchiktachu munan, payqa munantaqmi sapakama hawkalla kanapaq kallpanchakunanchiktapas (Mat. 5:9, CQ12). Chaynaqa ‘hawkalla kawsakuytayá maskasun’, chaynapi iñiqmasinchikwan piñanachikuspaqa chaylla pampachanakuspa hawkalla kawsakunapaq (Rom. 14:19). Chaynata kawsaspam iñiqmasinchikkunawan huk sunqulla kasunchik (Is. 60:18).

23. ¿Imataq Jehova Dios serviqkunata yanapan kay tiempopi kusisqa kanankupaq?

²³ Willakuq qillqapim noviembre killapaq 1895 watapi willakurqa ancianokuna huñunakusqanku lawkunapi kananmanta, chaymi enteron pachapi Diospa llaqtanpi punta apaqkunaqa Jehova Diosta mañakurqaku ancianokuna kananpaq, chaynapi lliw “iñiqkuna huk sunqulla kanankupaq”. Tiempo pasasqanman hina Jesucristo imayna yanapawasqanchikqa mayna allinmi Jehova Diosta huk sunqulla yupaychananchikpaq (Sal. 99:4). Anchatam kusichiwanchik Jehova Diosta enteron pachapi huk sunqulla yupaychasqanchikqa (2 Cor. 12:18; leey Sofonias 3:9).