DIOSQA Adantawan Evata unanchaspanmi Eden sutiyuq suma-sumaq huertapi churarqa. Ichaqa mana kasukusqankurayku wañuruptinkupas Diosqa munanmi mirayninkunaña chayna suma-sumaq huertapi kawsakunanchikta. Chaymi bibliapi nin: ‘Allin ruwaq runakunam allpata dueñoyaspa wiñaypaq kawsakunqaku’, nispa (Salmo 37:29).

Bibliapim riman ‘musuq cielokunamanta’ hinaspa ‘musuq allpamanta’ (Isaias 65:17; 2 Pedro 3:13). Bibliapi wakinpi cielomanta rimaspanqa kamachiq runakunamantam riman, ichaqa kay ‘musuq cielokunamanta’ rimaspanqa Jesucristomanta hinaspa paywan kuska kamachiqkunamantam rimachkan. ¡Mayna sumaqya kanqa paykuna kay pachata kamachimuptinkuqa!

Bibliapi allpamanta rimaspanñataqmi wakinpi runakunamanta rimachkan, manam sarusqanchik allpamantachu. ¿Pikunataq kanqa ‘musuq allpawan’ tupachisqa runakunaqa?... Jehova Diosta kuyaq runakunam (Genesis 11:1, NM; Salmo 66:4; 96:1). Paykunam kay pachapiqa wiña-wiñaypaq kawsakunqaku.

Chay punchawqa manañam kanqachu mana allin runakunaqa. Imaynam Noeypa tiemponpi mana allin runakuna sinchi parawan chinkachisqa karqaku, chaynam kunanpas Diospa piñakuynin punchawpi mana allin runakuna chinkachisqa kanqaku. Kunan rimarisun piñakuynin punchaw pasayta kay pachapi kawsakuy imayna kananmanta.

 ¿Munawaqchu kay pachapi wiña-wiñaypaq kawsakuyta?... Manam ni ima doctorpas ni ima hampipas wiñay kawsaytaqa quwachwanchu. Wiñay kawsaytaqa haypasun Diosman asuykuspallam. Jesusmi chaymanta allintapuni yachachirqa.

Bibliaykipi kichaykuy Juan 17 capitulopa 3 versiculonta. Chaypim Jesus nirqa: “Wiñay kawsayqa kanqa sapallan chiqap Dios kasqaykita riqsiqkunapaqmi hinaspa kachamusqayki Jesucristotapas riqsiqkunapaqmi”, nispa.

Jesuspa nisqanman hinaqa, ¿imatam ruwananchik wiñay kawsayta haypanapaqqa?... Jehova Diosmantam hinaspa ñuqanchikrayku wañukuq churin Jesusmantam allintapuni yachananchik. ¿Imaynata? Bibliata estudiaspam. Chaypaqmi JESUSMANTA YACHASUN niq kay qillqa yanapasunki.

Jehova Diosmanta yachasqanchikqa wiñay kawsayta haypanapaqmi yanapawasun ¿aw?... Jehova Diosmantaqa sapa punchawmi yachananchik, imaynam mikuspapas sapa punchaw mikusqanchikman hina. Chaymi bibliapi nin: “Runaqa kawsanan manam tantallawanchu aswanqa Jehova Diospa lliw rimasqankunawanmi”, nispa (Mateo 4:4).

Jesusmanta yachasqanchikpas wiñay kawsayta haypanapaqmi yanapawasun. Paytam Jehova Dios kachamurqa huchanchikmanta pampachasqa kananchikpaq. Chaymi bibliapi nin: “Jesusmanta hukpiqa manam salvacionqa kanchu”, nispa. Nintaqmi: ‘Churipi iñiqqa wiñay kawsayniyuqmi kanqa’, nispapas (Hechos 4:12; Juan 3:36). ¿Ima ninantaq Jesuspi iñiyqa?... Jesuspi iñiyqa paylla wiñay kawsayman pusawaqninchik kasqanmanta mana iskayrayaymi. ¿Chayna kasqanpaqchu Jesusta qawanki?... Chayna kaptinqa paymantapas hinallam sapa punchaw yachananchik hinaspa yachasqanchikman hina kawsakunanchik.

 Kay qillqapi yachachikuykunata sapa kuti qawaypas allintam yanapasunki Jesusmanta yachanaykipaqqa. Chaypaq dibujonkunapi yuyaymanay, chaynataq dibujopa waqtanpi tapukuykunamanta rimariy. Kay qillqata tayta-mamaykiwan kuska leey. Mana kaptinkuqa pi yuyayniyuqwanpas utaq warmamasikikunawanpas leewaqmi. Chayta ruwaspaqa icha pillatapas yanapawaq Jesusmanta yachaspan kay pachapi wiñay kawsayta haypananpaq. Mayna kusikuypaqmi chayqa kanman ¿aw?...

Bibliapim nin: “Diosta mana yupaychaq runakunaqa wañunqakum, tukuy ima munapayasqankunapas chinkanqam. Diospa munayninta ruwaqmi ichaqa wiñaypaq kawsanqa”, nispa (1 Juan 2:17). Chaynaqa, ¿imatam ruwananchik wiñaypaq kawsakunapaqqa?... Jehova Diosmantawan Jesusmantam yachananchik, hinaspam yachasqanchikman hina kawsakunanchik. Anchatam munaymanku kay qillqamanta yachasqayki chaypaq yanapasunaykita.