¿IMATAM RUNAKUNA NINKU?

Runakunaqa tukuytam rimanku hanaq pacha imayna kasqanmantaqa.

• Enciclopedia de la Religión Católica niq qillqam nin: “Hanaq pachaqa allin ruwaq runakunallapaqmi [...] chayqa sapaqchasqa kaqkunallapaqmi”, nispa. Chay qillqapa nisqanman hinam achka runakunapas piensanku.

• Bentzion Kravitz sutiyuq runapa nisqanman hinaqa kay pachapi kawsakuymi aswan allinqa Judaismo religionpaqqa. Chayna kaptinpas hanaq pachamantam nin: “Diospa kasqanpi alma kaspanqa aswan kusisqam kawsakun”, nispa. Nintaqmi Torá sutiyuq qillqankuqa hanaq pachamanta mana anchata rimasqanta, judio runakunapaq hanaq pachamanta yachachikuy ancha allin kachkaptinpas.

• Hindu hinaspa Buda religionniyuq runakunam ninku hanaq pachaqa wañuqkunapa almanpa samanallan kasqanta. Chaypim almakunaqa suyanku kay pachaman huk cuerpopiña kutimunankupaq utaq hanaq pachapa hanayninman rinankupaq.

• Wakin runakunañataqmi ninku hanaq pachamanta religionkunapa piensasqankuqa yanqa kasqanta.

¿IMATAM BIBLIA NIN?

Bibliapiqa manam runakunapa nisqanman hinachu hanaq pachamantaqa willakun.

• Genesis 1:20 nin: “Paqarimuchuntaqyá kay pachapa hawanpi pawaqkunapas”, nispa. ‘Kay pachapa hawanpi’ nispanqa rimachkan puyukunapa hanayninpi qawasqanchik azul-azul wayramantam.

• Isaias 13:10 nin: “Cielokunapi [hanaq pachapi] huñunasqa lucerokunam manaña achkinqachu”, nispa. Kaypiqa lucerokunapa kasqan karullay-karu hanaq pachamantam rimachkan.

• Bibliaqa nitaqmi hanaq pachaqa Diospa chaynataq angelkunapa yachanan kasqanta (1 Reyes 8:30; Mateo 18:10). Chay hanaq pachaqa manam lucerokunapa kasqan hanaq pachachu aswanqa huk “Hanaq pacham”. *

“Dios taytay, hanaq pacha suma-sumaq wasikimanta qawarimuy” (Isaias 63:15, CQ12).

Diosqa manam wañuruspa hanaq pachaman ripukunapaqchu kay pachataqa unancharqa, aswanqa kaypi wiñaypaq kawsakunapaqmi. Kaypi yuyaymanay:

• Diosmi Adantawan Evata unanchaspan nirqa: “Wawa-churiyuqyá kaychik, kay pachamanyá huntaychik”, nispa (Genesis 1:28). Kaymi qawachin Diosqa wiña-wiñaypaq kawsakunapaq kay pachataqa unanchasqanta. Ichaqa Adanwan Eva huchallikusqankuraykum mana chaynachu karqa (Genesis 2:17; 3:6).

• Punta tayta-mamanchik mana kasukusqankuraykum mirayninkunapas wañuqlla kanchik (Romanos 5:12). ¿Hinallachu wañuqlla kasun?

• Bibliam nin: ‘Ñuqanchikqa suyachkanchik Diospa nisqan musuq cielokunatawan musuq allpatam’, nispa (2 Pedro 3:13). * Kay pachata Jesus kamachiyta qallaykuptinqa Diospa munayninmi tukuy hinastinpi ruwakunqa, hinaptinmi “wañuypas” manaña kanqachu (Apocalipsis 21:3, 4). Wañuyqa tukunqa manam hanaq pachapichu aswanqa kay pachapim. Kay pachaqa unanchasqa karqa ayllunchikwan kuska wiña-wiñaypaq kusisqa kawsakunanchikpaqmi (Juan 5:28, 29).

Achka runakunam kusisqa kachkanku bibliawan imam kaqta hanaq pachamanta yachasqankuwan. Ñawpaqpi catolico kaq Georgem nin: “Kusikurqanim kay pachapi kawsakuy kananmanta yachasqaywan. Kay pachapi kawsakuy kanantaqa allinpaqmi qawani”, nispa. *

“Tayta Diospam hanaq pachaqa. Kay pachatañataqmi runakunaman qurqa” (Salmo 115:16).