1, 2. ¿Pikunataq kusikunku bautizakuqkunata qawaspanku?

¿ACHKA watañachu Jehová Diosta servinki? Chaynaqa, achka kutitañachá bautizakuqkunapaq discurso qosqankuta uyarirunki. Hayka kutitaña uyarispaykipas, kusikunkim asambleapi bautizakunankupaq ñawpaqpi tiyaqkunata qawaspayki hinaspa Diosman qokusqankuta qawachinankupaq sayariqta qawaspaykipas. Chayta qawaspankum asambleapi kaqkuna taqllakunku, wakinqa kusikuymantam waqankuraq. ¡Mayna kusikunapaqmá Diosta serviqkuna yapakusqanta qawayqa!

² Ñoqanchikqa llaqtanchik lawpi bautizakuqkunallatam qawanchik. Angelkunam ichaqa allpantinpi bautizakuqkunata qawanankupaq favorecesqa kanku. ¡Maynatachá ‘hanaq pachapiqa [...] kusikunku’ allpantinpi waranqantin runakuna sapa semana bautizakusqankuta qawaspankuqa! (Lucas 15:7, 10.) Jehová Diospa llaqtan yapakusqanmantam kusikunku (Hageo 2:7).

3. ¿Imanasqataq Satanasqa ‘yarqasqa leon hina muyuchkan’, hinaspa ima ruraytam munan?

³ Manam lliw angelkunachu kusikunku kay pachapi mana allin kaqkunamanta karunchakuspa waranqantin runakuna bautizakusqankumantaqa. Demoniokunaqa  llumpaytam piñakunku. Manamá admirakunapaqchu, Satanasmi nirqa runakunaqa interesraykulla Diosta servisqankumanta, nirqataqmi pruebakunapi tarikuspankuqa Jehová Diosta qepancharunankumantapas (leey Job 2:4, 5). Chaymi, Jehová Diosman pipas qokuspanqa Satanas llulla kasqanta qawachin, chay rurasqanqa Satanasta uyanpipas laqechuchkanman hinam. Sapa semana waranqantin laqechuta hina chaskispanmi Diabloqa piñasqallaña hinaspa ‘yarqasqa leon hina muyuchkan pitapas millpurunanpaq’ (1 Pedro 5:8). Chaymi tukuyta ruran Dioswan amistadninchikta yanqacharunanpaq hinaspa favornintapas chinkarachinanchikpaq (Salmo 7:1, 2; 2 Timoteo 3:12).

4, 5. a) ¿Imakunatam Satanasqa mana rurayta atinmanchu? b) ¿Imatam Bibliaqa cristianokunaman segurawanchik?

⁴ Mayna piñasqaña hinaspa ‘yarqasqa leon’ hina kaptinpas  manam manchakunanchikchu. ¿Imanasqa? Iskay razonraykum. Puntataqa, manam haykapipas Jehová Diospa llaqtantaqa chinkachinqachu. Kaytaqa Satanaspas yachanmi, Jehová Diosmi nirqa “hatu-hatun ñakariymanta” ‘achkallaña runakuna’ salvasqa kananmanta, paypa nisqanqa cumplikunpunim (Apocalipsis 7:9, 14).

⁵ Chaymantapas, Satanasqa manam urmachinmanchu Jehová Diospi confiaqtaqa. Chaytaqa sutillatam qawanchik Diosmanta willakuq Azarias, rey Asaman kayna nisqanpi: “Tayta Diosmi yanapasunkichik payta qatiptikichikqa” (2 Cronicas 15:2; leey 1 Corintios 10:13). Bibliapiqa ejemplokunam kachkan Diospa serviqninkuna, Satanaswan mana vencechikusqankumanta (Hebreos 11:4-40). Paykuna hina Diospi hapipakuspanchikqa manam Satanaspa contrallanpichu churakusun, aswanqa vencesunchikmi. Chayna kasqantam Biblia segurawanchik: ‘Diablopa contranpi qaqa hina sayaychik, chaynapim Diabloqa qamkunamanta ayqekunqa’, nispa (Santiago 4:7).

6. ¿Imata ruraspanmi Satanasqa sapakamata venceyta munawanchik?

⁶ Qawasqanchikman hina, Satanasqa manam haykapipas Diospa llaqtantaqa vencenqachu. Mana cuidakuqkunatam ichaqa vencerunman. ¿Imaynata? Jehová Dioswan allin kayninta yanqacharuspanmi. Chaypaqqa contranchikpi churakuspanmi sasachawanchik, sapakamatam venceruyta munawanchik hinaspapas mana musyaylla toqllakunatam servichikun. Chaykunamantayá yachasunchik.

7. ¿Imanasqataq Satanasqa Jehová Diospa llaqtanta llumpayta sasachachkan?

⁷ Contranchikpi churakuspan sasachawasqanchikmanta. Apostol Juanmi nirqa ‘kay pachapi mana allin kaqkuna  Diablopa makinpiña kasqanta’ (1 Juan 5:19). Chaymi rikchan-rikchanlla tarikunanchik. Kay pachapi mana allin kaqkuna Satanaspa makinpiña kasqanraykum Jehová Diospa serviqninkunata Satanasqa astawan sasachan, Diospa serviqninkunaqa manam haykapipas vencechikunkuchu (Miqueas 4:1; Juan 15:19; Apocalipsis 12:12, 17). Pisi tiempoyoqllaña kasqanta yachaspanmi aswan piñasqa kachkan hinaspam astawanraq kallpanchakun atacawananchikpaq. Kay tiempopiqa llapallanchikta urmachiyta munaspanmi tukuy kallpanwan astawan sasachawachkanchik, chaymi ima ‘tiempopi’ kawsasqanchikmanta ‘entiendespa’ ‘imam rurananchikta’ yachananchik (1 Cronicas 12:32).

8. ¿Imatam yachachiwanchik mana allin espiritukunawan ‘peleasqanchikmanta’ griego rimaypi Pablopa nisqan?

⁸ Cristianokunata Satanas vencey munasqanmanta. Pablom cristianokunata nirqa: “Peleachkankichikqa altokunapi mana allin espiritukunapa contranpim”, nispa (Efesios 6:12). ¿Ima nichkarqataq ‘peleachkankichik’ nisqanwanqa? Griego rimaypi ‘peleachkankichik’ ninanqa maqanakuymantam rimachkan. Kayna nisqanwanmi Pablo qawachirqa demoniokunawan sapakama peleasqanchikta. Chaynallam maylaw nacionpipas, runakuna mana allin espiritukunapi creeptinkupas otaq manapas. Manam qonqananchikchu Jehová Diosman qokusqanchik punchawmanta demoniokunawan peleananchikpaq tarikusqanchikmanta. Chaymi bautizakusqanchik punchawmanta peleachkanchik. Chaychiki Efeso congregacionpi cristianokunaman rikchan–rikchanlla kanankupaq Pabloqa kimsa kutita consejarqa (Efesios 6:11, 13, 14).

9. a) ¿Imaraykutaq Satanaswan demoniokunaqa imaymana toqllakunata servichikunku? b) ¿Imanasqataq Diabloqa piensasqanchikpi engañayta munawanchik, hinaspa imaynatataq contranpi churakuchwan? (Qawariy  192, 193 paginankunapi cuadrochata.) c) ¿Ima toqllamantataq yachasunchik?

⁹ Mana musyaylla toqllakuna servichikusqanmanta. Pablom cristianokunata kallpanchan ‘wateqaqninku’ Diablowan  mana vencechikunankupaq (Efesios 6:11). ¿Imanasqataq chaynata nin? Diablowan demoniokuna engañawananchikpaq imaymana toqllakunata servichikusqankuraykum. Chaynata ruranankupaqqa achka razonmi kan. Satanaswan demoniokunaqa yachankum wakin cristianokuna huk pruebata venceruspa, huk pruebapi wichiykunankuta. Chaymi ima rurasqanchikpipas wateqawachkanchik. Yachaytam munanku Dioswan amistadninchik imapim mana allin kasqanta. Bibliam ichaqa yachachiwanchik Satanaspa toqllankunamanta cuidakunanchikpaq (2 Corintios 2:11). Kay libropiqa yacharunchikñam qollqella kuyay toqllamanta, mana allin runakunawan amistad ruray toqllamanta hinaspa huchapakuy toqllamantapas. Kunanqa yachasunchikyá espiritismo nisqa toqllamanta.

10. a) ¿Ima ruraykunataq espiritismoqa? b) ¿Ima nintaq Jehová Diosqa espiritismomanta, qamqa imaninkitaq espiritismomanta?

¹⁰ Espiritismoqa layqa ruraymi, adivinaymi, wañusqakunawan rimaymi hinaspa chayman rikchakuq kaqkunatapas ruraymi. Chaykuna ruraqkunaqa demoniokunapa makinpim kachkan. Yachasqanchikman hina, Jehová Diosqa ‘millakunmi’ kay ruraykunataqa (Deuteronomio 18:10-12; Apocalipsis 21:8). Hanaq pachapi Taytanchikqa cristianokunatam kamachin ‘mana allin kaqkunata cheqninankupaq’, chaymi demoniokunawan amistadta ruraspa traicionaytaqa manapuni munachwanchu (Romanos 12:9). Chay ruraytaqa piensayllatapas manam munanchikchu.

11. ¿Imaynataq Satanasqa tarikunman espiritismowan chaqrukuptinchikqa? Rikchanachiywan willarimuy.

¹¹ Cheqaptamá, espiritismowan chaqrukuyqa Jehová Diosta qepanchaymi. Chaymi Diabloqa imaymanata ruran chay huchapi urmachiwananchikpaq. Urmarachiwaspanchikqa anchatam kusikun. ¿Imaynanpi? Rikchanachisun. Enemigopa tropanman huk soldado hukllawakuptinqa,  hukllawakusqan tropapa jefenqa anchallatañam kusikunman, traicionaq soldadota premiota hina qawachispanchá traicionaq soldadopa jefenta humillanman. Chaynallataqmi mayqan cristianopas espiritismowan chaqrukuspanqa, Diostam traicionachkanman hinaspa Satanaspa kamachisqanñam rikurirunman. ¡Maynatachá Satanasqa kusikunman premiota hina traicionaqta qawachispanqa! ¿Munachwanchu Satanasta kusichiyta? Manapunim, manam traicionaq runachu kanchikqa.

12. Espiritismomanta, ¿imayna piensananchiktam Satanasqa munan?

¹² Espiritismota millakuypaq qawaspaqa manapunim chaywanqa chaqrukusunchu. Chaytaqa Satanasqa yachanmi, chaymi piensayninchikta cambiayta munan. ¿Imaynata? ‘Mana allin’ kaqta allinta hina qawachiwaspanchik hinaspa ‘allin kaqta mana allinta’ hina qawachiwaspanchikmi (Isaias 5:20). Chaytaqa ruran cheqap yachachikuymanta iskayrayachiwaspanchikmi.

13. Willarimuy imaynatam Satanas cheqap yachachikuyta yanqachasqanmanta.

¹³ Ejemplokunatayá qawasunchik imaynatam Satanas cheqap yachachikuyta yanqachasqanmanta. Eden huertapim Satanasqa Evata tapurqa: “Diosqariki nisurqankichik: ‘Huertapi llapa sachakunapa ruruntaqa amam mikunkichikchu’ nispam ¿aw?”, nispa. Watakuna qepatam Satanasqa hanaq pachapi angelkunapa huñunakusqanman rispan Jobmanta Diosta nirqa: “Jobqariki adorasuchkanki manam debaldellachu”, nispa. Achka pachak wata qepatañataqmi Jesusta nirqa: “Diospa Churin kaspaykiqa kay rumikunatayá kamachiy tantayarunanpaq”, nispa. Soqta semana ñawpaqtam, Jehová Dios kaynata nirqa: “Paymi kuyasqay Churiy. Payraykum kusisqa kachkani”, nispa. Chayna  nisqanmantam Satanasqa burlakuchkarqa (Genesis 3:1; Job 1:9; Mateo 3:17; 4:3).

14. a) Espiritismomanta iskayrayaspa, ¿ima tapukunanchiktam Satanasqa munan? b) ¿Imamantam yachasunchik qatiqninpi?

¹⁴ Ñawpaq tiempopi hinam Diabloqa cheqap yachachikuyta yanqachan. Ejemplopaq, espiritismowan. Llakikunapaqmi wakin cristianokunaqa espiritismomanta hinaspa chayman rikchakuq kaqkunamanta iskayrayanku (2 Corintios 11:3). ¿Imaynatam chayna piensaqkunata yanapachwan piensasqankuta cambianankupaq? ¿Imataq yanapawasun kay toqllamanta cuidakunanchikpaq? Kay tapukuykunata kutichinapaqqa yachasunchikyá kusirikunapaq kaqkuna hinaspa hampichikunapaq kaqkuna espiritismowan chaqrusqa kasqanmanta.

15. a) Huklaw nacionkunapiqa, ¿allinpaqchu hapinku espiritismota? b) Wakin cristianokunaqa, ¿imatam piensanku espiritismomanta?

¹⁵ Huklaw nacionkunapiqa espiritismota, layqa rurayta hinaspa chayman rikchakuq ruraykunatam allinpaq hapinku. Chaymi, videokunapi, librokunapi, televisionpi hinaspa pukllanapaq videokunapipas espiritismomanta willakuykunataqa kusirikunapaq allin kaqta hina qawachinku. Arí, kanmi espiritismomanta qawachiq ancha reqsisqa librokunawan videokuna, kantaqmi chaykunata chaninchaq runakunapas. Demoniokunaqa runakunatam creechinku espiritismoqa mana imanakuq kasqanta. ¿Kanchu chayna piensaq cristianokuna? Arí, kanmi. Ejemplopaq, espiritismomanta video qawaq cristianom nirqa: “Arí qawarqanim, ichaqa qawasqaywanqa manamá espiritismowanchu chaqrukuchkani”, nispa. ¿Imanasqataq chayna piensayqa mana allinchu?

16. ¿Imanasqataq mana allinchu espiritismowan kusikuyqa?

¹⁶ Espiritismomanta imapas qawayqa ruraywanqa manam  kaqllachu, ichaqa manam piensachwanchu mana imanakuq kasqanpiqa. ¿Imanasqa? Bibliapa nisqanman hina, Satanaswan demoniokunaqa manam yachankuchu imam piensasqanchiktaqa. * Ichaqa imam piensasqanchikta hinaspa Dioswan amistadninchik imapi mana allin kasqanta yachayta munaspankum tukuy rurasqanchikta hinaspa imawan kusikusqanchiktapas wateqanku. Chaymi, espiritistakunamanta, layqakunamanta, hinaspa chayman rikchaq kaqkunata videokunapi hinaspa librokunapi qawaspanchikqa demoniokunaman qawachichkanchikman imapim Dioswan amistadninchik mana allin kasqanta. Chaykunata servichikuspanmi demoniokunaqa astawan hikutawanchikman Jehová Diosmanta karunchawananchikpaq. Espiritismowan kusirikuspankum wakinkunaqa chaykunataña ruranku (leey Galatas 6:7).

17. ¿Imaynatam onqospa hukmanyaqta Satanasqa engañarunman?

¹⁷ Satanasqa manamá kusirikunapaq kaqkunallawanchu engañawanchik, chaytaqa ruranmi hampichikunapaq kaqkunawanpas. Ejemplopaq, ichapas huk cristiano hukmanyasqallaña tarikunman ima hampipas mana sanoyachiptin (Marcos 5:25, 26). ¿Imaynatam Satanas hinaspa demoniokuna engañarunman? Paykunaqa yachankum imaynata onqoqta engañanman llumpayta hukmanyananpaq, Diospa kamachisqanta mana kasukunanpaq hinaspa adivinaqkunapa rurasqankunawan hampichikunanpaq. Chay toqllaman urmaykuspaqa Dioswan amistadnintam yanqacharunman. ¿Imaynata?

18. Cristianokunaqa, ¿imakunawanmi mana hampichikunanchikchu, imanasqa?

 ¹⁸ Espiritismowan huchallikuq Israel runakunapa ofrendantam Diosqa mana aguantarqachu (Isaias 1:13). Chaymi Jehová Dios nirqa: “Makikichikta hoqarispa mañakamuwaptikichikpas qamkunamantam asurichini ñawiykunatapas. Achka kutita mañakamuwaptikichikpas manam uyarikichikchu”, nispa (Isaias 1:15). Manamá ñoqanchikqa chayna kaytaqa munanchikchu. Manam munanchikchu onqoptinchik mañakusqanchikta Dios mana uyariwananchiktaqa nitaq manaña kallpanchawananchiktapas (Salmo 41:3). Chaynaqa, ¿imatam rurasunchik hampichikunapaq kaqkuna espiritistakunapa rurasqan kaptinqa? Manapunim chayna hampikunawanqa hampichikuchwanchu (Mateo 6:13). * Chaynapim Jehová Diospa amistadninta mana yanqacharusunchu (qaway  “¿Espiritismo nisqachu kanman?”, niq yachachikuyta).

19. a) ¿Imatam creenku wakin runakuna Satanasmanta? b) Diosta serviqkunaqa, ¿imamantam mana uyarinanchikchu nitaq willakunanchikchu?

¹⁹ Satanasta huklaw nacionkunapi mana manchakuptinkupas,  huklaw nacionkunapiqa manchakunkum. Achka runakunam creenku Satanas aswan atiyniyoq kasqanta. Chaymi mikuspankupas, llamkaspankupas hinaspa puñuspankupas demoniokunataqa manchakunku. Ichaqa uyariyta hinaspa willakuytam munanku espiritukunapa tukuy imaymana rurasqankumanta. Jehová Diospa serviqninkunaqa, ¿uyarinanchikchu hinaspa willakunanchikchu chaykunamanta? Manam, iskay razonrayku.

20. ¿Imaynatam mana cuentata qokuspa Satanasta reqsisqa kananpaq yanapachkachwan?

²⁰ Demoniokunapa rurasqanmanta mana willakachakunapaq punta kaq razonqa kaymi: Satanaspa favorninpim kachkachwan. ¿Imaynata? Bibliaqa yachachinmi Satanas atiyniyoq kasqanmanta, ‘llullakuspan admirakuypaq milagrokuna’ rurasqanmanta hinaspa ‘imaymana  engañowan’ pantachisqanmantapas (2 Tesalonicenses 2:9, 10). Satanasqa pimantapas aswan engañakuqmi hinaspa yachanmi espiritismota allinpaq hapiqkunata imayna engañayta. Chaynapim runaman uyarichin otaq rikuchin mana cheqap kaqkunata. Runakunaqa ichapas cheqappaq hapispa willakunku hinaspa willakusqankuman hinaqa mana kaqtaña willakunku. ¿Imataq pasanman Diospa serviqnin chaykunamanta willakuptinqa? ‘Llullakuqkunapa taytanmanmi’ sayapakuchkanman. Hinaspapas Satanas aswan reqsisqa kananpaqmi yanapachkanman (Juan 8:44; 2 Timoteo 2:16).

21. ¿Imamanta rimaymi aswan allinqa kanman?

²¹ Demoniokunapa ñakarichisqan cheqap kaptinpas, kanmi huk razonraq wawqe-paninchikkunaman mana willakunapaq. Jesuspi piensaytam munanchikqa manam Satanaspichu. ‘Kallpanchakunanchikqa iñichiwaqninchik hinaspa qespichiwaqninchik Jesusta qawaypim’ (Hebreos 12:2). Demoniokunapa ima ruray atisqanta otaq mana atisqanta yachachkaspanpas Jesusqa manam qatiqninkunamanqa demoniokunapa rurasqanmantachu willarqa. Aswanqa Diospa Gobiernonmanta willakuypim kallpanchakurqa. Allinpunim kanman Jesuspa hinaspa apostolninkunapa ejemplonta qatikuspa “Diospa admirakuypaq rurasqankunamanta” rimayqa (Hechos 2:11; Lucas 8:1; Romanos 1:11, 12).

22. ¿Imata ruraptinchikmi hanaq pachapi kaqkuna ‘kusikunku’?

²² Qawasqanchikman hina Satanasqa munanmi Jehová Dioswan amistadninchikta yanqacharuyta, chaypaqmi espiritismota hinaspa imaymana toqllakunata servichikun. Chayna kaptinpas, mana allin kaqta cheqnispa allin kaqta ruraspanchikqa manam dejakusunchu Diablo imaymana espiritismowan huchallichiwananchiktaqa (leey Efesios 4:27). ¡Mayna ‘kusikuychá’ hanaq pachapi kanqa, Satanas chinkachisqa kanankama toqllankunapi mana ‘urmaptinchikqa’! (Efesios 6:11.)