QARANPI KAQ YACHACHIKUY | ALLIN RUWAYKUNAQA HINALLAM YANAPAWASUN
Allin ruwaykunaqa hinallam yanapawasun—Mana llullakuq kaymanta
BIBLIAPA YACHACHISQAN. ‘Dios taytalláy ¿pitaq chuya wasikipi yachanman? [...] Mana huchapi purispa allinta kawsakuqmi, sunqumanta chiqapllata rimaqmi’ (Salmo 15:1, 2, CQ12).
¿IMAPIM YANAPAWANCHIK? Yaqa lliw runakunam yachanku llullakuyqa mana allin kasqanta. Ichaqa ¿imatataq ruwanku imapas makillankupi kaptinqa? Chayqa sunqunkupi ima kasqanmantam kanqa.
Rimarisun Raquel sutiyuq warmimanta. Paymi llamkayninpi imatapas rantipakamunanpaq kamachisqa karqa. Paymi nin: “Rantikuwaqniy wakin runakunam niwaqku paykunallamanta rantiptiyqa pakallapi qullqita quwanankumanta. Ichaqa imam kaqta ruwanapaq Bibliapi yachachisqanta yuyarispaymi chay niwasqankuta qipancharqani. Chayna ruwasqaytam patronayqa yacharurqa, chaymantapacham ñuqamantaqa manaña iskayrayarqañachu”, nispa.
Chay runakunapa nisqanta Raquel kasukuspanqa achka qullqiyuqchá kanman karqa. Ichaqa, ¿imataq pasanman karqa patronan chay ruwasqanmanta yacharuptinqa? ¿Yaqachu llamkayninmanta qarqurachikunman karqa? ¿Tarinmanchu karqa huk llamkaytapas? Chaykunapi yuyaymanasqanmi yanaparqa, ichaqa astawanraqmi yanaparqa sunqunpi imayna tarikunanmanta yuyaymanasqan. Bibliaqa ninmi quri-qullqiyuq kaymantaqa aswan allinqa kuyasqa runa kaymi (Proverbios 22:1).
Jessieqa llamkayninpim kuyasqa runa karqa mana llullakuspan imam kaqta ruwasqanrayku
Jessie sutiyuq runapas llamkayninpim kuyasqa runa karqa mana llullakuspan imam kaqta ruwasqanrayku. ¿Imapitaq chayna kasqanqa yanaparqa? Paytam llamkayninpi cuentallikuq kananpaq akllarurqaku. Chaymantapas aswan tiempoyuqmi karqa wasinpi kaqkunawan kuska kananpaq, chaynataq religionninpi ima ruwaykunapipas yanapakunanpaq.
Wakin negocioyuq runakunam mana llullakuq imam kaqta ruwaq runakunata maskanku negocionpi llamkanankupaq. Rimarisun Filipinas nacionpi hatun negocioyuq runamanta. Paymi chay nacionpi Jehova Diospa testigonkunapa oficinanman qillqarqa llamkay munaq testigokuna negocionpi llamkapakunankupaq. ¿Imanasqataq paykunata munarqa? Allin llamkaq hinaspa mana llullakuspa imam kaqta ruwasqankuraykum. Chayna kasqanchikwanqa Jehova Diostam hatunchanchik, paymi yachachiwanchik mana allin kaqkunata chiqnispa allin kaqkunata kuyanapaq (Amos 5:15).
Kaykunatapas leeykuy
¡RIKCHARIY!
Allin runa kayqa ¿allinninchikpaqchu kanman?
Achkam piensanku: “Allinpaq rikchakusuptikiqa sonqoykipaq munasqanta ruway”. ¿Allinchu chayna piensasqanku? Allin runa kanaykipaq Bibliapa yachachisqankunata estudiay.
