Warmacha kaspankuqa lliwtam willakunku, wiñaruspanmi ichaqa manaña munanchu. Paywan parlayta munaptikiqa arí otaq mana nispallam nisunki, otaq piñakuytam qallaykunku.

Ama hukmanyaychu, mozo-sipasyaq warmaykiwan parlaytaqa atiwaqmi. Ichaqa puntatam yachanayki imarayku chay sasachakuykuna kasqanmanta.

Libre kayta munasqanku. Mozo-sipasyaq warmayki allin yuyayniyoq kananpaqqa carro manejayta yachachkaq hinam imayna vida pasayta yachanan, mana allinta manejaspanqa tikrakuykunmanmi, chaynallataqmi vida pasayta mana yachaspanpas sasachakuypi tarikunman. Wakin mozo-sipaskunaqa astawan libre kaytam munanku, wakin tayta-mamakunañataqmi mana anchataqa kacharinkuchu. Chayraykum peleollapiña kanku. 16 watanpi Brad mozom nin: “Tayta-mamayqa tukuytam ñoqamanta yachayta munan. Mana ima ruwanayta saqewaptinqa 18 wataypim wasiymanta ripukusaq”, nispa. *

Piensay atisqanku. Warmachakunaqa manam mozo-sipasyaqkuna hinachu piensanku, mozo-sipasyaqkunaqa imatapas astawan yachanankupaqmi tanteanku, chayna ruwayninkuqa allin yuyayniyoq kanankupaqmi yanapanqa. Kaywan tupachisun, iskay warmachakunapa maman igualman tantata parteykuspan qoykusqanqa allin ruwaymi paykunapaqqa. Mozo-sipasyaq warmakunam ichaqa mana chaynatachu qawanku allin ruwaytaqa. Tanteay yachasqankuraykum paykunaqa yachayta munanku imanasqa chayna kasqanmanta. Ichaqa kachkanmi huk sasachakuy. Chayna tanteayta yachasqanraykum qamtapas kutipasunkiman.

Atikusqanman hina parlaychik. Hawka tarikuptin parlapayay. Wakin tayta-mamakunam ninku wasipi imatapas ruwaspanku hinaspa carropi rispanku warmanku astawan parlay munasqankumanta. Ichaqa qawanakuspa rimaytam mana munankuchu. (Imatam Biblia yachachin: Deuteronomio 6:6, 7.)

Imam ninaykita niy. Warmaykiwan rimaspaqa manam piñanakuypi kanaykichikkamaraqchu parlanaykichik. Imam ninallaykimantayá rimayqa. Nisqaykita kasukunanpaqmi sapallanpi yuyaymananqa, chaytaqa manam chayllachu ruwanqa. (Imatam Biblia yachachin: Proverbios 1:1-4.)

Uyariy hinaspa entiendey. Rimayta tukunankama uyariy, chaynapi ima pasasqanta allinta entiendenaykipaq. Rimanayki kaptinñataq entiendesqaykita qawachiy. Warmaykita llumpayta controlaptikiqa kamachisqaykikunata mana kasukunanpaqmi mana yachasqallaykita imatapas ruwanqa. Chayna kasqanmantam huk libro nin: “Chaymi warmakunaqa iskay uya kanku: tayta-mamankuta kasukunankupaq nichkaspankupas, paykuna mana rikuptinkuqa munasqankutam ruwanku”, nispa (Staying Connected to Your Teenager). (Imatam Biblia yachachin: Filipenses 4:5.)

Hawkalla kay. Kari sipasmi willakun: “Mamaywan mana imapipas entiendenakuptiymi imapas nisqaywan sientikuq. Hinaptinmi rimasqaykuqa piñanakuypi tukuq”, nispa. Imamantapas piñarikunaykimantaqa churi-wawayki imayna sientekusqanmanta entiendesqaykita qawachiy. “Imallaraqtaqsi chayqa” ninaykimantaqa, niwaqmi: “Yaqachusmi kayqa hukmanyachisuchkanki”, nispa. (Imatam Biblia yachachin: Proverbios 10:19.)

Atikusqanman hina churi-wawaykita sasachakuyninpi yanapay, ama allichapuychu. Mozo-sipasyaq warmakunapa piensayninqa rikchakunmi ejercicio ruwayman. Warmayki sasachakuypi tarikuptinqa saqey kikin allichananpaq, otaq saqey ejerciciota ruwananpaq. Kuskaykichik qawaychik chay sasachakuymanta hinaspa saqey kikin imayna allichananta. Imayna allichananmanta rimaruspa niy: “Kay punchawkuna piensaykuchkay chaymantaña rimasunchik imayna allichanaykipaq tanteasqaykimanta”, nispa. (Imatam Biblia yachachin: Hebreos 5:14.)