Chaymantam Jesusqa Martapiwan hinaspa Mariapiwan kuska Lazaropa pampakusqan lawman rirqaku. Lazaroqa rumiwan ñitichisqa punkuyuq machaypim pampasqa karqa, chaypim Jesusqa nirqa: “Chay rumita asuchiychik”, nispa. Martañataqmi Jesuspa ruway munasqanta manaraq musyaspan nirqa: “Señor ñachá asnarichkanña, ñam tawa punchawniyuqña”, nispa. Jesusñataqmi nirqa: “¿Manachu nirqayki creespaykiqa Diospa atiynin rikunaykita?”, nispa (Juan 11:39, 40).

Chaymi rumita asurachirqaku. Hinaptinmi Jesusqa hanaq pachata qawarispan runakunapa qayllanpi Diosta kaynata mañakurqa: “Taytáy, uyariwasqaykimantam graciasta quyki. Chiqaptam ñuqaqa yachani qamqa haykapipas uyariwasqaykita, ichaqa muyuriqniypi llapa runakunaraykum rimani kachamuwasqaykita paykuna  yachanankupaq”, nispa. Chaytaqa ruwarqa runakuna Diospa atiyninwan imatapas ruwasqanta yachanankupaqmi. Hinaspam kallpawan nirqa: “¡Lazaro, lluqsimuy!”, nispa. Hinaptinmi Lazaroqa lluqsiramurqa chakinpas-makinpas hinaspa uyanpas wankusqa. Chaymi Jesus nirqa: “Purinanpaq paskaychik”, nispa (Juan 11:41-44).

Chayta qawaspam Mariawan hinaspa Martawan kaq runakunamanta achkaq Jesuspa qatiqninña rikurirurqaku. Wakinmi ichaqa fariseokunaman hinaspa escribakunaman willaq rirqaku. Chaymi fariseokunawan riqsisqa sacerdotekunaqa judio runakunapa llapan autoridadninkuta huñururqaku. Chaypi kaqkunamanta huk kaqninmi karqa sacerdotekunapa kamachiqnin Caifas. Wakinñataqmi rimapakuspa niqku: “¿Imatam ruwasunchik? Kay runaqariki achka milagrokunatam ruwachkan. Hinata saqiruptinchikqa llapallankuchiki paypi iñirunqaku, hinaptinchá Roma nacionniyuqkuna hamuruspanku templonchikta hinaspa nacionninchikta qichuruwasun”, nispa (Juan 11:47, 48). Chaytaqa yachaqku Jesuspa imakunapas ruwasqanta kikin ñawinkuwan qawaq runakuna willasqankuraykum. Ichaqa manam Diospa atiyninwan Jesuspa ruwasqanmantaqa kusikuqkuchu, aswanqa runakuna kamachiyllatam kuyaqku.

Lazaropa kawsarisqanwanqa pinqayman churasqam karqaku saduceo runakunaqa, paykunaqa niqkum wañuqkunaqa manaña kawsarisqanmanta. Chaymi huk kaqnin saduceo kaq Caifas nirqa: “Qamkunaqa manam imatapas yachankichikchu, manataqmi musyakunkichikchu enteron nacion chinkachisqa kananmantaqa llapa runapa rantinpi huk runallapa wañukuynin aswan allin kasqanta”, nispa (Juan 11:49, 50; Hechos 5:17; 23:8).

Caifasqa manam kikillanmantachu chaytaqa rimarqa, aswanqa sacerdotekunapa kamachiqnin kaptinmi Jehova Dios chaynata rimarachirqa. Caifasqa Jesus wañuchisqa kanantam munarqa, chaynapi religionkunapi punta apaqkuna pinqayman churasqa ama kanankupaq. Chayna kaptinpas Caifaspa willakuy rimasqanqa qawachirqam Jesusqa judiokunarayku hinaspa lliw runakunarayku wañuchisqa kananmanta (Juan 11:51, 52).

Chaymantam chay tukuy rikchaq autoridadkunaqa Caifaspa rimasqanman hina Jesusta wañurachiyta munarqaku. Huk kaqnin autoridadmi ichaqa mana chaytaqa munarqachu, payqa karqa Nicodemom. Payqa, ¿Jesusmanqa willarqachu wañurachiy munasqankumanta? Imayna kaptinpas Jesusqa manam Jerusalenmanqa chayarqachu, chaynapi ama wañurachinankupaq.