JESUSQA Diosta ima nispa mañakunamantam yachachirqa. ¿Maylawpitaq bibliapiqa chayqa kachkan?... Chayqa Mateo 6:9-13 kachkan. Chay mañakuy yachachisqanpim Jesusqa rimarqa “munaychakuynikiyá hamuchun” niqmantapas. ¿Imataq Diospa munaychakuyninqa kanman?...

Bibliapi munaychakuymanta rimaspanqa huk gobiernomantam rimachkan. Wakin nacionkunapiqa presidente nisqankum chay nacionta kamachin. Chaynam Diospa munaychakuyninpipas presidente hina huk kamachikuq kan.

¿Pitataq Jehova Diosqa akllarqa munaychakuyninpi kamachikuq kananpaq?... Churin Jesucristotam. ¿Imanasqataq Jesusqa pi runamantapas aswan alli-allin kamachiq kanman?... Taytanta anchata kuyaspan allinta imatapas ruwasqanraykum.

 Kay pachaman Jesus manaraq hamuchkaptinmi bibliaqa nirqaña kay pachaman hamuspan Diospa akllasqan kamachiq kananmanta. Qawasun Isaias 9:6, 7 nisqankunata, chaypim nin: ‘Wawam nacerapuwanchik. Wawatam Dios quykuwanchik. Pay kamachiptinmi sutichanqaku hawkayay qukuq kamachikuqwan. Hawka kamachikuyninqa manam tukunqachu’, nispa.

Jehova Diosqa pimantapas aswan hatun kamachiq kaspanmi Jesusta akllarqa paypas kamachiq kananpaq, chaymi Jesusqa kay pachata waranqa wata kamachimunqa (Apocalipsis 20:6). Jesusqa bautizakusqan qipatam kaynata willakuyta qallaykurqa: “Hanaq pacha Diospa munaychakuynin hichparamusqanraykuyá huchaykichikmanta wanakuychik”, nispa (Mateo 4:17).

¿Imanasqataq Jesusqa runakunaman nirqa Diospa munaychakuynin hichparamusqanta?... Jesus paykunapa chawpinkupi kasqanraykum. Chaymi nirqaraq: “Diospa munaychakuyninqa qamkunapa chawpikichikpim kachkan”, nispa (Lucas 17:21). Mayna sumaqya karqa Diospa akllasqan kamachiqwan rimayqa ¿aw?...

Ichaqa, ¿ima ruwananpaqtaq Jesusqa kay pachaman hamurqa?... Kikinmi nirqa: “Huk law llaqtakunapipas Diospa munaychakuyninmanta sumaq willakuytaqa willakunaymi, chaypaqmi ñuqataqa kachamuwarqa”, nispa (Lucas 4:43). Chaywanpas yacharqam sapallanqa lliw runakunaman willakuy mana atinanmanta. Hinaspaqa, ¿imatataq ruwarqa?...

Diosmanta imayna willakunankupaqmi qatiqninkunata yachachiyta qallaykurqa. Puntatam 12 apostolninkunaman yachachirqa (Mateo 10:5, 7). Chaymantañataqmi wakin qatiqninkunaman. Bibliapim willakun Diosmanta  willakunankupaq huk kutipi 70 qatiqninkunata iska-iskaytakama kachasqanmanta. ¿Ima nispankutaq runakunaman willakuqku?... Niqkum: “Diospa munaychakusqanqa hichpallaykichikpiñam kachkan”, nispa (Lucas 10:9). Chaynapim runakunaqa Diospa munaychakuyninmanta yacharurqaku.

Jesus manaraq kay pachapi kachkaptinmi, Israel llaqtapi musuq kamachiqkunaqa malta asnochapi sillakuykuspanku llaqtaman yaykuqku. Chaynatapunim Jesuspas chay kutillaña Jerusalenman yaykusqanpi ruwarqa. Chaytaqa ruwarqa hanaq pachapi kamachinanpaq akllasqa kasqanraykum. Ichaqa, ¿munarqakuchu runakunaqa Jesus kamachiqninku kananta?...

Arí munarqakum, chaymi asnopi sillakuykuspan Jesus llaqtaman yaykusqanta qawaspanku yaqa llapallanku pachankuta hinaspa sachakunapa kallmankunata ñanpi mastarqaku. Hinaspam kusikuymanta qaparispanku nirqaku: “¡Bendecisqayá kachun Jehova Diospa sutinpi hamuq kamachiqqa!”, nispa. Ichaqa manam lliwchu kusisqaqa karqaku. Wakin fariseokunam chayta qawaspanku Jesusta nirqaku: “¡Yachachikuq, qatiqnikikunata upallachiy!”, nispa (Lucas 19:28-40).

Chaymanta pichqa punchawllamantam Jesustaqa hapiruspanku kamachiq Pilatoman aparurqaku. Chaypim nirqaku Jesusqa kamachiq kayta munaspan Roma nacionta kamachiqpa contranpi churakurusqanta. Pilatoñataqmi chaymanta Jesusta tapurqa, hinaptinmi Jesusqa nirqa: “Munaychakuyniyqa manam kay pachapi kamachiqkunapa hinachu”, nispa (Juan 18:36).

Chayta Pilato uyarispanmi runakunata nirqa Jesusqa mana huchayuq kasqanta. Chay runakunam ichaqa manaña munarqakuchu Jesusqa kamachiqninku kanantaqa nitaq Pilato kachaykunantapas (Juan 18:37-40). Chaymi Pilatoqa Jesuswan kaqmanta  rimarqa, hinaspanmi mana huchayuq kasqanta allinta yacharuspan Jesustaqa hawaman hurquspa nirqa: “¡Kayqaya kamachiqnikichikqa!”, nispa. Runakunañataqmi nirqaku: “¡Wañuchiy! ¡Qirupi warkuspayá wañuchiy!”, nispa.

Pilatoñataqmi nirqa: “¿Kamachiqnikichiktachu wañuchisaq?”, nispa. Sacerdotekunañataqmi nirqaku: “Roma nacionta kamachiqllam kamachiqniykuqa”, nispa. Chay runakunaqa Jesuspa contranpim llaqtata rikurirachirqaku (Juan 19:1-16).

 Kunanpas achka runakunam mana munankuchu Jesus kamachiqninku kanantaqa. Paykunaqa Diospi iñisqankuta nispankupas sunqunkupiqa manam Jehova Diospa nitaq Jesuspa kamachisqantaqa kasukunkuchu. Chaymi runakunallata akllanku kamachiqninku kanankupaq.

Diospa munaychakuyninmanta hinaspa imakuna ruwananmanta yachaspaqa, ¿kusikunchikchu?... Hinaspapas, ¿Diostachu astawan kuyanchik?... Chaynaqa, ¿imatam ruwananchik Diosta kuyaspanchikqa hinaspa kamachiwananchikta munaspanchikqa?...

Jesuspa ruwasqantam ruwananchik. ¿Imatataq ruwarqa?... Kikinmi nirqa: ‘Taytaypa munasqan kaqkunatam ruwani’, nispa (Juan 8:29). Arí, Jesusqa kay pachaman hamuspanqa ‘Diospa munaynintam tukunankama ruwarqa’ (Hebreos 10:7; Juan 4:34). Ichaqa, ¿imatam chaymanta puntataqa ruwarqa?

Bautizaq Juanmanmi rirqa. Chaymi Juanqa Jordan mayupi Jesuspa cuerponta chullpuykuspa bautizarqa. ¿Imanasqataq Juanqa Jesusta bautizarurqa?...

Jesus nisqanraykum. Ichaqa, ¿Jehova Diosqa munarqachu Jesus bautizakunanta?... Arí, chaymi yakumanta Jesus  lluqsiruptin hanaq pachamanta nirqa: “Qanmi churiy kanki, qamtam kuyayki hinaspam chaskikipas”, nispa. Hinaspapas chuya espirituntam quykurqa, chaymi paloma hina Jesuspi tiyaykurqa. Jesusqa bautizakurqa taytanta wiña-wiñaypaq servinanpaqmi (Marcos 1:9-11).

Qamqa warmallaraqmi kanki ichaqa, ¿imatam wiñasqaykiman hina ruwawaq?... ¿Jesus hinachu bautizakuyman chayanki?... Bautizakuynikiqa allinmi kanman, Jesusqariki ‘imayna kasqanta allintapuni qatipakunanchikpaq hinam kawsakurqa’ (1 Pedro 2:21). Bautizakuspaykiqa Diospa munayninta ruwaqña kasqaykitam qawachinki. Ichaqa, ¿imatawanraqtaq ruwana?

Jesuspa yachachisqankunatapas kasukunam. Payqa niwanchikmi ‘kay pachapi runakuna hina mana kananchikpaq’. Hinaptinqa, ¿yaqachu Jesusta kasukuchkachwan runakunapa ruwasqankuta qatipakuspa? Jesuswan apostolninkunaqa manam chaytaqa ruwarqakuchu (Juan 17:14). ¿Imatataq ruwarqaku?... Diospa munaychakuyninmantam tukuyta ruwaspa willakuqku. ¿Ñuqanchikpas chayta ruwachwanchu?... Arí. Chaymantapas tukuy sunquwanmi Diospa munaychakuynin hamunanta mañakunanchik.