Casado vidankupi respetanakuqkunaqa munankum kikinkumantaqa huknin allin kananta. Casadokuna imayna kusisqa kawsakunankupaqmi huk libropi nin: “Imawanpas piñanakuruspankuqa rimanankum, rimaspankupas uyarinakunankum, chaynapi iskayninku allin kanankupaq”, nispa.

BIBLIAPIM NIN: ‘Pipas kuyakuqqa [...] manam kikillanpaq munaqchu’, nispa (1 Corintios 13:4, 5).

Micam nin: “Warmichaytam imapas ruwasqanmanta agradecekuni, rimaspaypas manam hukmanyachinichu”, nispa.

Casado vidapi mana respetanakuspankuqa qaqchanakunmankum, sientichinakunmankum, chayna kaspankuqa rakinakuymanpas chayarunmankum.

Brayanmi nin: “Warmichanchikta nanay simiwan rimapayaspaqa piñarachichwanmi hinaspapas manañam respetawasunchu”, nispa.

PIENSARIY KAYKUNAPI

Yuyaymanay kay punchawkunapi vida pasaqmasikiwan imayna kasqaykimanta, imaynata rimapayasusqaykimanta hinaspa kaypi yuyaymanay:

• ¿Yaqachum qaqchasurqanki icha kuyakuyllawanchu rimapayasurqanki?

• ¿Imakunatam ruwarqa kuyasusqaykirayku?

KAYMANTAM RIMAWAQCHIK

• ¿Ima nisqaytaq utaq ima ruwasqaytaq kusichisunki?

• ¿Ima ruwasqaytaq utaq ima nisqaytaq piñachisunki?

KAYKUNATAM RUWAWAQCHIK

• Qusaykita utaq warmichaykitam niwaq ima ruwasqayki utaq imayna rimasqayki llakichisqanmanta, chaynapi imapas llakichisqanta manaña ruwanaykipaq utaq manaña rimanaykipaq.

• Niykuwaqtaqmi imakunarayku kuyasqaykimantapas.

Mariam nin: “Ñuqaqa qusayta kuyasqayraykum imapas sientichiqnin kaqkunataqa mana ruwanichu, aswanqa kusisqa kanantam munani. Qusayki kuyasqaykita qawachinaykipaqqa manam tukuy imataraqchu ruwanayki”, nispa.

Qusaykitaqa utaq warmichaykitaqa manam “kuyaykim” nispallachu ninayki, aswanqa kallpanchakunaykim imapas kusichisqan kaqkunata ruwanaykipaq.

BIBLIAPIM NIN: “Pachawan churakuchkaq hinayá kaykunawan pachakuychik: Tukuy sunqumanta llakipayakuqllaña kaywan, sumaq sunqu kaywan, mana hatun tukuq kaywan, llampu sunqu kaywan hinaspa pacienciakuywan”, nispa (Colosenses 3:12).