Bautizakusqan punchawpim taytanchik Jehovaqa churin Jesusta akllaykurqa payta yupaychaypi yanapawananchikpaq. ¿Imaynatam chayna kasqanta yachanchik? Qawaykusunyá. Jesusqa bautizakuruspanmi taytanchik Jehovapa munayninta ruwayta qallaykurqa. Chay munaynintaqa ruwarqa taytanchik Jehovapa munasqanman hinam (Gal. 1:4; Heb. 10:5-10). Chay munayninta ruwayqa tupan ñawpaq tiempopi animalkunata kañanawanmi. Paypa munasqanman hina ruwayñataqmi tupan ñawpaq tiempopi Diospa wasinwan (Mat. 3:16, 17; Heb. 5:4-6).

Ñawpaq tiempopiqa manam animalkuna kañanawan Diospa wasillanchu karqa. Karqataqmi yupaychaypi yanapakuqpas. Chayman hinam taytanchik Jehovaqa Jesusta payta yupaychaypi yanapawananchikpaq akllaykurqa. ¿Imaynatam yachanchik taytanchik Jehovaqa churin Jesusta manaraq wañukuchkaptin hinaspa manaraq kawsarimuchkaptin yupaychaypi yanapawananchikpaq akllaykusqanta? Chaytaqa yachanchik ñawpaq tiempopi yupaychaypi yanapakuq Aaronmanta hinaspa chayna yupaychaypi yanapakuqkunamanta yachaspanchikmi (Hech. 10:37, 38; Mar. 1:9-11).

Moisespa chaskisqan kamachikuypim nirqa yupaychaypi yanapakuqlla Diospa carpan ukupi chuyay-chuyay lawman yaykunanmanta. Diospa wasinta ruwaruptinkupas, yupaychaypi yanapakuqkunallam Diospa wasinpa chuyay-chuyay lawninmanqa yaykurqaku. Diospa wasin ukupiqa chuyay-chuyay lawtam chuya lawmanta rakirqa hatun mantel (Heb. 9:1-3, 6, 7). Chay chuyay-chuyay lawmanmi yupaychaypi yanapakuqqa watapi huk kutillata yaykuq. Chaynaqa, yupaychaypi yanapakuq Aaron hinaspa wakin yupaychaypi yanapakuqkunapas, chay hatun mantelta kichaykuspa chuyay-chuyay lawman manaraq yaykuchkaspankum yupaychaypi yanapakunankupaq akllasqa karqaku. Taytanchik Jehovapas chaynam churin Jesusta manaraq wañukuchkaptin akllarqa payta yupaychaypi yanapawananchikpaq. Chaymantañam chay ñawpaq tiempopi hatun mantelta kichaykuchkaq hina chuyay-chuyay lawman yaykurqa. Chay ñawpaq tiempopi hatun mantelqa tupan kikin Jesuspa aychanwanmi. Chuyay-chuyay lawñataqmi hanaq pachawan (Heb. 10:20). Chayraykum apostol Pablopas nirqa “Jesusqa yupaychaypi yanapakuq hinaña hamusqanta” hinaspa runakunapa mana ruwasqan chuyay-chuyay lawman yaykusqanta. Chay chuyay-chuyay lawqa karqa hanaq pacham (Heb. 9:11, 24).

Chayqa karqa Jesus ñuqanchikrayku wañukusqanta hanaq pachaman ripukuspan taytanman qawachiptinmi.

Chaypaqqa Jesusmi hanaq pachaman yaykurqa taytanchik Jehovapa ñawpaqninpi kananpaq. Chaymantapas, ñuqanchikrayku wañukusqantam taytanman qawachirqa. Chaymantañataqmi taytanqa ñuqanchikrayku wañukusqanta chaskiykurqa. Chaymantapacham apostolninkunawan Jesuspa rimanakusqanqa Diospa chaskisqanña karqa.

Bibliaqa manam niwanchikchu ima punchawpipuni Jesuspa wañukusqanta taytan chaskisqanmantaqa. Ichaqa yachanchikmi pentecostes hatun punchawpa chunka punchaw ñawpaqllanta hanaq pachaman Jesus ripukusqantaqa (Hech. 1:3). Chay chunka punchaw ukupichá taytanchik Jehovaqa Jesuspa wañukusqanta chaskiykurqa (Heb. 9:12). Chay chaskiykusqanqa sutillam qawakurqa pentecostes hatun punchawpi taytanchik Jehova atiyninwan runakunata yanapaykuptin (Hech. 2:1-4, 32, 33). Chaymantapacham apostolninkunawan Jesuspa rimanakusqanqa taytanchik Jehovapa chaskisqanña karqa.

Chaynaqa, Jesuspa wañukusqanta taytan chaskiykuptinmi apostolninkunawan Jesuspa rimanakusqanpas taytanpa chaskisqan karqa. Chaymantapachataqmi Jesuspas yanapayta qallaykuwarqanchik (Heb. 7:25; 8:1-3, 6; 9:13-15).