ACHKA kutipim Jehova Diosqa huk michiqwan tupachikun. Palabranpim kayta niwanchik: “Kikiypuniñam ovejaykunata maskamuspay nanachikusaq”, nispa (Ezequiel 34:11, 12).

¿Pikunataq kanku Diospa ovejankunaqa? Payta kuyaq hinaspa yupaychaqnin runakunam. Bibliam nin: ‘Hamuspayá kumuykuspa adorasunchik. Tayta Diospa qayllanpiyá qunqurakusunchik. Paymi ñuqanchiktaqa unanchawarqanchik. Ñuqanchikpa Diosninchikmi payqa. Runankunam kanchik ñuqanchikqa. Michinan ovejankunam kanchik’, nispa (Salmo 95:6, 7). Jehova Diosta yupaychaqkunaqa ovejakuna hinam michiqninta kasunku. Wakinpim ichaqa mana chaynachu. Chaymi chiqisqa utaq chinkasqa ovejakuna hina tarikunku (Ezequiel 34:12; Mateo 15:24; 1 Pedro 2:25). Chaywanpas Diosqa manam saqirunchu.

¿Hinallachu michisuqnikita hina Jehova Diosta qawanki? ¿Imaynatam kunan tiempopi michiwaqninchik hina waqaychawanchik?

 Iñiyninchikpi allin kanapaqmi yanapawanchik. Diosmi nin: ‘Sumaqllaña pastokunapim michisqaykichik’, nispa. Nintaqmi: ‘Chaypi sumaq kanchakunapiña samaspankum, mikunqakupas [...] sumaq pastokunataña’, nispa (Ezequiel 34:14). Diosqa iñiyninchikpi allin kanapaqmi mikuyta hina achka yanapakuykunata tiempollanpi quwanchik. ¿Yuyankichu qillqanchikkunapi ima yachachikuypas, iñiqmasinchikkunapa mayqan yachachisqanpas utaq mayqan videopas yanapasusqaykita? ¿Musyakurqankichu chaywan Jehova Dios qanmanta nanachikusqanta?

Waqaychawanchik hinaspa yanapawanchik. Diosmi niwanchik: ‘Chullaruq ovejakunatam kutirichimusaq, wataykusaqtaqmi chakin pakisqa ovejakunatapas, iquyaruq ovejakunatapas ñuqaqa yanapaykusaqmi’, nispa (Ezequiel 34:16). Jehova Diosqa kallpantam qun llakikunawan hukmanyaqkunamanqa. Heridanta watachkaq hinam, piwanpas utaq iñiqmasinwanpas hukmanyachisqa ovejankunata allinyanankupaq yanapan. Chinkasqakunatawan mana valeqpaq hapikuqkunatam kanchanman kutimunankupaq yanapan.

Chinkaruptinchikmi maskawanchik. Diosmi nin: ‘Paykunatam libraykusaq tukuy hinastinpi chiqisqa kasqankumanta’, nispa. Niwanchiktaqmi: “Chinkaruq ovejakunatapas maskaykusaqmi”, nispa (Ezequiel 34:12, 16). Diosqa maskanmi chinkasqa ovejankunataqa. Arí, pipas chinkarusqanta musyakuspanmi maskan, tariruspanñataqmi anchata kusikun (Mateo 18:12-14). Serviqninkunatam nin: “Michinaypi kaq ovejaykuna”, nispa (Ezequiel 34:31). Qampas huk kaqnin ovejachanmi kanki.

¿Imanasqam Diosqa munan payman kutinaykita? Kusisqa kanaykita munasqanraykum. Paymi niwanchik achka bendicionkunata ovejankunaman qunanmanta (Ezequiel 34:26). Chayqa manamá yanqa rimayllachu. Qamqa qawarqankiñachá chayna kasqantaqa.

Yuyaymanay Jehova Diosmanta yachaspayki imayna tarikusqaykipi. ¿Imaynam tarikurqanki Diospa sutintawan runakunapaq imakuna ruwananmanta yachaspayki? ¿Yuyachkankichu hatun huñunakuykunapi iñiqmasinchikkunawan kaspa ancha kusisqa tarikusqaykita? ¿Manachu kusisqallaña wasikiman kutirqanki allin sunquyuq runakunaman Diosmanta yachachispayki?

Kaqmantamá chayna kusisqa tarikuwaq. Ñawpaq tiempopi Diospa serviqninkunam kaynata mañakurqaku: ‘Qanman kutirikunaykupaqyá kutirichiwayku. Dios taytalláy, ñawpaq tiempopi kasqaykuman hinayá musuqyachiwayku’, nispa (Lamentaciones 5:21). Mañakusqankutam Jehova Diosqa uyariykurqa, chaymi llaqtanqa kaqmanta kusikuywan yupaycharqa (Nehemias 8:17). Qamtapas uyarisuspaykim yanapasunki.

Ichaqa, Diosman kutimuqkunaqa huk sasachakuykunata atipanankupaqmi kallpanchakunanku. Qatiqninpim chaymanta yachasun.