AMISTADNINCHIKKUNAWAN parlaspanchikqa hinaspa kuska kaspanchikqa kusisqam kanchik ¿aw? Ichaqa allintam amistadninchikkunataqa akllananchik. ¿Pitaq kanman pimantapas aswan allin amistadninchikqa?... Arí, Jehova Diosmi.

Ichaqa, ¿atichwanchu Diospa amistadnin kayta?... Bibliaqa willawanchikmi Abrahan sutiyuq runa ‘Jehova Diospa amistadnin kasqanmanta’ (Santiago 2:23). ¿Imata ruwaspataq Abrahanqa Diospa amistadnin karqa?... Jehova Diosta tukuy imapi kasukuspanmi. Chaynaqa Diospa amistadnin kananchikpaqqa Diospa munasqantam ruwananchik Abrahan hina hinaspa Jesus hina.

 Huk kutipim apostolninkunaman Jesus nirqa: “Kamachisqaykunata kasukuspaykichikqa amistadniykunam kankichik”, nispa (Juan 15:14). Jesuspa kamachisqankuna Diosmanta hamusqanraykum amistadninkunaqa Jehova Diospa kamachikuyninkunata kasukunanku karqa. Chaymi Jesuspa amistadninkunaqa Diosta kuyaq runakuna karqaku.

Jesuspa amistadninkunaqa apostolninkunam karqaku, pikuna kasqankuta yachanaykipaq qaway 75 kaq paginata. Paykunaqa Jesuswan kuskam maymanpas riqku, Diosmanta willakuqku, mikuqku hinaspa imatapas ruwaqku. Ichaqa Jesuspaqa achkam amistadninkunaqa karqa, wakintam sapa kuti watukuq.

Chayna amistadninkunam Jerusalen llaqtapa hichpan Betania llaqtachapi yacharqaku, chaymi Jesusqa paykunata watukuq riq. ¿Pikunataq paykunaqa karqaku?... Maria, Marta hinaspa turinku Lazarom (Juan 11:1, 5, 11). Paykunaqa Jehova Diostam kuyaqku,  chaymi Jesusqa paykunata kuyaq hinaspa paykunawan kusirikuq.

Hinaptinqa, ¿Jesusqa manachu kuyaq Diosta mana serviq runakunataqa? Kuyaqmi, chaymi wakinpiqa wasinkumanraq riq kuska mikunankupaq. Chaychá wakin runakunaqa Jesusta niqku “impuesto mañaqkunapa chaynataq huchasapakunapa amistadnin” kasqanta (Mateo 11:19). Ichaqa wasinkumanqa riq manam imayna kawsakusqankuwan kusirikunanpaqchu, aswanqa Jehova Diosmanta yachachinanpaqmi hinaspa mana allin kawsasqankuta saqispanku Diostaña servinankupaq yanapaqmi.

Huk kutipim Jesusqa Jerico llaqtaman yaykuruspan chayninta richkarqa Jerusalen llaqtaman. Hinaptinmi Zaqueo sutiyuq runa Jesusta qawaykuyta munaspan mana atirqachu achkallaña runakuna kasqanrayku hinaspa taksalla sayayniyuq kasqanrayku. Chaymi Jesusta qawananpaq kallpaylla ñawpaspan purun higosman siqarurqa.

Jesusñataqmi chay sachaman chayaruspan altota qawarispa nirqa: “Zaqueo apurawman uraykamuy, kunanmi wasikipi samakusaq”, nispa. Zaqueo runaqa mana  allinkunata ruwaq apu runam karqa. ¿Imanasqataq Jesusqa chayna runapa wasinpi samakuyta munarqa?...

Manam chayna kawsakusqanta allinpaq hapisqanraykuchu, aswanqa Diosmanta yachachiyta munasqanraykum. Jesusqa qawarqam payta qawananpaq Zaqueopa tukuy ima ruwasqanta, hinaspam musyarurqa uyariy munasqanta. Chaymi Jesusqa yachachirqa Diospa munasqanman hina kawsakuyta.

Dibujopi qawasqanchikman hinaqa, ¿imatam Zaqueoqa Diosmanta yacharuspan ruwarqa?... Jesuspa yachachisqanta kasukuspanmi runakuna engañasqanmanta wanakuspan nirqa chay suwakusqan qullqita runakunaman kutichipunanpaq. Hinaspanmi Jesusta qatikuspan amistadninña rikurirurqa (Lucas 19:1-10).

Jesus hina kayta munaspaqa, ¿watukunanchikchu Diosta mana riqsiqkunatapas?... Arí. Ichaqa manam paykuna hina kayta munaspachu nitaq paykunawan mana allinkunata ruwanapaqchu. Aswanqa Diosmanta yachachinapaqmi.

 Amistadninchikkunawanqa parlanchikmi, pukllanchikmi hinaspapas imatapas ruwanchikmi. Ichaqa Diospa munasqanman hina kawsakuqkunallam amistadninchikkunaqa kananku. Ichapas wakin warmamasikikunaqa mana Jehova Diosmantaqa imatapas yachankuchu, chaymi Diosmanta yachayta munaptinkuqa yachachinanchik. Chaynapi paykunapas ñuqanchik hina Diosta kuyaspanku amistadninchikkunaña kanankupaq.

Chaymantapas amistadninchikkunata allinta akllanapaqqa yachananchikmi imakuna ruwasqankuta. Paykunaqa, ¿kusikunkuchu warmamasinkuta waqachispanku? Chayqa manamá allinchu ¿aw?... ¿Mana allinkunata ruwaspankuchu imapas sasachakuykunaman yaykunku? Manachá munachwanchu paykunawan purisqanchikrayku ima sasachakuymanpas yaykuruytaqa ¿aw?... ¿Mana allinkunatachu ruwanku pipapas mana qawasqan kasqankuta piensaspanku? Chay ruwasqanta mana pipas qawaptinpas Jehova Diosqa qawachkanmi ¿aw?... ¿Allinchu kanman chayna runakunawan amistadta ruwayninchik?...

Bibliaykita kicharispa qawaykuy 1 kaq Corintios 15 capitulonpa 33 versiculonta, ¿tarirunkiña? Chaypim nin: “Amayá pantaychikchu, mana allin amistadkunaqa allin kawsakuytam chinkachin”, nispa. Kaypi nisqanman hinaqa, mana allin amistadkunawan purispaqa paykuna hinam rikuriruchwan. Allin amistadkunawan purispam ichaqa allin kaqkunata ruwasunchik.

Ama qunqasunchu pimantapas aswan allin amistadninchikqa Jehova Dios kasqanta, manachá munachwanchu paywan amistadninchikta chinkarachiytaqa ¿aw?... Chaymi kallpanchakunanchik Jehova Diosta kuyaqkunallawan amistad kananchikpaq.