Chuya espiritupa guiasqanman hinam Pablo yachachirqa Jehová Diosta serviq warmikuna wakin kutikunapi umanku tapakunankumanta. ¿Haykapitaq tapakunanku, hinaspa imanasqa? Qawasunchikyá apostol Pablopa nisqanta 1 Corintios 11:3-16 nisqapi Dios honrasqa kananpaq haykapi hinaspa imanasqa umanku tapakunankumanta. Pabloqa kimsa asuntopi uma tapakunamantam rimachkan: 1) ima rurasqanpi tapakunan kaptin; 2) qaripa rurananta maypipas ruraspa; hinaspa 3) Jehová Diospa arreglo rurasqanta respetaspa.

Ima rurasqanpi umanku tapakunan kaptin. Pabloqa nirqa Diosta Mañakuspa hinaspa Diosmanta willakuspa tapakunankumantam (4, 5 versiculokuna). Yachasqanchikman hinaqa mañakuspam Diosta yupaychanchik, Diosmanta willakuspañataq warmipas qaripas Bibliamanta yachachinchik. Chaynaqa, ¿Bibliamanta sapa kuti yachachispanku otaq mañakuspanku umanku tapakunankumantachu Pabloqa rimachkan? Manam. Tapakunankupaqqa qatiqnin asuntopim reparananku.

Qaripa rurananta maypipas ruraspa. Apostol Pabloqa familiapi hinaspa congregacionpi umanku tapakunankumantam rimachkan. Paymi qellqarqa: ‘Qariqa warminpa umanmi, [...] warmi qala umalla Diosta mañakuspanqa otaq Diosmanta willakuspanqa umantam penqayman churan’, nispa (3, 5 versiculokuna). Familiapiqa Jehová Diosmi qarita churan warmipa uman  kananpaq. Qariman Jehová Diospa kamachisqanta warmi ruraptinqa, ¿imataq pasanman? Qosan uman kasqanta warmi mana reqsikuspanqa qosantam penqaypi churanman. Ejemplokunatayá qawasun. Warmiqa Bibliamanta estudiota qochkan qosanpa qayllanpi. Qosan uman kasqanta respetasqanraykum umanta tapakunan. Chaynatam ruranan qosan bautizasqa otaq mana bautizasqa kaptinpas. * ¿Bautizasqa qari wawanpa qayllanpi cristiana mañakunan otaq yachachinan kaptinqa? Familiapi warma mana nanachikuptinpas mamanqa umantam tapakunan. ¿Imanasqa? Congregacionpi bautizasqa qarikunata nanachikuq kanankupaq Jehová Dios nombrasqanta respetasqanraykum.

Congregacionpi cristiana, haykapi uman tapakunanmantam Pablo kaynata qellqarqa: “Pipas kaymanta discutiyta munaspaqa yachachunyá, ñoqanchik ukupipas nitaq huñunasqa iñiqkunapipas manam kanchu huk costumbreqa”, nispa (16 versiculo). Jehová Diosqa iñiqkunapi nanachikunankupaqmi bautizasqa qarikunallata nombran (1 Timoteo 2:11-14; Hebreos 13:17). Chaymi llaqtanmanta nanachikunanpaq ancianokunata hinaspa siervo ministerial nisqankunata nombran (Hechos 20:28). Wakinpim ichaqa bautizasqa experienciayoq qaripa rurananta cristiana ruranman. Ejemplopaq, predicanapaq huñunakuyta diriginanpaq experienciayoq qari mana kaptinqa ichapas diriginman cristiana warmi. Chay huñunakuy congregacionpa yachachiyninpa parten kasqanraykum, bautizasqa qari diriginan. Chaynallataqmi bautizasqa qaripa qayllanpi cristiana Bibliamanta estudiota qoptinpas. Chaykunapim warmiqa umanta tapakunan, rurasqanqa qaripa ruranan kasqanta reqsikusqanrayku. Ichaqa manaraq bautizasqa qaripa qayllanpi cristiana Bibliamanta estudiota qospanqa manam umantaqa tapakunanchu, qosanpa qayllanpi kaspam ichaqa umanta tapakunan.

Diosta servisqanpi wakin rurayninpim ichaqa umanta mana tapakunanchu. Ejemplopaq, huñunakuypi rimaspan, qosanwan otaq bautizasqa qariwan wasin wasin predicaspan hinaspa manaraq bautizasqa wawankunawan Bibliata estudiaspa otaq  orakuspa. ¿Imatam ichaqa ruranman uman tapakunamanta iskayrayaspanqa? Puntataqa chay asuntomantam allinta estudianan. * Hinalla iskayrayaspan hinaspa conciencian acusaptinqa umantaqa tapakunmanmi qawasqanchik fotopi hina.

Jehová Diospa arreglo rurasqanta respetaspa. 10 versiculopim yachachichkan iskay razonrayku cristianaqa umanta tapakunanmanta, chaypim nin: ‘Warmiqa umantam tapakunan qariman sujetasqa kasqanta angelkunaman qawachinanpaq’, nispa. Punta kaq razonmi “qariman sujetasqa kasqanta” qawachinanpaq. Arí, warmi umanta tapakusqanqa qawachinmi congregacionpi bautizasqa qarikunata nanachikuq kanankupaq Jehová Diospa arreglo rurasqanta respetasqanta. Chaynata ruraspanmi qawachichkan Jehová Dios kuyasqanta hinaspa payman sonqo kasqantapas. ¿Mayqentaq iskay kaq razonqa? Chay textopa nisqanman hinaqa ‘angelkunaraykum’. ¿Imanasqataq allin kanman angelkunarayku warmi umanta tapakuyninqa?

Angelkunaqa qawachkankum hanaq pachapi hinaspa kay Pachapi Jehová Diospa serviqninkunata, reparankum Diospa kamachisqanta kasukusqankupi. Allinpaqmi hapinku pantaq runakunapa kasukusqankuta. Jehová Dios kamachiqnin kasqantam angelkunapas qawachinanku, chaytaqa manamiki qallariypiqa llapallankuchu rurarqaku (Judas 6). Kunanpas, bautizasqa qarimanta cristiana warmi aswan experienciayoq hinaspa yachayniyoq kachkaspanpas, qari nanachikuq kananpaq nombrasqa kasqanta respetasqanqa ejemplom angelkunapaq. Paykunaqa aswan admirasqaraqmi kanku hanaq pachapi kawsananpaq suyakuyniyoq cristianana kaptinqa. ¿Imanasqa? Chay  cristiana hamuq tiempopi hanaq pachamanta Cristowan kamachiq kaspa angelkunamantapas astawan favorecesqa kasqanraykum. Qawasqanchikman hina, cristianakunaqa ancha favorecesqam kanku. Diosman sonqo kasqankuwan hinaspa kasukusqankuwanmi millonninpi angelkunata yachachinku humilde hinaspa kasukuq kanankupaq.